ទីក្រុងវ៉ាស៊ីនតោន៖ មន្ទីបញ្ចកោណប៉ាន់ប្រមាណថាអាមេរិកត្រូវចំណាយលុយ៣៧,៥ពាន់លានដុល្លារទៅលើសង្គ្រាមអ៊ីរ៉ង់ចាប់តាំងពីថ្ងៃទី២៨ ខែកុម្ភៈរហូតមកដល់ពេលនេះ។ រដ្ឋមន្ត្រីការពារជាតិអាមេរិក លោកភីត ហេកសឹត បានឡើងនិយាយការពារចំណាត់ការរបស់រដ្ឋាភិបាលលោកដែលសម្រេចចិត្តប្រឡូកនៅក្នុងសង្គ្រាមដែលចំណាយទឹកប្រាក់យ៉ាងច្រើនសន្ធឹកសន្ធាប់ដល់ថ្នាក់នេះ។ ទន្ទឹមនឹងនោះ សមាជិកព្រឹទ្ធសភាបានសួរសង្ខុញទៅរដ្ឋាភិបាលថាតើសង្គ្រាមវិវត្តដល់ណាហើយ, តើសង្គ្រាមនេះនឹងចំណាយលុយអស់ប៉ុន្មានទៀតទៅថ្ងៃអនាគត និងថាតើមានហេតុផលអ្វីដែលព្រឹទ្ធសភាត្រូវបោះឆ្នោតអនុម័តកញ្ចប់ថវិការាប់ពាន់លានដុល្លារដើម្បីឧបត្ថម្ភការដោះស្រាយបញ្ហានៅចំពោះមុខ។
កាលពីចុងខែមេសា លោកហេកសឹតបានបញ្ជូនសំណើទៅសភាថាសង្គ្រាមនេះចំណាយអស់២៥ពាន់លានដុល្លារ។ ដូច្នេះ បើប្រៀបធៀបជាមួយតួលេខចុងក្រោយនេះឃើញថាខុសគ្នាជាង១២ពាន់លានដុល្លារ។ កាលនោះ អាមេរិក និងអ៊ីរ៉ង់ជិតឈានដល់កិច្ចព្រមព្រៀងឈប់បាញ់គ្នាជាបណ្ដោះអាសន្ន។ ប៉ុន្តែក្រោយមក សង្គ្រាមក៏ផ្ទុះឡើងសាជាថ្មី។ រដ្ឋាភិបាលរបស់លោកត្រាំក៏កំពុងស្នើសុំឱ្យសភាអនុម័តថវិកា៧០ពាន់លានដុល្លារទៀតដើម្បីឧបត្ថម្ភគាំទ្រដល់ប្រតិបត្តិការសឹកនៅអ៊ីរ៉ង់ ទិញអាវុធ និងពន្លឿនការផលិតប្រព័ន្ធទំនើបៗ។ តបទៅនឹងសំណួររបស់ព្រឹទ្ធសមាជិកអាមេរិក ឌីកដឺប៊ីន (Dick Durbin) លោកហេកសឹតថ្លែងថាថ្លៃចំណាយផ្សេងៗអស់ប្រហែល៣៧,៥ពាន់លានដុល្លារទៅលើប្រតិបត្តិការ, ការថែទាំ និងប្រាក់ខែបេសកកម្មរបស់យោធិនរហូតដល់ថ្ងៃទី៣០ ខែកញ្ញា។
លោកដឺប៊ីនសួរបញ្ជាក់ជាច្រើនដងថាតើការផ្ទុះសង្គ្រាមឡើងវិញរវាងអាមេរិក និងអ៊ីរ៉ង់នឹងធ្វើឱ្យខ្ទង់ចំណាយនេះកើនឡើងខ្ពស់ជាងនេះ ឬយ៉ាងណា។ លោកហេកសឹតឆ្លើយតបថាខ្ទង់ចំណាយអាចនឹងច្រើនជាងនេះ។ ប៉ុន្តែចំណាយចរន្តគឺ៣៧,៥ពាន់លានដុល្លារ។ សំណើរបស់រដ្ឋាភិបាលក៏បូកបញ្ចូលទាំងថវិកា៤៦ពាន់លានដុល្លារដើម្បីពង្រីកការផលិតអាវុធមានប្រព័ន្ធនាំផ្លូវអាចវាយប្រហារចំគោលដៅបានល្អ, គ្រាប់មីស៊ីលលឿនជាងសំឡេង, ប្រព័ន្ធប្រឆាំងដ្រូន និងគ្រាប់រំសេវចាំបាច់ដទៃទៀត។ លោកហេកសឹតថ្លែងបន្តទៀតថាទឹកប្រាក់ទាំងនោះនឹងគាំទ្រប្រតិបត្តិការដែលបន្តធ្វើរហូតមកដល់ពេលនេះ ហើយនឹងជំនួសអាវុធយុទ្ធភ័ណ្ឌដែលបានប្រើប្រាស់អស់ទៅហើយនៅក្នុងសង្គ្រាមរយៈពេលប៉ុន្មានខែកន្លងទៅនេះ។
ខ្ទង់ចំណាយដែលធ្វើបច្ចុប្បន្នភាពថ្មីនេះហាក់បានឆ្លើយទៅនឹងចម្ងល់របស់សមាជិកព្រឹទ្ធសភារួចហើយ។ ក៏ប៉ុន្តែការផ្ដល់សក្ខីកម្មនៅសភាលើកនេះច្រើនផ្ដោតសំខាន់ទៅលើបញ្ហាធំៗដូចជាថាតើសង្គ្រាមនឹងអូសបន្លាយរហូតដល់ពេលណា និងថាតើរដ្ឋាភិបាលនឹងស្នើសុំថវិកាប៉ុន្មានទៀតដើម្បីសភាខង់ហ្ក្រែសអនុម័ត។ នៅក្នុងការជជែកដេញដោលនោះ លោកហេកសឹតបានបន្ទោសរដ្ឋាភិបាលរបស់លោកបៃដិនដែលធ្វើឱ្យមន្ទីរបញ្ចកោណត្រូវការថវិកា។ លោកថាយើងមានកប៉ាល់ចម្បាំងជាច្រើនគ្រឿង ប៉ុន្តែត្រូវធ្លាក់ទៅក្នុងដៃរបស់អ៊ីរ៉ង់កាលពីជំនាន់បៃដិន។ ការចោទប្រកាន់នេះត្រូវសមាជិកព្រឹទ្ធសភា ជេករីត (Jack Reed) និយាយកាត់។ លោកថាយើងកំពុងតែនិយាយអំពីសង្គ្រាមដែលរដ្ឋាភិបាលរបស់លោកជាអ្នកចាប់ផ្ដើម។ ការនិយាយរាលដាលទៅដល់លោកបៃដិនគ្រាន់តែជាលេសប៉ុណ្ណោះ៕ ប្រភព៖ AP និងប្រភពដទៃទៀត
ចែករំលែកព័តមាននេះ