កម្ពុជា និងហ្វីលីពីន បានបន្តពង្រឹងកិច្ចសហប្រតិបត្តិការក្នុងវិស័យកសិកម្ម ដោយផ្តោតលើការបើកទីផ្សារសម្រាប់គ្រាប់ស្វាយចន្ទី និងផលិតផលបសុសត្វរបស់កម្ពុជា ទៅកាន់ទីផ្សារហ្វីលីពីន ស្របពេលប្រទេសទាំងពីរ ខិតខំជំរុញពាណិជ្ជកម្មកសិកម្ម និងធានាសន្តិសុខស្បៀងក្នុងតំបន់ ។
ក្នុងឱកាសបំពេញទស្សនកិច្ច ទៅកាន់ប្រទេសហ្វីលីពីន នារសៀលថ្ងៃទី២១ ខែកក្កដា ឆ្នាំ២០២៦ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោកហ្វ្រង់ស៊ីស្កូ ទីយូ ឡូរ៉េត ( Francisco P. Tiu Laurel Jr.) រដ្ឋមន្ត្រីក្រសួងកសិកម្មហ្វីលីពីន បានរួមគ្នារៀបចំ «វេទិកាផ្សារភ្ជាប់ទំនាក់ទំនងរវាងរដ្ឋាភិបាល និងវិស័យឯកជនកម្ពុជា-ហ្វីលីពីន ក្នុងវិស័យកសិកម្ម» ។
វេទិកានេះ មានការចូលរួមពីក្រុមហ៊ុនឯកជនប្រមាណ៣៣ ក្រុមហ៊ុន មកពីកម្ពុជា និងហ្វីលីពីន ដើម្បីពិភាក្សាអំពីឱកាសពង្រីកកិច្ចសហប្រតិបត្តិការពាណិជ្ជកម្មកសិកម្ម ។ ក្រៅពីការពិភាក្សាអំពីការនាំចេញអង្ករកម្ពុជាបន្ថែមទៅកាន់ហ្វីលីពីន ភាគីទាំងពីរក៏បានផ្តោតសំខាន់លើលទ្ធភាពបើកទីផ្សារសម្រាប់គ្រាប់ស្វាយចន្ទី និងផលិតផលបសុសត្វរបស់កម្ពុជា ដែលជាកសិផលមានសក្តានុពល និងមានតម្លៃបន្ថែមខ្ពស់ ។
ការពង្រីកទីផ្សារសម្រាប់គ្រាប់ស្វាយចន្ទី និងផលិតផលបសុសត្វ ត្រូវបានគេរំពឹងថា នឹងជួយបង្កើនតម្លៃកសិផលកម្ពុជា ពង្រីកឱកាសនាំចេញ និងបង្កើនប្រាក់ចំណូលជូនកសិករ និងអ្នកផលិតក្នុងស្រុក ខណៈដែលហ្វីលីពីនអាចទទួលបានប្រភពផ្គត់ផ្គង់កសិផលដែលមានគុណភាព និងមានស្ថិរភាព ។
បន្ថែមពីលើការជំរុញការនាំចេញកសិផល ភាគីទាំងពីរក៏បានពិភាក្សាអំពីកិច្ចសហការក្នុងការផ្គត់ផ្គង់ជីកសិកម្ម ដើម្បីធានានិរន្តរភាពនៃធាតុចូលកសិកម្ម សំដៅលើកកម្ពស់ផលិតភាព និងភាពធន់នៃវិស័យកសិកម្មរបស់ប្រទេសទាំងពីរ ។
វេទិកានេះត្រូវបានចាត់ទុកថា ជាសមិទ្ធផលថ្មីមួយនៃកិច្ចសហប្រតិបត្តិការកម្ពុជា-ហ្វីលីពីន ដែលនឹងរួមចំណែកបើកទីផ្សារថ្មីសម្រាប់កសិផលសក្តានុពលរបស់កម្ពុជា ជាពិសេសគ្រាប់ស្វាយចន្ទី និងផលិតផលបសុសត្វ ព្រមទាំងជួយជំរុញកំណើនពាណិជ្ជកម្មកសិកម្ម និងបង្កើនផលប្រយោជន៍សេដ្ឋកិច្ចដល់ប្រជាកសិករកម្ពុជា និងពង្រឹងសន្តិសុខស្បៀងរបស់ប្រទេសទាំងពីរឱ្យកាន់តែមាននិរន្តរភាព ៕
ចែករំលែកព័តមាននេះ