លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានអះអាងថ្ងៃទី២១ ខែកក្កដា ឆ្នាំ២០២៦ថា អគ្គនាយកដ្ឋាន បានប្រមូលថវិកាបានប្រមាណ៦.២៧៨ ពាន់លានរៀល កើនឡើងប្រមាណ៤,៥% ធៀបនឹងឆមាសទី១ ឆ្នាំ២០២៥ ។
ថ្លែងនៅក្នុងកិច្ចប្រជុំដែលមានការចូលរួមដោយលោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក គុណ ញឹម បានរាយការណ៍ថា ទំហំកញ្ចប់មូលនិធិដែលគយ ប្រមូលបាននៅពេលនេះត្រូវជាប្រមាណ៥១,៦% នៃផែនការកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ។
លោកបានបន្តថា ចំណូលទាំងនេះ គឺប្រមូលបានពីចំណូលពីទំនិញចម្រុះមានប្រមាណ ៣៩%, យានយន្ត និងគ្រឿងចក្រ មានប្រមាណ៣៥%, ប្រេងឥន្ធនៈ និងថាមពល មានប្រមាណ ១៨,៥%, និងសម្ភារសំណង់ និងកម្រៃផ្សេងៗមានប្រមាណ ៧,៥% នៃចំណូលសរុប។
លោក គុណ ញឹម ក៏បានគូសរំលេចនូវការប្រែប្រួលរចនាសម្ព័ន្ធចំណូលប្រមូលដោយគយ ជាពិសេស គឺការថយចុះចំណូលពីប្រេងឥន្ធនៈ និងឧស្ម័ន បណ្តាលមកពីការដាក់ពន្ធ និងអាករជាបន្ទុករដ្ឋ លើការនាំចូលមុខទំនិញនេះ ដែលបានអនុវត្តចាប់ ពីថ្ងៃទី២០ ខែមីនា ឆ្នាំ២០២៦ កន្លងមក, និងការកើនឡើងនៃចំណូលពីក្រុមទំនិញចម្រុះ ដែលជាលទ្ធផលនៃការអនុវត្តវិធានការមុតស្រួច ស្តីពីការបង្ការ និងបង្ក្រាបអំពើរត់គេចពន្ធ និងការពង្រឹងអភិបាលកិច្ចរបស់អគ្គនាយកដ្ឋានគយ និងរដ្ឋាករកម្ពុជា ៕
ចែករំលែកព័តមាននេះ