ទីក្រុងម៉ានីឡា៖ រដ្ឋមន្ត្រីការបរទេសអាមេរិក លោករូប៊ីអូ បានថ្លែងនៅចំពោះមុខអាស៊ានថាការដែលអ៊ីរ៉ង់ទាមទារគ្រប់គ្រងច្រកសមុទ្រហ័រម៉ូស ហើយចង់ទារថ្លៃភាស៊ីពីកប៉ាល់ដឹកទំនិញដែលឆ្លងកាត់ទីនោះជាការគំរាមកំហែងចំពោះសេដ្ឋកិច្ចសាកលលោក ហើយក៏គំរាមកំហែងផងដែរចំពោះគោលការណ៍ស្ដីពីការធ្វើនាវាចរណ៍ដោយសេរី។ លោកថ្លែងដូចខាងលើនេះនៅក្នុងកិច្ចប្រជុំដែលរៀបចំឡើងនៅទីក្រុងម៉ានីឡា ប្រទេសហ្វ៊ីលីពីន ជាមួយសមភាគីអាស៊ានដែលបារម្ភថាសង្គ្រាមនៅមជ្ឈិមបូព៌ាប៉ះពាល់តំបន់របស់ខ្លួនជាបណ្ដើរៗហើយ។ ថ្វីដ្បិតអាមេរិកកំពុងជាប់ដៃនៅក្នុងសង្គ្រាមនៅមជ្ឈិមបូព៌ាយ៉ាងណាក្ដី ប៉ុន្តែលោករូប៊ីបញ្ជាក់ថារដ្ឋាភិបាលរបស់លោកនឹងបន្តស្ថិតនៅជាមួយអាស៊ាន១០០%។
លោករូប៊ីអូថ្លែងថាប្រសិនរដ្ឋមួយនិយាយដោយអត្តនោម័តស្រេចនឹងចិត្តថាខ្លួនត្រូវតែគ្រប់គ្រងច្រកសមុទ្រអន្តរជាតិណាមួយ, គិតលុយពីកប៉ាល់ដែលបើកឆ្លងកាត់ទីនោះ និងបាញ់កប៉ាល់ទាំងឡាយណាដែលពួកគេមិនពេញចិត្ត ពេលនោះករណីនេះអាចនឹងកើតមាននៅទីកន្លែងដទៃទៀតរួមទាំងតំបន់អាស៊ានផងដែរ។ នៅសប្ដាហ៍នេះ រដ្ឋមន្ត្រីការបរទេសអាមេរិក ចិន រុស្ស៊ី និងប្រទេសមួយចំនួនទៀតចាប់ផ្ដើមធ្វើដំណើរទៅដល់ទីក្រុងម៉ានីឡាជាបន្តបន្ទាប់ដើម្បីចូលរួមកិច្ចប្រជុំជាមួយរដ្ឋមន្ត្រីការបរទេសអាស៊ាន។ រដ្ឋមន្ត្រីការបរទេសអង់គ្លេសដែលទើបតែឡើងកាន់តំណែងថ្មីៗក៏ធ្វើដំណើរទៅចូលរួមផងដែរ។
លោករូប៊ីអូបានជួបរដ្ឋមន្ត្រីការបរទេសនៃក្រុមប្រទេសចតុភាគី (Quad) ដែលមានអាមេរិក អូស្ត្រាលី ឥណ្ឌា និងជប៉ុន ដើម្បីពិភាក្សាចំណុចអាទិភាពរបស់ខ្លួនដូចជាបច្ចេកវិទ្យា ជំនួយមនុស្សធម៌ ការឆ្លើយតបទៅនឹងគ្រោះអាសន្ន សន្តិសុខលំហសមុទ្រ និងសន្តិសុខពហុជាតិ។ ប្រទេសទាំង៤បានចេញសេចក្ដីថ្លែងការណ៍រួមមួយគាំទ្រគំនិតផ្ដួចផ្ដើមការពារសន្តិសុខលំហសមុទ្រដែលមានគោលដៅទប់ទល់នឹងការរីករាលដាលនៃឥទ្ធិពលរបស់ប្រទេសចិន។ ប្រទេសទាំងបួនយល់ស្របគ្នាថានៅពេលតំបន់ឥណ្ឌូ-ប៉ាស៊ីហ្វិចមានសន្តិភាព និងស្ថិរភាព វាក៏ធ្វើឱ្យមានសន្តិសុខ និងវិបុលភាពនៅតំបន់អាស៊ានផងដែរ។
បញ្ហាជម្លោះបូរណភាពទឹកដីរវាងប្រទេសខ្លះនៅអាស៊ាន ជាមួយប្រទេសចិនគឺជារបៀបវារៈសំខាន់នៃកិច្ចប្រជុំរយៈពេលបីថ្ងៃដែលចាប់ផ្ដើមតាំងពីម្សិលមិញ។ លោករូប៊ីអូបានទទួលជួបសមាភាគីឥណ្ឌាដើម្បីពិភាក្សាអំពីបញ្ហានានាដែលកំពុងកើតមាននៅក្នុងតំបន់ ក៏ដូចជាសង្គ្រាមនៅអ៊ីរ៉ង់។ នេះបើយោងតាមអ្នកនាំពាក្យក្រសួងការបរទេសអាមេរិក។ លោកទាំង២ក៏ពិភាក្សាគ្នាអំពីកិច្ចព្រមព្រៀងពាណិជ្ជកម្មរវាងអាមេរិក និងឥណ្ឌាដើម្បីកាត់បន្ថយអត្រាពន្ធគយដ៏ខ្ពស់ដែលអាមេរិកកំណត់យកពីទំនិញរបស់ឥណ្ឌា។ លោករូប៊ីអូក៏ត្រៀមជួបគ្នាទ្វេភាគីជាមួយរដ្ឋមន្ត្រីការបរទេសចិនផងដែរ៕ ប្រភព៖ AP
ចែករំលែកព័តមាននេះ