មន្ត្រីជលផល និង អាជ្ញាធរស្រុកពាមរក៍ ចុះបង្ក្រា.បបទល្មើសនេសាទក្នុងដែនអភិរក្ស លែងកូនត្រីជាង ១០គីឡូ និងដុ.តបំផ្លាញឧបករណ៍នេសាទខុសច្បាប់មួយចំនួនធំ
- ព្រៃវែង
ខេត្តព្រៃវែង ៖ ឧបករណ៍នេសាទខុសច្បាប់ ប្រភេទស្បៃមុងរាប់រយម៉ែត្រ ត្រូវបានមន្ត្រីជំនាញជលផល និងអាជ្ញាធរស្រុកពាមរក៍ ធ្វើការបង្ក្រាបនិងដុតបំផ្លាញចោល ក្នុងពេលចុះល្បាតត្រួតពិនិត្យ នៅក្នុងដែនអភិរក្សកំពង់ចំណា ដែលស្ថិតក្នុងឃុំបាបោង ស្រុកពាមរក៍ ខេត្តព្រៃវែង។
លោក ហ៊ុន សាវី នាយរងសង្កាត់រដ្ឋបាលជលផលស្ទឹងស្លូត បានឲ្យដឹងថា ដើម្បីការពារប្រភពធនធានមច្ឆាជាតិអោយនៅគង់វង្ស ពិសេសក្នុងរដូវបិទនេសាទនេះ មន្ត្រីជំនាញជលផល សហការជាមួយនឹងអាជ្ញាធរស្រុកពាមរក៍ បានធ្វើការចុះល្បាតត្រួតពិនិត្យជាប្រចាំ នៅតាមដងស្ទឹងទន្លេព្រែក ក៏ដូចជាតំបន់ដែនអភិរក្ស ដើម្បីធានាកុំឲ្យមានជនខិលខូចលួចធ្វើការនេសាទដោយខុសច្បាប់។
ជាក់ស្ដែងនៅព្រឹកថ្ងៃទី 22 កក្កដានេះ មន្ត្រីជំនាញជលផល និងគណៈកម្មការទប់ស្កាត់បទល្មើសនេសាទស្រុក ដែលដឹកនាំដោយលោក ប៉ែត សាវេន អភិបាលរងស្រុកពាមរក៍ បានចុះល្បាតនៅតាមដងទន្លេតូច និងក្នុងដែនអភិរក្សកំពង់ចំណា ក៏ប្រទះឃើញមានការលួចដាក់របាំងស្បៃមុងជាច្រើនកន្លែង ទើបមន្ត្រីជំនាញធ្វើការបង្ក្រាបនិងបំផ្លាញចោលភ្លាមៗ។
លោក ហ៊ុន សាវី បានបញ្ជាក់ថា ជាលទ្ធផលក្នុងការបង្ក្រាប មន្ត្រីជំនាញដកហូតបានឧបករណ៍នេសាទខុសច្បាប់ប្រភេទស្បៃមុងប្រវែង ៦៥០ ម៉ែត្រ បង្គោលចម្រឹង ៣៤០ ដើម និងលូស្បៃមុងចំនួន ១២ មាត់ ឧបករណ៍ទាំងនេះត្រូវបានបំផ្លាញចោលភ្លាមៗនៅនឹងកន្លែង ជាមួយគ្នានោះក៏បានចាក់ព្រលែងកូនត្រីចម្រុះចូលទៅក្នុងបឹងធម្មជាតិវិញបានជាង 10 គីឡូក្រាម ៕
ចែករំលែកព័តមាននេះ