ឃាត់ខ្លួនក្មេងទំនើ.ង៥នាក់ បង្ហោះម៉ូតូតាមផ្លូវសាធារណៈ កោរសក់ និងដកហូតម៉ូតូរក្សាទុក៣ខែ
- កំពង់ស្ពឺ
ខេត្តកំពង់ស្ពឺ៖ ក្មេងទំនើងចំនួន៥នាក់ មានចំនួន២ក្រុម ត្រូវបានកម្លាំងមូលដ្ឋានកងរាជអាវុធហត្ថក្រុងច្បារមន និងមូលដ្ឋានកងរាជអាវុធហត្ថស្រុកសំរោងទង។ធ្វើការស្រាវជ្រាវឃាត់ខ្លួនខណៈដែលក្រុមក្មេងទំនើងធ្វើសកម្មភាពបង្ហោះម៉ូតូចែកចាយតាមបណ្ដាញសង្គម facebookធ្វើឲ្យប៉ះពាល់ដល់សណ្ដាប់ធ្នាប់សាធារណៈនិងសង្គម។
ការស្រាវជ្រាវឃាត់ខ្លួនក្រុមក្មេងទំនើងក្រោយពីទទួលបានបណ្ដឹងពីប្រជាពលរដ្ឋ តាមរយៈលេខទូរស័ព្ទអន្តរាគមន៍សង្គ្រោះបន្ទាន់ ១២៩២ ពាក់ព័ន្ធករណីក្រុមក្មេងទំនើងធ្វើសកម្មភាពបង្ហោះម៉ូតូតាមផ្លូវសាធារណៈ បង្កការរំខានដល់ប្រជាពលរដ្ឋ ប៉ះពាល់ដល់សណ្ដាប់ធ្នាប់សាធារណៈ និងបង្កហានិភ័យដល់សុវត្ថិភាពអ្នកប្រើប្រាស់ផ្លូវ កម្លាំងកងរាជអាវុធហត្ថខេត្តកំពង់ស្ពឺ បានចុះអន្តរាគមន៍ និងបង្ក្រាបបានជាក់ស្ដែងភ្លាមៗ ខណៈពេលក្រុមក្មេងទំនើងទាំងនោះកំពុងធ្វើសកម្មភាពយ៉ាងអនាធិបតេយ្យលើដងផ្លូវសាធារណៈ ។
ការឃាត់ខ្លួនក្រុមក្មេងទំនើង បានធ្វើឡើងកាលពីថ្ងៃទី១៩-២០ ខែកក្កដា ឆ្នាំ២០២៦ នៅទីតាំងចំនួនពីរ ផ្សេងគ្នា គឺក្នុងភូមិសាស្ត្រ ក្រុងច្បារមន និង ស្រុកសំរោងទង ខេត្តកំពង់ស្ពឺ ។
មន្ត្រីកងរាជអាវុធហត្ថខេត្តកំពង់ស្ពឺ បាននិយាយឱ្យដឹងថា កម្លាំងជំនាញបានចុះអន្តរាគមន៍ និងបង្ក្រាបជាក់ស្ដែងភ្លាមៗ ដើម្បីទប់ស្កាត់សកម្មភាពដែលបង្កភាពរញេរញៃ រំខានដល់ប្រជាពលរដ្ឋ និងប៉ះពាល់ដល់សណ្ដាប់ធ្នាប់ និងសុវត្ថិភាពសាធារណៈ ។ជាលទ្ធផលឃាត់ក្មេងទំនើងបានចំនួន៥នាក់ ដែលមានអាយុចន្លោះពី២០ទៅ២២ឆ្នាំ រួមជាមួយនឹងមធ្យោបាយម៉ូតូចំនួន២គ្រឿងផងដែរ។
មន្ត្រីកងរាជអាវុធហត្ថខេត្តកំពង់ស្ពឺបានបន្តឲ្យដឹងទៀតថាចំពោះវិធានការលើក្មេងទំនើង កោសក់ លោតកង្កែប ធ្វើអនាម័យ និងហៅឱ្យអាណាព្យាបាលធ្វើកិច្ចសន្យាយកទៅអប់រំបន្ត។ ចំណែកមធ្យោបាយម៉ូតូត្រូវបាន។ដកហូតរក្សាទុករយៈពេល៣ខែ ឬស្មើនឹង៩០ថ្ងៃ ទើបប្រគល់ឱ្យយកទៅប្រើប្រាស់វិញ។
កងរាជអាវុធហត្ថខេត្តកំពង់ស្ពឺ ធ្វើការអំពាវនាវដល់យុវជន និងប្រជាពលរដ្ឋទាំងអស់ សូមបញ្ឈប់សកម្មភាពបង្ហោះម៉ូតូ ប្រណាំងយានយន្តខុសច្បាប់ ឬ សកម្មភាពផ្សេងៗ ដែលផ្ទុយនឹងច្បាប់ ព្រោះអាចបង្កគ្រោះថ្នាក់ដល់អាយុជីវិត ទ្រព្យសម្បត្តិរបស់ខ្លួន និងអ្នកដទៃ ព្រមទាំងប៉ះពាល់ដល់សណ្ដាប់ធ្នាប់ និងសុវត្ថិភាពសាធារណៈ ។ សូមប្រជាពលរដ្ឋបន្តចូលរួមសហការរាយការណ៍ព័ត៌មាន ឬ ហេតុការណ៍ផ្សេងៗ តាមរយៈលេខទូរស័ព្ទអន្តរាគមន៍សង្គ្រោះបន្ទាន់ ១២៩២ ដើម្បីឱ្យកម្លាំងកងរាជអាវុធហត្ថអាចចុះអន្តរាគមន៍បានទាន់ពេលវេលា និងរួមគ្នាថែរក្សាសន្តិសុខ សណ្ដាប់ធ្នាប់ និងសុវត្ថិភាពសង្គមឱ្យកាន់តែល្អប្រសើរ ៕
ចែករំលែកព័តមាននេះ