សមត្ថកិច្ចខេត្តស្ទឹងត្រែងបង្ក្រាបករណីជួញដូរគ្រឿងញៀននៅ៣គោលដៅ ឃាត់ខ្លួនជនសង្ស័យ៤នាក់ រួមទាំងមេខ្លោងបញ្ជូនទៅឃុំខ្លួននៅពន្ធនាគារ
- ស្ទឹងត្រែង
ខេត្តស្ទឹងត្រែង ៖ កម្លាំងជំនាញនៃការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលក្រុងស្ទឹងត្រែង បើកប្រតិបត្តិការស្រាវជ្រាវ និងបង្ក្រាបករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀនជាបន្តបន្ទាប់នៅ០៣គោលដៅផ្សេងគ្នា ដោយឃាត់ខ្លួនជនសង្ស័យចំនួន៤នាក់ រួមទាំងវត្ថុតាង និងបានបញ្ជូនទៅតុលា ការ ដើម្បីអនុវត្តតាមនីតិវិធីច្បាប់ ។ នេះបើតាមការឱ្យដឹងពីនគរបាលជំនាញ កាលពីព្រឹកថ្ងៃទី២២ កក្កដា ២០២៦ ។
ប្រតិបត្តិការនេះ ធ្វើឡើងកាលពីថ្ងៃទី១៥ ខែកក្កដា ឆ្នាំ២០២៦ ដោយបានសម្រេចផលនៅចំណុចភូមិស្ពានថ្ម និងភូមិហាងខូបាន ក្នុងក្រុងស្ទឹងត្រែង ខេត្តស្ទឹងត្រែង ។ ជនសង្ស័យទាំង៤នាក់ ដែលត្រូវឃាត់ខ្លួនរួមមាន៖ ១-ឈ្មោះ ដោ ឧត្តម ភេទប្រុស អាយុ២៩ឆ្នាំ ទីលំនៅភូមិហាងខូបាន សង្កាត់សាមគ្គី (ត្រូវជាមេក្លោងក្នុងអំពើជួញដូរ រក្សាទុក និងប្រើប្រាស់) ២-ឈ្មោះ កែវ ម៉េន ភេទប្រុស អាយុ៥៣ឆ្នាំ ទីលំនៅភូមិស្ពានថ្ម សង្កាត់ស្ទឹងត្រែង (ករណីសមគំនិតជួញដូរ និងប្រើប្រាស់) ៣-ឈ្មោះ ម៉េន វុត្ថា ភេទប្រុស អាយុ១៧ឆ្នាំ ទីលំនៅភូមិស្ពានថ្ម សង្កាត់ស្ទឹងត្រែង (ករណីសមគំនិតជួញដូរ និងប្រើប្រាស់) ៤-ឈ្មោះ អ៊ុង សោភ័ណទេវី ភេទស្រី អាយុ៤០ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នភូមិកណ្តាល សង្កាត់ស្ទឹងត្រែង ក្រុង/ខេត្តស្ទឹងត្រែង (ករណីជួញដូរ និងប្រើប្រាស់) ។
យោងតាមការបញ្ជាក់ពីមន្ត្រីជំនាញថា ការឈានទៅដល់ការចាប់ខ្លួនមេខ្លោងឈ្មោះ ដោ ឧត្តម គឺកើតចេញពីការសាកសួរ និងចម្លើយសារភាពរបស់ក្រុមអ្នកប្រើប្រាស់ដែលត្រូវឃាត់ខ្លួនមុននេះ ។ ក្នុងនោះ កម្លាំងសមត្ថកិច្ចក៏រឹបអូសបានវត្ថុតាងសារធាតុញៀនមួយចំនួនដែលជាភស្តុតាងជាក់ស្តែងផងដែរ ។
បច្ចុប្បន្ន ក្រោយបញ្ចប់ការសាកសួរនិងកសាងសំណុំរឿងតាមនីតិវិធី នគរបាលក្រុងស្ទឹងត្រែងបានបញ្ជូនជនសង្ស័យទាំង៤នាក់ទៅកាន់អយ្យការអមសាលាដំបូងខេត្តស្ទឹងត្រែង ហើយចៅក្រមស៊ើបសួរបានសម្រេចចេញដីកាឃុំខ្លួនពួកគេជាបណ្តោះអាសន្ននៅក្នុងពន្ធនាគារ ដើម្បីធានារក្សាសន្តិសុខ និងសណ្តាប់ធ្នាប់ជូនប្រជាពលរដ្ឋក្នុងមូលដ្ឋាន៕
ចែករំលែកព័តមាននេះ