ករណី Hack Facebook បោ.កប្រាក់ជិត ១០លានរៀល សមត្ថកិច្ចខេត្តកំពត និងប៉ៃលិន ស្រាវជ្រាវឃាត់ខ្លួនម្តាយកូន ២នាក់
- កំពត
ខេត្តកំពត ៖ យោងតាមប្រភពច្បាស់ការពីស្នងការនគរបាលខេត្តកំពត ដែលបានដកស្រង់ការសួរចម្លើយពីការិយាល័យជំនាញបច្ចេកទេសនៃស្នងការដ្ឋាននគរបាលខេត្តកំពត នារសៀលថ្ងៃទី ២០ ខែកក្កដា ឆ្នាំ ២០២៦ មកនេះបានឱ្យដឹងថា ជនសង្ស័យជាស្ត្រី ២នាក់ម្តាយ និងកូនដែលជាប់ពាក់ពន្ធ័ករណីបទល្មើសជាក់ស្តែងឆបោកប្រាក់តាមបច្ចេកវិទ្យាដោយ Hack Facebook របស់ជនរងគ្រោះកាលពីថ្ងៃទី ១៩ ខែមិថុនា ឆ្នាំ ២០២៦ កន្លងទៅថ្មីៗនេះ នៅភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត បណ្តាលឲ្យជនរងគ្រោះឈ្មោះ ស៊ូ យី ភេទប្រុស អាយុ ៦៣ឆ្នាំ នៅភូមិ ១ឧសភា សង្កាត់កំពង់កណ្តាល ក្រុងកំពត មានការខាតបង់ប្រាក់ចំនួន ៩៩៩០០០០៛ (ប្រាំបួនលានកៅសិបប្រាំបួនម៉ឺនរៀលគត់) ។
ប្រភពឲ្យដឹងទៀតថា ក្រោយពីបានទទួលបណ្តឹងជនរងគ្រោះកំលាំងនគរបាលការិយាល័យបច្ចេកទេសនៃស្នងការដ្ឋាននគរបាលខេត្តបានធ្វើការស្រាវជ្រាវឃើញថា ម្ចាស់គណនីធនាគារដែលទទួលប្រាក់ពីជនរងគ្រោះមានឈ្មោះ សុំ សុខា ហៅ ខុំ ភេទស្រី អាយុ ១៨ឆ្នាំ នៅភូមិទឹកថ្លា សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពដដែលបានបន្តថា នៅថ្ងៃទី ១៧ខែកក្កដា ឆ្នាំ ២០២៦ វេលាម៉ោង ៩ព្រឹក ក្រោយពីទទួលចំណារឯកភាពសំណើរសុំបើកការស៊ើបអង្កេតបឋមរបស់ឯកឧត្តមព្រះរាជអាជ្ញាសាលាដំបូងខេត្តកំពត កំលាំងផែនការងារនគរបាលព្រហ្មទណ្ឌខេត្តកំពត បានសហការជាមួយកំលាំងផែនការងារនគរបាលព្រហ្មទណ្ឌខេត្តប៉ៃលិនបាននាំខ្លួនជនសង្ស័យឈ្មោះ សុំ សុខា ហៅ ខុំ មកធ្វើការសាកសួរ តាមចម្លើយជននេះកំលាំងសមត្ថកិច្ចបានបន្តនាំខ្លួនឈ្មោះ ស៊រ សុខន ហៅ យ៉ាន ភេទស្រី អាយុ ៣៧ឆ្នាំ (ត្រូវជាម្តាយ សុំសុខា ហៅ ខុំ) និងចាប់យកវត្ថុតាងទូរសព្ទ័ដៃដែលប្រើប្រាស់ប្រព្រឹត្តបទល្មើសចំនួន ២គ្រឿងរួមមាន ៖ ១- OPPO A3X ពណ៌ខ្មៅមាន IMEl 1:863971072992710 . IMEl2:863971072992702 ប្រើស៊ីមកាតលេខ 0977934657 មានស្រោមពណ៌ត្នោតជារបស់ឈ្មោះស៊ត សុខន ។ ទី ២- ម៉ាក IPHONE11 ពណ៌សមាន IMEl1:356557102477659 IMEl:12863971072992702 ប្រើស៊ីមលេខ 0977934657 មានស្រោមពណ៌ខ្មៅ ជារបស់ឈ្មោះ សុំ សុខា ។
ប្រភពដដែលបន្តទៀតថា ជនសង្ស័យ ២នាក់ម្តាយ និងកូន បន្ទាប់សមត្ថកិច្ចជំនាញធ្វើការសាកសួរយ៉ាងម៉ត់ចត់មក បានសារភាពពីការប្រព្រឹត្តបទល្មើសឆបោកតាមបច្ចេកវិទ្យាលើជនរងគ្រោះពិតប្រាកដមែន ។ សេចក្តីសន្និដ្ឋានរបស់សមត្ថកិច្ច ការស៊ើបអង្កេតដែលធ្វើឡើងបានបង្ហាញឲ្យឃើញថា ជនសង្ស័យចំនួន ២នាក់ ទី១- ឈ្មោះ ស៊ត សុខន ហៅ យ៉ាន ភេទស្រី អាយុ ៣៧ឆ្នាំ រស់នៅភូមិទឹកថ្លា សង្កាត់ប៉ៃលិន ក្រុងប៉ៃលិន ខេត្តប៉ៃលិន មុខរបររត់តុ ទី ២- ឈ្មោះ សុំ សុខា ហៅ ខុំ ភេទស្រី អាយុ ១៨ឆ្នាំ រស់នៅភូមិទឹកថ្លា សង្កាត់ទឹកថ្លា ក្រុងប៉ៃលិន ខេត្តប៉ៃលិន មុខរបរជំនួយការចុងភៅ ។ ជនសង្ស័យទាំង ២នាក់ម្តាយ និងកូន ក្រោយពីសមត្ថកិច្ចជំនាញធ្វើការសាកសួរ រួចរាល់ នៅរសៀលថ្ងៃទី ២០ខែកក្កដា ឆ្នាំ ២០២៦ នេះសមត្ថកិច្ចបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ៕
ចែករំលែកព័តមាននេះ