កីឡាតេក្វាន់ដូ ITF កម្ពុជាគ្រោងបញ្ជូនអត្តពលិកជម្រើសជាតិចំនួន ៣២រូបទៅប្រកួតជើងឯកអាស៊ីនៅម៉ុងហ្គោលី
- ភ្នំពេញ
រាជធានីភ្នំពេញ ៖ សហព័ន្ធកីឡាតេក្វាន់ដូITFកម្ពុជាត្រៀមបញ្ជូនកីឡាករ កីឡាការិនីជម្រើសជាតិតេក្វាន់ដូITFកម្ពុជាចំនួន៣២រូប មានទាំងឈុតតូច ឈុតធំដើម្បីទៅចូលរួមប្រកួតកីឡាតេក្វាន់ដូITFជ្រើសរើសជើងឯកអាស៊ីលើកទី១១ ដែលនឹងប្រព្រឹត្តិទៅចាប់ពីថ្ងៃទី៣ដល់ថ្ងៃទី៩ខែសីហាឆ្នាំ២០២៦នៅ(ULAANBATAR MONGOLIA)។
ឯកឧត្តមកែវ រ៉េមីប្រធានសហព័ន្ធកីឡាតេក្វាន់ដូITFកម្ពុជាបានមានប្រសាសន៍ថា នេះជាលើកទី១ហើយដែលកម្ពុជាបានបញ្ជូនក្រុមកីឡាឈុតតូចទៅប្រកួតនៅក្រៅប្រទេស ។ ទោះជាយ៉ាងណាសម្រាប់ប្រភេទកីឡាតេក្វាន់ដួITFកម្ពុជាធ្លាប់ចេញទៅប្រកួតនៅក្នុងព្រឹត្តិការណ៍ធំៗ មានដូចជាការប្រកួតកម្រិតពិភពលោក កម្រិតអាស៊ីជាច្រើនលើករួចមកហើយ ក្នុងនោះថែមទាំងដណ្ដើមបានមេដាយមាស ប្រាក់និងសំរឹទ្ធជាច្រើនគ្រឿងជូនជាតិទៀតផង។
ឯកឧត្តមបានបន្តឱ្យដឹងថែមទៀតថា សម្រាប់ការចេញទៅប្រកួតលើកនេះមិនត្រឹមតែប្រកួតមួយមុខនោះទេ គេត្រូវទៅដេញថ្លៃធ្វើជាម្ចាស់ផ្ទះរៀបចំការប្រកួតទៀតផង ។ ព្រោះថាកម្ពុជានឹងរំពឹងទុកយ៉ាងមុតមាំក្នុងការធ្វើជាម្ចាស់ផ្ទះរៀបចំការប្រកួតកីឡាតេក្វាន់ដូជើងឯកអាស៊ីលើកទី១២ឆ្នាំ២០២៨។ឯកឧត្តមបានសង្កត់ធ្ងន់ទៀតថា ការធ្វើជាម្ចាស់ផ្ទះរៀបចំការប្រកួតនេះពិតជាមានសារៈសំខាន់ខ្លាំងណាស់ ព្រោះថាយើងនឹងទទួលបានផលចំណេញច្រើនពីសំណាក់អ្នកចូលរួម ជាពិសេសពីបណ្ដាប្រទេសនៅលើពិភពលោកដែលបានមកចូលរួម។ម្យ៉ាងវិញទៀតយើងដឹងហើយថា កាលណាមានកីឡាករមកចូលរួមគឺមានបងប្អូន ក្រុមគ្រួសារ របស់គេនឹងមកតាមជាមួយ គេមកលេងប្រទេសយើង យកលុយមកចាយនៅស្រុកយើងជួយឱ្យកំណើនសេដ្ឋកិច្ចមានការកើនឡើង។ដូច្នេះកីឡាផ្សាភ្ជាប់ជាមួយនឹងវិស័យទេសចរណ៍។
ឯកឧត្តមបានមានប្រសាសន៍ទៀតថាបច្ចុប្បន្នវិស័យកីឡាតេក្វាន់ដូITFកម្ពុជាត្រូវបានទទួលស្គាល់នៅលើពិភពលោក ពេលមានវត្តមានក្រុមកីឡាករ កីឡាការិនីតេក្វាន់ដូITFកម្ពុជាទៅដល់ទីណាល្បីល្បាញដល់ទីនោះតែម្ដង។ជាក់ស្ដែងការចេញទៅប្រកួតលើកនេះ បានធ្វើឱ្យមានការចាប់អារម្មណ៍យ៉ាងនៅតាមបណ្ដាប្រទេសមួយចំនួន ព្រោះគេដឹងថាក្រុមអត្តពលិកតេក្វាន់ដូITFកម្ពុជា បន្ទាប់ពីប្រទេកូរ៉េខាងជើងដែលជាម្ចាស់ក្បាច់គុនមានតែកម្ពុជាទេ បន្ទាប់មកមានរៀបរុស្សី ចិន និងកាហ្សាកស្ថានជាដើម។
ដូច្នេះលោកសំណូមពរទៅដល់ក្រុមកីឡាករ កីឡាការិនីត្រៀមខ្លួនឱ្យបានល្អ។ឯកឧត្តមបានបញ្ជាក់ហើយថាប្រសិនជាយើងបានធ្វើជាម្ចាស់ផ្ទះដូចការគ្រោងទុកមែ ហាមដាច់ខាតគឺការហាលអាវ បានន័យថាម្ចាស់ផ្ទះត្រូវឡើងទៅដល់វគ្គប្រកួតផ្ដាច់ព្រ័ត្រដណ្ដើមយកមេដាយមាស៕
ចែករំលែកព័តមាននេះ