សង្គ្រាមអ៉ីរ៉ង់ ៖ អស់ពេល៨ថ្ងៃមកហើយនៃការប្រទូស្តរ៉ាយគ្នាឡើងវិញ រវាងអាមេរិកនិងអ៉ីរ៉ង់ ដោយការវាយប្រហារគ្នាកំពុងបន្តទៀតនៅអ៉ីរ៉ង់ និងក្នុងបណ្ដាប្រទេសក្នុងតំបន់ឈូងសមុទ្រពែរ្ស៍ ។
អាមេរិកប្រកាស នាថ្ងៃទី១៩ កក្កដា ថា បានវាយប្រហារបណ្ដាកងឯកភាពយោធាទាក់ទិននឹងកងឆ្មាំបដិវត្តន៍អ៉ីរ៉ង់ ជាការសងសឹកចំពោះការស្លាប់ទាហានខ្លួន២នាក់ កាលពីថ្ងៃទី១៧ កក្កដា នៅមូលដ្ឋានយោធាមួយក្នុងប្រទេសហ្ស៊កដានី។ ម្យ៉ាងវិញទៀតការប្រកាសអាសន្នថ្មីៗលាន់ឮនៅហ្ស៊កដានី បន្ទាប់ពីការវាយប្រហារថ្មីមួយចំនួនរបស់អ៉ីរ៉ង់។ ស្នូរស៊ីរ៉ែនលាន់ឮនៅក្រុងអាម៉ង់ហើយមីស៊ីល១គ្រាប់ត្រូវបានស្ទាក់កម្ទេច មុនពេលហោះទៅដល់ព្រលានយន្តហោះAQABA ជិតព្រំដែនជាមួយអ៊ីស្រាអែល។
ចាប់តាំងពីផ្ទុះសង្គ្រាមជាថ្មីវិញមក អ៉ីរ៉ង់បានយកប្រទេសជាច្រើននៅតំបន់ឈូងសមុទ្រពែរ្ស៍ជាគោលដៅវាយប្រហារ ។ ប្រទេសហ្ស៊កដានី ក៏រងការវាយប្រហារជាច្រើនលើកដែរ។ ជាមួយបារ៉ែន និងគុយវ៉ែត ហ្ស៊កដានីរងការវាយប្រហារ ជាពិសេសដោយដ្រូននិងមីស៊ីលរបស់អ៉ីរ៉ង់រយៈពេល១សប្ដាហ៍ចុងក្រោយនេះ ។ អាជ្ញាធរអ៉ីរ៉ង់វាយតម្លៃថា ហ្ស៊កដានីគឺជាទិសដៅវាយប្រហារសមស្រប ព្រោះប្រទេសនោះមានបណ្ដាមូលដ្ឋានយោធាអាមេរិកដែលប្រើសម្រាប់វាយប្រហារ ហើយរក្សាទំនាក់ទំនងការទូតជាមួយអ៉ីស្រាអែល ។
សម្រាប់អ្នកឯកទេសខាងមជ្ឈឹមបូព៌ា និងនាយកវិទ្យាស្ថានភូមិសាស្ត្រនយោបាយបាយអឺរ៉ុប លោកសេបាស្ទៀនប៊ូសថា ការវាយប្រហារទាំងនេះរបស់អ៉ីរ៉ង់បង្ហាញពីសមត្ថភាពរបស់ប្រទេសនោះ ក្នុងការវាយប្រហារបណ្ដាគោលដៅយុទ្ធសាស្ត្រ ហើយអាចវាយប្រហារតាមទម្រង់ផ្សេងៗគ្នា ដែលគេនឹកស្មានមិនដល់ ។ ការវាយប្រហារទាំងនេះ ក៏បង្ហាញឲ្យឃើញដែរថា អ៉ីរ៉ង់ចេះហើយអាចកំណត់បាន បណ្ដាសត្រូវពិតប្រាកដរបស់ខ្លួន ។ លោកសេបាស្ទៀនប៊ូស៊បន្តថា ចំពោះភ្នែកក្រុងតេហេរ៉ង់មើលឃើញថា ប្រទេសអារ៉ាប់ជាច្រើនបានក្បត់បុព្វហេតុអារ៉ាប់ ដោយចុះហត្ថលេខាលើកិច្ចព្រមព្រៀង ABRAHAM ឬកិច្ចព្រមព្រៀងសន្តិភាពរវាងហ្ស៊កដានី និងអ៉ីស្រាអែល។
ដោយសារជម្លោះ អាមេរិកជ្រើសយកការបញ្ជូនកងទ័ពឬសម្ភារយោធាទៅកាន់ហ្ស៊កដានីជាជាងទៅបណ្ដាប្រទេសក្នុងតំបន់ឈូងសមុទ្រដោយយល់ថា ស្តិតនៅក្បែរអ៉ីរ៉ង់ដែលងាយរងគ្រោះបំផុត។ ក្រៅពីការស្លាប់ទាហាន២នាក់នៅហ្ស៊កដានីបណ្ដាសារព័ត៌មានអាមេរិកក៏អះអាងដែរថា ឧទ្ធម្ភាគចក្រច្រើនគ្រឿងរបស់អាមេរិក រងការបំផ្លាញឬខូចខាតនៅហ្ស៊កដានី។
ការវាយប្រហាររបស់អ៉ីរ៉ង់លើបណ្ដាប្រទេសក្នុងតំបន់ក៏បង្ហាញដែរពីសមត្ថភាពរបស់អ៉ីរ៉ង់។ ប្រទេសនេះ អាចផលិតហើយផលិតទៀតបណ្ដាដ្រូន និងមីស៊ីល ដែលពិតជាមានប្រសិទ្ធភាពវិសាមញ្ញ ។ អ៉ីរ៉ង់ក៏បង្ហាញដែរពីសមត្ថភាពអ៉ីរ៉ង់ដែលអាចវាយប្រហារដល់បណ្ដាផលប្រយោជន៍អាមេរិក ក្នុងបណ្ដាប្រទេសអារ៉ាប់ ។ ដូចជាមូលដ្ឋានយោធាអាមេរិកនៅហ្ស៊កដានីសុទ្ធតែរៀបចំតាំងពីយូរមកហើយ ដោយមានការពង្រឹងប្រព័ន្ធការពារតែអ៉ីរ៉ង់នៅតែអាចវាយបាន។ របបអ៉ីរ៉ង់បានយល់ច្បាស់ថា សង្គ្រាម HYBRIDE ពិតជាសង្គ្រាមដែលអាចវាយប្រហារចំៗគោលដៅដែលជាផលប្រយោជន៍អាមេរិក។
កងទ័ពអាមេរិកប្រកាសនាថ្ងៃទី១៩ កក្កដា ពីការស្លាប់ទាហានខ្លួនម្នាក់ ពេលកំពុងបំផ្លាញចោលបណ្ដាគ្រាប់មិនទាន់ផ្ទុះមកពីដ្រូនមួយរបស់អ៉ីរ៉ង់ ដែលបាញ់ធ្លាក់នៅភាគខាងជើងអ៉ីរ៉ាក់។ នេះជាការស្លាប់ទាហានអាមេរិកទី១៧ ហើយតាំងពីចាប់ផ្ដើមសង្គ្រាមប្រឆាំងអ៉ីរ៉ង់មក ៕
ចែករំលែកព័តមាននេះ