ខេត្តកំពង់ស្ពឺ ៖ ផ្ទះប្រជាពលរដ្ឋមួយខ្នងត្រូវបានអគ្គិភ័យលេបត្របាក់អស់គ្មានសល់ ខណៈដែលម្ចាស់រវល់ទៅចូលរួមបុណ្យសពបងប្រុសបង្កើត ហើយទុស្សេខ្សែចរន្តភ្លើង បណ្ដាលឲ្យឆាបឆេះផ្ទះ បង្កមានការភ្ញាក់ផ្អើលប្រជាពលរដ្ឋ និងសមត្ថកិច្ចតែម្តង ។
ហេតុការណ៍ភ្លើងឆេះផ្ទះបានកើតឡើង កាលពីវេលាម៉ោង១និង៣០នាទីរសៀល ថ្ងៃទី១៩ ខែកក្កដា ឆ្នាំ២០២៦ ស្ថិតនៅក្នុងភូមិរាំង ឃុំជង្រុក ស្រុគងពិសី ខេត្តកំពង់ស្ពឺ ។
សមត្ថកិច្ចខេត្តកំពង់ស្ពឺ បាននិយាយឱ្យដឹងថា ម្ចាស់ផ្ទះមានឈ្មោះ នឹម ភារៈ ភេទប្រុស អាយុ៤៤ឆ្នាំ ប្រពន្ធឈ្មោះ ប៉ិច សុខៃ អាយុ៣៦ឆ្នាំ រស់នៅភូមិឃុំកើតហេតុខាងលើ ។
សមត្ថកិច្ចខេត្តកំពង់ស្ពឺ បានបន្តឲ្យដឹងទៀតថា នៅមុនពេលកើតហេតុម្ចាស់ផ្ទះបានទៅចូលរួមបុណ្យសពបងប្រុសបង្កើតរបស់ខ្លួននៅក្នុងភូមិជាមួយគ្នា ។ ដោយចាក់សោផ្ទះ ស្រាប់តែដល់ម៉ោងកើតហេតុ ទុស្សេចរន្តភ្លើងបណ្ដាលឲ្យមានអគ្គិភ័យឆាប់ឆេះផ្ទះ អណ្តាតភ្លើង សន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចក្នុងមូលដ្ឋាន ប៉ុន្តែដោយសារតែការរាយការណ៍យឺតពេក ហើយសន្ទុះភ្លើងឆាបឆេះលឿនពេក មិនអាចជួយអន្តរាគមន៍ទាន់ពេលវេលាឡើយ ។
សមត្ថកិច្ចខេត្តកំពង់ស្ពឺ បានបញ្ជាក់ដឹងថា ទ្រព្យសម្បត្តិរបស់ម្ចាស់ផ្ទះរងការខូចខាតរួមមាន៖
-ឆេះផ្ទះចំនួន១ខ្នងដែលទំហំ ៦ម៉ែត្រគុណនិង៨ម៉ែត្រ ធ្វើអំពីឈើ ដំបូលប្រកក្បឿង ជញ្ជាំងក្តាឈើ រៀបថ្មខាងក្រោម មានតរោង សំយ៉ាបមុខ ជាប់ និងផ្ទះរោងចិញ្ខឹមគោ មានប្រវែង៤ម៉ែត្រគុណនិង៦ម៉ែត្រ ឆេះ អស់ទាំងស្រុងតែម្តង។
- ឆេះមាសទម្ងន់២តំឡឹង ឆេះលុយខ្មែរចំនួន១,៣០០,០០០ម៉ឺនរៀល
- ប្លង់ដី ១១ប្លង់
- កាតគ្រី ឡាន១
-កាតគ្រី ម៉ូតូ៣ - អត្តសញ្ញាណប័ណ្ណ៧ សន្លឹក
- សំបុត្រកំណើត ៧ សន្លឹក
- ទូរទឹកកក ១គ្រឿង
- ធុងបាស់ ១គ្រឿង
- គ្រែ២ ពូក៣
- ទូខោអាវ ៤ តុ៤ កៅអីជ័រ១០
- ស្រូវ ២តោនផងដែរ ។
ចំពោះមូលហេតុដែលបណ្ដាលឲ្យឆេះផ្ទះខាងលើមកពីទុស្សេចរន្តភ្លើង ហើយ (ដោយសារតែម្ចាស់ផ្ទះមិននៅផ្ទះចេញទៅបុណ្យសពបងប្រុសបង្កើតនៅក្នុងភូមិជាមួយគ្នា ផ្ទះចាក់សោចោល) ។
សមត្ថកិច្ចខេត្តកំពង់ស្ពឺ បានបញ្ជាក់ឲ្យដឹងថា ៖ ពាក់ព័ន្ធករណីអគ្គីភ័យខាងលើ នេះរថយន្តពន្លត់អគ្គិភ័យយើងបានទៅដល់ ផ្ទះកើតហេតុ តែពុំបានជួយអន្តរាគមន៍ពន្លត់ឡើយ ដោយមូលហេតុទទួលព័ត៌មានយឺត(ផ្ទះឆេះអស់ទាំងស្រុង) ។ ហើយដោយឡែកករណីអគ្គិភ័យខាងលើនេះ មិនបណ្តាលឱ្យរងរបួសមនុស្សនោះទេ៕
ចែករំលែកព័តមាននេះ