រដ្ឋបាលស្រុកសូទ្រនិគម និងព្រះសង្ឃ រួមទាំងប្រជាពលរដ្ឋ នាំយកស្បៀងអាហារ ជូនវីរៈកងទ័ពជួរមុខ ក្នុងភូមិសាស្ត្រខេត្តឧត្តរមានជ័យ
- សៀមរាប
ខេត្តសៀមរាប ៖ ក្នុងស្មារតីសាមគ្គីជាតិខ្មែរតែមួយ និង ដើម្បីចូលរួមលើកទឹកចិត្តដល់កងកម្លាំងប្រដាប់អាវុធដែលកំពុងឈរជើងការពារទឹកដី តាមខ្សែបន្ទាត់ព្រំដែនកម្ពុជាថៃ។ ព្រះតេជៈគុណ សង្ឃបាលិតោ លន់ សំប៊ី ព្រះសុមហ៍អនុគណស្រុកសូទ្រនិគម ចៅអធិការ វត្តមុនធ្យាននៅរសៀលថ្ងៃទី១៥ ខែកក្កដា ឆ្នាំ២០២៦ បានរៀបចំស្បៀងអាហារ គ្រឿង ឧបភោគបរិភោគ និងសម្ភារៈប្រើប្រាស់ចាំបាច់ជាច្រើនមុខរួមជាមួយថវិកា ដែលបានមកពីរដ្ឋបាលស្រុកសូទ្រនិគម និង ពុទ្ធបរិស័ទ ទៅជូនដល់កងទ័ពនៅជួរមុខ ដែលឈរជើងការពារព្រំដែន ក្នុងភូមិសាស្ត្រនៃខេត្តឧត្តរមានជ័យ។
ដោយមានការនិមន្តចូលរួមពីព្រះមន្ត្រីសង្ឃស្រុក និងព្រះសង្ឃក្នុងក្រុងសៀមរាប និងពុទ្ធបរិស័ទជាច្រើនរូបទៀត។ ព្រះតេជៈគុណ លន់ សំប៊ី បានមានសង្ឃដីការថា សកម្មភាពមនុស្សធម៌ដ៏ថ្លៃថ្លានេះ ធ្វើឡើងក្រោមទឹកចិត្ត «សមរភូមិក្រោយ ជួយសមរភូមិមុខ» ដើម្បីជួយសម្រាលការលំបាក និងជាការដឹងគុណចំពោះវីរភាពរបស់កងទ័ព ដែលបានលះបង់កម្លាំងកាយចិត្ត ហាលខ្យល់ហាលភ្លៀង យាម ល្បាតការពារបូរណភាពទឹកដីយ៉ាងអង់អាចក្លាហាន។
ព្រះតេជគុណបានបន្តថា «ទោះបីព្រះសង្ឃគង់នៅវត្តអារាមក្នុងសមរភូមិក្រោយ ពិតមែន ប៉ុន្តែបេះដូង និង ស្មារតីរបស់ព្រះ សង្ឃ និងញាតិញោមពុទ្ធបរិស័ទ គឺតែងតែនៅជាប់ជាមួយបងប្អូន កងទ័ពជួរមុខជានិច្ច។ ការនាំយកទេយ្យទាន និងស្បៀងអាហារមកនាពេលនេះ គឺដើម្បីបង្ហាញថា កងទ័ពមិននៅឯកោឡើយ មាតុភូមិទាំងមូលនៅពីក្រោយខ្នងបងប្អូនជានិច្ច»។
ក្នុងនោះដែរ លោកស្រី ហេង ប៊ុនវុទ្ធី នាយករងរដ្ឋបាលស្រុកសូទ្រនិគម បានថ្លែងអំណរគុណដល់កងទ័ពដែលកំពុងឈរជើងការពារព្រំដែនកម្ពុជា-ថៃ និងបង្ហាញឱ្យឃើញពីការលះបង់ កម្លាំងកាយ ចិត្ត និងស្មារតីរបស់វីរៈងទ័ព ដែលឈរជើងនៅតាមខ្សែបន្ទាត់ព្រំដែន ទាំងយប់ទាំងថ្ងៃ ដោយមិនគិតពីការនឿយហត់។ លោកស្រី បន្តថា សាមគ្គីភាពរវាងសមរភូមិក្រោយ និងសមរភូមិមុខ៖ បង្ហាញពីការយកចិត្តទុកដាក់ និងការគាំទ្រផ្នែកស្មារតីយ៉ាងរឹងមាំពីសំណាក់អាជ្ញាធរមូលដ្ឋាន ផ្ញើជូនទៅដល់កងទ័ពដែលកំពុងបំពេញភារកិច្ចការពារបូរណភាពទឹកដី។
តំណាងកងទ័ពបានសម្តែងនូវសេចក្តីត្រេកអរ និងដឹងគុណយ៉ាងជ្រាលជ្រៅបំផុតចំពោះព្រះសង្ឃ និង ពុទ្ធបរិស័ទខេត្តសៀមរាប។ ទឹកចិត្ត និងសកម្មភាពដ៏ឧត្តុង្គឧត្តមនេះ មិនត្រឹមតែជាការជួយឧបត្ថម្ភផ្នែកស្បៀងអាហារប៉ុណ្ណោះទេ ប៉ុន្តែវាគឺជា «ឱសថផ្លូវចិត្ត» ដ៏មានឥទ្ធិពលបំផុត ដែលធ្វើឱ្យកងទ័ពកាន់តែមានកម្លាំងចិត្ត និង ស្មារតីរឹងមាំក្នុងការបំពេញភារកិច្ចការពារជាតិមាតុភូមិ ។
សូមបញ្ជាក់ថា ព្រឹត្តិការណ៍នេះ បានឆ្លុះបញ្ចាំងយ៉ាងច្បាស់ពីវប្បធម៌នៃការចែករំលែក ខ្មែរស្រឡាញ់ខ្មែរ និងសាមគ្គីភាពជាតិដ៏រឹងមាំរបស់ប្រជាជាតិខ្មែរ ដែលមិនថាស្ថិតក្នុងកាលៈទេសៈណាក៏ដោយ ពុទ្ធចក្រ និងអាណាចក្រ តែងតែដើរទន្ទឹមគ្នា និងគាំទ្រគ្នាទៅវិញទៅមក ដើម្បីបុព្វហេតុជាតិមាតុភូមិតែមួយ៕
ចែករំលែកព័តមាននេះ