រាជធានីភ្នំពេញ ៖ ប្រជាពលរដ្ឋដែលទៅបង់សំណាញ់តាមដងទន្លេបានប្រទះឃើញសពអណ្តែតទឹក នៅក្បែរមាត់ច្រាំងទន្លេបង្កការភ្ញាក់ផ្អើលក៏រាយការណ៍ជូនសមត្ថកិច្ចភ្លាមៗ កាលពីវេលាម៉ោង៨យប់ ថ្ងៃទី១៥ ខែកក្កដា ឆ្នាំ២០២៦ នៅច្រាំងទន្លេ ភូមិដើមគ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ។
ប្រភពព័ត៌មានពីបុរសនេសាទម្នាក់បានឲ្យដឹងថា មុនពេលកើតហេតុ គាត់បានចែវទូកទៅបង់សំណាញ់ត្រីដូចសព្វដង លុះមកដល់ចំណុចកើតហេតុ ពេលកំពុងបង់សំណាញ់ ស្រាប់តែឃើញមានសពមួយផុសចេញពីក្នុងទឹកអណ្តែតក្បែរគាត់តែម្តង ដោយភាពភ័យខ្លាច គាត់បានចែវទូកទៅមាត់ច្រាំង រួចប្រាប់អ្នកភូមិ និងរាយការណ៍ជូនសមត្ថកិច្ចភ្លាមៗតែម្តង ។
បន្ទាប់ពីទទួលដំណឹងនេះ សមត្ថកិច្ចជំនាញផ្នែកកោសល្យវិច្ឆ័យ បានចុះមកដល់ទីតាំងកើតហេតុ ធ្វើការត្រួតពិនិត្យសព ដោយសពមានសភាពហើមស្អុយ មានស្លៀកខោខូវប៊យជើងវែង និងអាវយឺតដៃវែង តែមិនដឹងថា ជនរងគ្រោះរូបនេះបានស្លាប់នៅពេលណានោះទេ ។
សមត្ថកិច្ចជំនាញផ្នែកកោសល្យវិច្ឆ័យបន្ទាប់ពីត្រួតពិនិត្យសពរួច យកទៅតម្កល់នៅវត្ត ព្រែកតាសេក រងចាំសាច់ញាតិមកយកទៅធ្វើបុណ្យតាមប្រពៃណី ៕
ចែករំលែកព័តមាននេះ