ក្រុមលួ.ចសម្ភារៈ និងឧបករណ៍ការពាររន្ទះតាមបង្គោលអង់តែន ពេលចាប់បាន សារភាពថា ធ្លាប់ធ្វើសកម្មភាពបែបនេះច្រើនដង
- កំពង់ស្ពឺ
ខេត្តកំពង់ស្ពឺ៖ ជនសង្ស័យចំនួន២នាក់ ត្រូវបានកម្លាំងនគរបាលស្រុកបសេដ្ឋធ្វើការឃាត់ខ្លួន ខណៈដែលក្រុមជនសង្ស័យធ្វើសកម្មភាព លួចសម្ភារៈតាមបង្គោលអង់តែន(សម្ភារៈការពាររន្ទះ) ហើយព្យាយាមរត់គេចខ្លួន ក៏ចំថ្ងៃស៊យត្រូវសមត្ថកិច្ចឃាត់។
ករណីចោរកម្មលួចសម្ភារៈនិងទ្រព្យសម្បត្តិតាមក្រុមហ៊ុនបង្គោលអង់តែនសេវ៉ាទូរស័ព្ទ(មិនបានសម្រេច) បានធ្វើឡើងកាលពីវេលាម៉ោង៦និង១០នាទីព្រលប់ថ្ងៃទី១៣ ខែកក្កដា ឆ្នាំ២០២៦ នៅចំណុចអង់តែនប្រព័ន្ធសេវ៉ាទូស័ព្ទដៃ ស្ថិតនៅក្នុងភូមិព្រៃស្រូល ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ ។
សមត្ថកិច្ចខេត្តកំពង់ស្ពឺបាននិយាយឱ្យដឹងថាជនសង្ស័យចំនួន២នាក់ បានធ្វើសកម្មភាពកាប់កកាយដីលួចយកខ្សែការពាររន្ទះ និងឧបករណ៍ផ្សេងៗក្នុងបរិវេនអង់តែនទូរស័ព្ទ ខណៈដែលជនសង្ស័យ កំពុងតែធ្វើសកម្មភាពលួចនោះ ក៏ត្រូវបានសមត្ថកិច្ចដេញចាប់ឃាត់ខ្លួនជនសង្ស័យចំនួន២នាក់រួមទាំងវត្ថុតាងនិង សម្ភារៈដែលបានធ្វើសកម្មភាពមួយចំនួន។
សមត្ថកិច្ចខេត្តកំពង់ស្ពឺបានបន្តឲ្យដឹងទៀតថាជនសង្ស័យ ដែលឃាត់ខ្លួនទី១-ឈ្មោះ ឈិន តាក់ ភេទប្រុស អាយុ៣៧ឆ្នាំមុខរបរមិនពិតប្រាកដ មានស្រុកកំណើតនៅក្នុងភូមិកងតាណឹង ឃុំកងតាណឹង ស្រុកកងមាស ខេត្តកំពង់ចាម និងទី២- ឈ្មោះ បូ សុខឃីម ភេទប្រុស អាយុ៣៣ឆ្នាំមុខរបរមិនពិតប្រាកដ មានស្រុកកំណើតនៅក្នុងភូមិស្វាយអន្ទរ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង។ ចំណែកបក្ខពួករបស់ពួកគេមួយចំនួនទៀតបានកំពុងរត់គេចខ្លួន។
ជនសង្ស័យទាំង២នាក់ខាងលើបានឆ្លើយសារភាពថា ខ្លួនពិតជាបានធ្វើសមកម្មភាពលួចទ្រព្យសម្បត្តិក្រុមហ៊ុនទូរស័ព្ទដៃនៅចំណុចបង្គោលអង់តែនប្រព័ន្ធទូរស័ព្ទពិតប្រាកដមែន ។
សមត្ថកិច្ចបានបញ្ជាក់ឲ្យដឹងទៀតថាក្រោយឃាត់ខ្លួនក្រុមជនសង្ស័យបានសារភាពបន្ថែមថាកន្លងទៅ ពួកខ្លួនធ្លាប់ធ្វើសកម្មភាពលួចទ្រព្យសម្បត្តិតាមង្គោលអង់តែនទូរស័ព្ទដៃ និងឧបករណ៍ផ្សេងៗជាច្រើនទៀតតាមបណ្តាស្រុកផ្សេងៗជាច្រើន ។
បច្ចុប្បន្នក្រុមជនសង្ស័យរួមជាមួយនឹងវត្ថុតាង នគរបាលបានកសាងសំណុំរឿងទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ