ខេត្តត្បូងឃ្មុំ ៖ គណៈបញ្ជាការឯកភាពខេត្តត្បូងឃ្មុំ ចុះរដ្ឋបាលចំហររកឃើញជនបរទេសស្នាក់នៅខុសច្បាប់ ២៤នាក់ នៅស្រុកពញាក្រែក ខេត្តត្បូងឃ្មុំ ។ នេះបើយោងតាមផេករដ្ឋបាលខេត្តត្បូងឃ្មុំបានប្រកាសនារសៀលថ្ងៃទី១៥ ខែកក្កដានេះ ។
ក្រោមការដឹកនាំ និងបញ្ជាផ្ទាល់ពី ឯកឧត្តម ប៉ែន កុសល្យ អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តត្បូងឃ្មុំ ដោយមានការសម្របសម្រួលផ្នែកច្បាប់ពីតំណាងអយ្យការអមសាលាដំបូងខេត្ត កម្លាំងសមត្ថកិច្ចចម្រុះបានបន្តយុទ្ធនាការចុះរដ្ឋបាលចំហរដូចភ្លៀងរលឹម ដើម្បីពង្រឹងសន្តិសុខ និងសណ្តាប់ធ្នាប់សង្គម ក្នុងភូមិសាស្ត្រខេត្តត្បូងឃ្មុំ ។
ក្នុងកិច្ចប្រតិបត្តិការ កាលពីថ្ងៃទី១៣ ខែកក្កដា ឆ្នាំ២០២៦ កម្លាំងជំនាញនៃស្នងការដ្ឋាននគរបាលខេត្តត្បូងឃ្មុំ សហការជាមួយកម្លាំងនាយកដ្ឋាននគរបាលព្រហ្មទណ្ឌ (ប្រចាំការខេត្តត្បូងឃ្មុំ) កម្លាំងជំនាញកងរាជអាវុធហត្ថខេត្ត និងអាជ្ញាធរមូលដ្ឋាន បានចុះត្រួតពិនិត្យរដ្ឋបាលចំហរនៅតាមផ្ទះវីឡា ផ្ទះសំណាក់ និងបន្ទប់ជួល ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក ចំនួន០៤ទីតាំង (មានសរុប ៦៩បន្ទប់) ។
ជាលទ្ធផល ក្នុងប្រតិបត្តិការចុះឆែកឆេរនេះ សមត្ថកិច្ចបានរកឃើញជនបរទេសចំនួន ២៤នាក់ (ក្នុងនោះមានស្រី០២នាក់) ស្នាក់នៅខុសច្បាប់ រួមនឹងសម្ភារពាក់ព័ន្ធផ្សេងៗមួយចំនួនធំ ។
បច្ចុប្បន្នជនបរទេសទាំង ២៤នាក់ រួមនឹងវត្ថុតាង ត្រូវបានបញ្ជូនទៅកាន់ស្នងការដ្ឋាននគរបាលខេត្តត្បូងឃ្មុំ ដើម្បីបន្តនីតិវិធីទៅតាមផ្លូវច្បាប់ ។
ជាមួយគ្នានេះ គណៈបញ្ជាការឯកភាពរដ្ឋបាលខេត្ត កំពុងបន្តយុទ្ធនាការស្រាវជ្រាវ ត្រួតពិនិត្យ និងស្វែងរកទីតាំងសង្ស័យនានា ដែលមានការលួចលាក់ប្រព្រឹត្តបទល្មើស ឬការរស់នៅប្រមូលផ្តុំខុសច្បាប់នៅទូទាំង ០៧ក្រុង-ស្រុក ក្នុងភូមិសាស្ត្រខេត្តត្បូងឃ្មុំ ព្រមទាំងបន្តផ្សព្វផ្សាយអនុក្រឹត្យលេខ០៣ របស់រាជរដ្ឋាភិបាលយ៉ាងសកម្មផងដែរ ៕
ចែករំលែកព័តមាននេះ