មន្ទីររ៉ែ និងថាមពលខេត្តបោះពោងកំណត់ទីតាំងបូមខ្សាច់ កុំឱ្យរំលោ.ភ
- ព្រៃវែង
ខេត្តព្រៃវែង ៖ នៅព្រឹកថ្ងៃទី 15 កក្កដា មន្ទីរ៉ែ និងថាមពលខេត្តព្រៃវែង បានចុះបោះពោងចំនួន 24 ពោង នៅក្នុងទន្លេមេគង្គ ក្នុងភូមិសាស្ត្រស្រុកពាមរក៍ ដើម្បីកំណត់ទីតាំងឱ្យក្រុមហ៊ុនចំនួន 2 ធ្វើការបូមខ្សាច់ ឱ្យស្របទៅនឹងអាជ្ញាប័ណ្ណរបស់ខ្លួន។
មន្ត្រីជំនាញមន្ទីររ៉ែ និងថាមពល ខេត្តព្រៃវែង បានឱ្យដឹងថា ពោងទាំងអស់មានចំនួន 24 ពោង ត្រូវបានបោះដើម្បីកំណត់ទីតាំងឲ្យក្រុមហ៊ុនចំនួន 2 នៅកន្លែងផ្សេងពីគ្នា។
ទីតាំងទី១ ស្ថិតនៅក្បែរកោះតាជោរ ក្នុងភូមិសាស្ត្រខេត្តកណ្ដាល ទល់មុខខេត្តព្រៃវែង ត្រង់ចំណុចភូមិថ្មី ឃុំពាមមានជ័យ ស្រុកពាមរក៍ ដែលជាដែនអាជ្ញាប័ណ្ណរបស់ក្រុមហ៊ុន ចតុមុខ។
ទីតាំងទី 2 ស្ថិតនៅចំណុចឃុំព្រែកខ្សាយ ( ក ) ស្រុកពាមរក៍ ខេត្តព្រៃវែង ជាដែនអាជ្ញាប័ណ្ណរបស់ក្រុមហ៊ុន ហ្គោប៊ល ហ្គ្រីន រីសសន៍។
លោក ឆៃ វិចិត្រ អនុប្រធានមន្ទីររ៉ែ និងថាមពលខេត្តព្រៃវែង បានបញ្ជាក់ថា ការបោះពោងកំណត់ទីតាំងបូមខ្សាច់នេះ គឺដើម្បីភាពងាយស្រួលសម្រាប់មន្ត្រីជំនាញ អាជ្ញាធរ ក៏ដូចជាប្រជាពលរដ្ឋ ក្នុងការត្រួតពិនិត្យ និងតាមដានពីសកម្មភាពបូមខ្សាច់របស់ក្រុមហ៊ុន និងការពារមិនឱ្យមានការប៉ះទង្គិច ជាមួយបងប្អូនប្រជានេសាទផងដែរ។ ជាមួយគ្នានោះដែរ មន្ត្រីជំនាញ បានដំឡើងទូកុងតឺន័រមួយគ្រឿង ដាក់នៅមាត់ទន្លេ ក្បែរសាលាបឋមសិក្សាភូមិថ្មី ធ្វើជាស្នាក់ការយាម១ សម្រាប់មន្ត្រីជំនាញ អាជ្ញាធរ និងប្រជាពលរដ្ឋចូលរួមតាមដានត្រួតពិនិត្យ សកម្មភាពបូមខ្សាច់របស់ក្រុមហ៊ុនផងដែរ ។
ព័ត៌មានបន្ថែមនឹងមានផ្សាយជូននៅលើទំព័រកាសែតកោះសន្តិភាព ៕
ចែករំលែកព័តមាននេះ