ទីក្រុងតេអេរ៉ង់៖ លោកដូណាល់ត្រាំប្រកាសបិទខ្ទប់ដែនសមុទ្ររបស់ប្រទេសអ៊ីរ៉ង់ដើម្បីមិនឱ្យកប៉ាល់នានាអាចបើកចេញ-ចូលកំពង់ផែរបស់ប្រទេសនេះបានឡើយ។ លោកថែមទាំងព្រមានវាយប្រហាររោងចក្រអគ្គិសនី និងស្ពានរបស់អ៊ីរ៉ង់ផងដែរនៅសប្ដាហ៍ក្រោយប្រសិនបើអ៊ីរ៉ង់មិនព្រមចូលតុចរចា។ បើដូច្នេះមែន មានន័យថាសង្គ្រាមនេះកាន់តែឡើងកម្ដៅបន្ថែមទៀត។ យោធាអាមេរិកក៏ចាប់ផ្ដើមវាយប្រហារជាថ្មីដើម្បីទប់ស្កាត់មិនឱ្យអ៊ីរ៉ង់មានសមត្ថភាពវាយប្រហារកប៉ាល់ដឹកទំនិញដែលបើកកាត់ច្រកសមុទ្រហ័រម៉ូស។ នេះបើយោងតាមការបង្ហើបឱ្យដឹងពីយោធាអាមេរិក។
រដ្ឋាភិបាលអ៊ីរ៉ង់ថ្លែងថាខ្លួនបានសម្រេចចិត្តបិទច្រកហ័រម៉ូសជាថ្មីបន្ទាប់ពីប្រទេសទាំង២មានអរិភាពនឹងគ្នាកាលពីសប្ដាហ៍មុន ជាហេតុធ្វើឱ្យបទឈប់បាញ់ដ៏ផុយស្រួយដែលសម្រេចបានកាលពីខែមិថុនានោះក្លាយជាអសារឥតការ។ លោកត្រាំថ្លែងនៅក្នុងបទសម្ភាសជាមួយទូរទស្សន៍ហ្វក់ថាលោកនឹងរក្សាទុកទីតាំងផលិតថាមពលចុងក្រោយគេ។ ប៉ុន្តែនៅទីបញ្ចប់ យើងនឹងវាយទីតាំងថាមពល។ នៅសប្ដាហ៍ក្រោយ យើងនឹងវាយរោងចក្រអគ្គិសនី, សប្ដាហ៍ក្រោយ យើងនឹងវាយប្រហារស្ពាន។ លើកលែងតែពួកគេចូលតុចរចាគ្នាដើម្បីដោះស្រាយបញ្ហា។
លោកត្រាំថ្លែងបន្តទៀតថាក្រុមអ្នកចរចាអាមេរិកបានទាក់ទងទៅសមភាគីអ៊ីរ៉ង់រួចហើយដើម្បីប្រាប់ពួកគេថាយកល្អពួកគេគួរតែចរចាគ្នាឱ្យចេញជាកិច្ចព្រមព្រៀង។ យោធាអ៊ីរ៉ង់ថ្លែងថាខ្លួនបានបញ្ជូនដ្រូនជាច្រើនគ្រឿងទៅវាយប្រហារមូលដ្ឋានរបស់យោធាអាមេរិកនៅប្រទេសហ្សកដង់។ ឆ្មាំបដិវត្តឥស្លាមថ្លែងថាគោលដៅរបស់ពួកគេគឺវាយប្រហារទីតាំងស្តុកទុកអាវុធយុទ្ធភ័ណ្ឌនៅប្រទេសបារ៉េន និងគូវែត។ យោធាគូវែតប្រកាសថាប្រព័ន្ធការពារដែនអាកាសរបស់ខ្លួនបានតាមប្រមាញ់ដ្រូនរបស់អ៊ីរ៉ង់។ ក្រោយមក មានហេតុការណ៍ឆេះដ៏ធំមួយ។ ប៉ុន្តែទីភ្នាក់ងារព័ត៌មានរបស់រដ្ឋផ្សាយថាភ្នាក់ងារអគ្គិភ័យបានពន្លត់ភ្លើងនោះឱ្យរលត់ទៅវិញអស់ហើយ។
ការវាយប្រហារគ្នាទៅវិញទៅមករយៈពេលប៉ុន្មានថ្ងៃចុងក្រោយនេះធ្វើឱ្យគេលែងសង្ឃឹមទៅលើបទឈប់បាញ់បណ្ដោះអាសន្ន ឬអនុស្សារណៈយោគយល់គ្នាដែលភាគីទាំង២បានចុះហត្ថលេខាកាលពីខែមុន។ មុនដំបូង គេសង្ឃឹមថាបទឈប់បាញ់នេះអាចនឹងនាំទៅដល់ការបិទបញ្ចប់សង្គ្រាមជាអចិន្ត្រៃយ៍។ សារព័ត៌មានអ៊ីរ៉ង់ផ្សាយថាមីស៊ីលរបស់អាមេរិកវាយប្រហារទីតាំងមួយកន្លែងនៅទីក្រុងបាន់ដា អាបាស់ (Bandar Abbas) ដែលស្ថិតនៅតាមបណ្ដោយច្រកហ័រម៉ូស។ ចំណែកទីភ្នាក់ងារព័ត៌មានអ៊ីរ៉ង់ IRNA ផ្សាយថាមីស៊ីលអាមេរិកវាយប្រហារតំបន់មួយក្បែរទីក្រុងស៊ីរីក (Sirik)។ អនុរដ្ឋមន្ត្រីការបរទេសអ៊ីរ៉ង់ថ្លែងថាប្រសិនបើអាមេរិកគិតថាគាបសង្កត់យើងអាចបង្ខំឱ្យយើងចូលតុចរចានោះមានន័យថាពួកគេពិតជាយល់ច្រឡំធំហើយ៕ប្រភព៖ Reuters
ចែករំលែកព័តមាននេះ