ប្រទេសអេមីរ៉ាតអារ៉ាប់រួម ៖ មហាសេដ្ឋីអេមីរ៉ាតអារ៉ាប់រួម លោក Khalaf Al Habtoor កាលពីពេលថ្មីៗនេះ បានប្រកាសផ្តល់កាដូរថយន្តដល់កីឡាករ និងក្រុមការងារទាំងអស់របស់ក្រុមបាល់ទាត់ជម្រើសជាតិអេហ្ស៊ីបក្នុងម្នាក់១គ្រឿង ចំពោះការបង្ហាញទម្រង់លេងដ៏ភ្ញាក់ផ្អើលនៅព្រឹត្តិការណ៍ World Cup ឆ្នាំ២០២៦ ដោយបាននាំមកនូវភាពសប្បាយរីករាយដល់បេះដូងរបស់ប្រជាជនអារ៉ាប់ទាំងអស់។ នេះបើតាមប្រភពពីកាសែត The National របស់អេមីរ៉ាតអារ៉ាប់រួមបានចេញផ្សាយ។
មហាសេដ្ឋីដែលជាស្ថាបនិក និងប្រធានក្រុមហ៊ុន Al Habtoor Group រូបនេះបញ្ជាក់ថា លោកចង់អបអរសាទរសមិទ្ធផលក្រុមអេហ្ស៊ីប ដែលបានធ្វើឱ្យប្រជាជនអារ៉ាប់រាប់លាននាក់រំភើបសប្បាយរីករាយយ៉ាងខ្លាំង។ សមិទ្ធផលនេះ ត្រូវការការសរសើរឱ្យបានទូលំទូលាយ ហើយជាកាតព្វកិច្ចរបស់អ្នកគ្រប់រូបក្នុងការអបអរសាទរប្រជាជនអារ៉ាប់ ដែលបានធ្វើឱ្យតំបន់នេះមានមោទនភាពលើឆាកអន្តរជាតិ ហើយក៏បានផ្តល់ជាមេរៀនអំពីការប្តេជ្ញាចិត្ត ការព្យាយាម និងស្មារតីប្រយុទ្ធដល់ប្រជាជនអារ៉ាប់គ្រប់រូប។ ដូច្នេះរថយន្តម៉ាក Mitsubishi ស៊េរីចុងក្រោយ នឹងត្រូវប្រគល់ជាកាដូដល់កីឡាករម្នាក់ៗក្នុងក្រុមអេហ្ស៊ីប រួមទាំងបុគ្គលិកបច្ចេកទេស រដ្ឋបាល និងវេជ្ជសាស្ត្រ។
តំណាងពីក្រុមហ៊ុន Al Habtoor Group បញ្ជាក់ប្រាប់ The National ថា រថយន្តប្រភេទ SUV ម៉ាក Mitsubishi Eclipse Cross ចំនួន ៥៩គ្រឿ ង នឹងត្រូវផ្តល់ជូនក្រុមអេហ្ស៊ីប ដោយតម្លៃលក់រាយនៅអេមីរ៉ាតអារ៉ាប់រួមប្រហែល ២៩ ០០០ ដុល្លារអាមេរិក ដែលធ្វើឱ្យតម្លៃសរុបជាង ១,៧លានដុល្លារ។ បច្ចុប្បន្នកំពុងតែត្រូវបានរៀបចំដឹកជញ្ជូនសម្រាប់យកទៅប្រគល់ជូនសមាជិកក្រុមអេហ្ស៊ីប។ ផែនការផ្តល់ជូនរថយន្តនេះក៏ត្រូវបានទាក់ទងទៅកាន់សមាគមបាល់ទាត់អេហ្ស៊ីបរួចរាល់ហើយដែរ។
អេហ្ស៊ីបបានឡើងដល់វគ្គ ១៦ ក្រុមចុងក្រោយព្រឹត្តិការណ៍ World Cup ឆ្នាំ២០២៦ និងជាលើកដំបូងរបស់ខ្លួន (ដោយសារការប្រកួតឆ្នាំ ១៩៣៤ គ្មានវគ្គចែកពូល) ទោះយ៉ាងក៏ដោយ ពួកគេបានធ្លាក់ត្រឹមវគ្គនេះ ក្រោមចាញ់ក្រុមការពារជើងឯកអាហ្សង់ទីននៅក្នុងលទ្ធផល ៣-២ កាលពីថ្ងៃទី៧ ខែកក្កដា កន្លងទៅ ខណៈដែលពួកគេបានបើកការនាំមុខដល់ទៅ២គ្រាប់មុនយ៉ាងភ្ញាក់ផ្អើល។
នៅមុននេះ ព្រះអង្គម្ចាស់ Sheikh Mohammed bin Rashid អនុប្រធានាធិបតី នាយករដ្ឋមន្ត្រី នៃប្រទេសអេមីរ៉ាតអារ៉ាប់រួម និងជាព្រះមហាក្សត្រគ្រប់គ្រងទីក្រុងឌូបៃ (Dubai) ក៏បានកោតសរសើរដល់ក្រុមជម្រើសជាតិអេហ្ស៊ីបផងដែរ បើទោះបីជាដំណើរប្រកួត World Cup ឆ្នាំ២០២៦ របស់ពួកគេបានបញ្ចប់ទៅដោយការខកចិត្តក៏ដោយ។
ដ្បិតមិនអាចនាំយកពានមកមាតុភូមិវិញក៏ពិតមែន ប៉ុន្តែក្រុមជម្រើសជាតិអេហ្ស៊ីបទទួលបានការស្វាគមន៍យ៉ាងកក់ក្តៅជាទីបំផុតប្រៀបដូចជាវីរៈបុរសជាតិ នៅពេលដេលពួកគេបានត្រឡប់ដល់ប្រទេសកំណើតវិញ កាលពីថ្ងៃទី១០ ខែកក្កដា កន្លងទៅ។ ស្របពេលដែលប្រធានាធិបតីអេហ្ស៊ីប លោក Abdel Fattah El Sisi ក៏បានផ្តល់រង្វាន់ជូនដល់កីឡាករ ព្រមទាំងក្រុមការងារទាំងអស់នូវគ្រឿងឥស្សរិយយសថ្នាក់ជាតិ «Order of Merit» ដើម្បីជាការទទួលស្គាល់ចំពោះសមិទ្ធផលដ៏ភ្ញាក់ផ្អើលរបស់ពួកគេផងដែរ៕
ចែករំលែកព័តមាននេះ