សហរដ្ឋអាមេរិក ៖ បារាំងនឹងត្រូវតទល់ជាមួយអេស្ប៉ាញ នៅវគ្គពាក់កណ្តាលផ្តាច់ព្រ័ត្រ ព្រឹត្តិការណ៍ World Cup ឆ្នាំ២០២៦។ ការប្រកួតនេះ នឹងត្រូវធ្វើឡើងនៅម៉ោង២ឈានចូលព្រឹកថ្ងៃទី១៥ ខែកក្កដា (ម៉ោងនៅកម្ពុជា) នៅឯកីឡដ្ឋាន AT&T សហរដ្ឋអាមេរិក។
ក្រុមមាន់គកបារាំងបានឡើងមកដល់វគ្គនេះ ក្រោយបានយកឈ្នះក្រុមខ្លាំងមកពីអាហ្វ្រិកម៉ារ៉ុក នៅក្នុងលទ្ធផល ២-០ វគ្គ៨ក្រុមចុងក្រោយ។ ចំណែកក្រុមគោជល់អេស្ប៉ាញបានទម្លាក់ក្រុមបិសាចក្រហមបែលហ្ស៊ិក ដោយលទ្ធផល ២-១។
ទោះយ៉ាងណាក៏ដោយ បារាំងត្រូវបានគេមើលឃើញថាមានប្រៀបជាងអេស្ប៉ាញ ដោយសារទម្រង់វាយសម្រុកដ៏ខ្លាំងក្លា។ ជាក់ស្តែង គិតត្រឹមថ្ងៃទី១២ ខែកក្កដា គេហទំព័រវិភាគបាល់ទាត់ដ៏ល្បី Opta ផ្តល់ឱកាសឈ្នះដល់បារាំង ៤២,១% ក្នុងម៉ោងប្រកួតផ្លូវការ (៩០នាទី) ខណៈឱកាសអេស្ប៉ាញ ៣១,៨%។ ជាមួយឱកាស ២៦,១% ដែលការប្រកួតនេះ នឹងឈានចូលដល់ម៉ោងបន្ថែម ១៥នាទី ២ដង។
បារាំងក្រោមការដឹកនាំរបស់លោក Didier Deschamps ចាប់ផ្តើមព្រឹត្តិការណ៍ World Cup ឆ្នាំ២០២៦ យ៉ាងល្អឥតខ្ចោះ ពោលឈ្នះទាំង ៦ ប្រកួត ស៊ុតបញ្ចូលលើគូប្រកួតសរុប ១៦គ្រាប់ និងរបូតតែ ២គ្រាប់ប៉ុណ្ណោះ។ បារាំងបង្ហាញទម្រង់លេងយ៉ាងខ្លាំងក្លា និងគ្រប់គ្រងការប្រកួតបានយ៉ាងល្អ ទាំងគ្រប់គ្រងបាល់ និងការវាយសម្រុកដ៏មានប្រសិទ្ធភាព។ ប្រធានក្រុម Kylian Mbappé គឺជាកូនសោដ៏សំខាន់ក្នុងតំបន់ប្រយុទ្ធ ដោយរកបាន ៨ គ្រាប់ ហើយគិតត្រឹមវគ្គ ៨ ក្រុម ដើម្បីប្រជែងស្បែកជើងមាស។
ភាពមិនអាចមើលរំលងបាននោះគឺ ទម្រង់លេងសហការគ្នាយ៉ាងល្អ បារាំងផ្តោតលើការដាក់សម្ពាធខ្ពស់លើគូប្រកួត និងបង្កើតឱកាសស៊ុតចំគោលដៅជាបន្តបន្ទាប់ តាមរយៈការបញ្ជូនបាល់ច្បាស់ពីខ្សែបម្រើ និងស្លាប ពិសេសការសហការដ៏ល្អរវាង Mbappé និង Ousmane Dembélé ជាដើម។ សរុបមក ក្រុមទាំងមូលមានតុល្យភាព ខ្លាំងទាំងការពារ និងការវាយសម្រុកលឿន ដែលធ្វើឱ្យគូប្រកួតពិបាកក្នុងការទប់ទល់។
ចំណែកអេស្ប៉ាញក្រោមការដឹកនាំរបស់លោក Luis de la Fuente ក៏ធ្វើបានល្អផងដែរ ពោលឈ្នះ ៥ និងស្មើ ១។ អេស្ប៉ាញនៅតែរក្សាប្រពៃណីជាមួយទម្រង់លេងគ្រប់គ្រងការប្រកួតទាំងស្រុង តាមរយៈការបញ្ជូនបាល់ខ្លីៗ និងរហ័ស គួបផ្សំនឹងប្រព័ន្ធការពារ និងការសង្គ្រោះបាល់ពីអ្នកចាំទីដៃស្អិត Unai Simon ធ្វើឱ្យពួកគេក្លាយជាក្រុមមានប្រព័ន្ធការពារដ៏រឹងមាំមួយ។
ការវាយសម្រុកតាមស្លាបប្រកបដ៏គ្រោះថ្នាក់ និងប្រសិទ្ធភាព ដឹកនាំដោយកីឡាករវ័យក្មេងដ៏ឆ្នើម Lamine Yamal និងកីឡាករសំខាន់ៗផ្សេងទៀត តែងតែបង្កើតការគំរាមកំហែងខ្លាំងលើខ្សែការពារគូប្រកួត។ ស្របពេលលោក Fuente ជារឿយៗតែងប្រើយុទ្ធសាស្ត្រប្តូរកីឡាករដូរចង្វាក់លេងលើទីលាន ដោយមានកីឡាករបម្រុងដូចជា Mikel Merino និង Ferran Torres ប្តូរចូល ដើម្បីបំបែកភាពទាល់ច្រកនៅចុងម៉ោង។
បារាំង និងអេស្ប៉ាញ គឺជាគូប្រជែងដែលស្គាល់គ្នាច្បាស់ណាស់ ហើយធ្លាប់ប្រឈមមុខគ្នាសរុប ៣៨ លើកមកហើយ តែអេស្ប៉ាញមានប្រៀបជាងក្នុងប្រវត្តិជួបគ្នា ដោយឈ្នះចំនួន ១៨ លើក ចំណែកបារាំងឈ្នះ ១៣ លើក ហើយ ៧ លើកទៀតបញ្ចប់ដោយលទ្ធផលស្មើគ្នា។ ជួបគ្នាចុងក្រោយ កាលពីជាង១ឆ្នាំមុន នៅក្នុងវគ្គពាក់កណ្តាលផ្តាច់ព្រ័ត្រ នៃព្រឹត្តិការណ៍ UEFA Nations League ឆ្នាំ ២០២៥ កាលនោះអេស្ប៉ាញយកឈ្នះបារាំង ៥-៤ ដោយកុមារទេព Lamine Yamal រកបាន២គ្រាប់ម្នាក់ឯង។ ក្រុមទាំងពីរធ្លាប់ជួបគ្នាតែម្តងគត់ នៅក្នុងព្រឹត្តិការណ៍ World Cup (មិនរាប់ការប្រកួតជម្រុះ) ដោយបារាំងឈ្នះក្នុងលទ្ធផល ៣-១ នៅវគ្គ ១៦ ក្រុម កាលពីឆ្នាំ ២០០៦។
សម្រាប់ព្រឹត្តិការណ៍ World Cup ឆ្នាំ២០២៦ បារាំង (១៩៩៨ និង ២០១៨) មកនៅក្នុងនាមក្រុមស្វែងរកជើងឯកជាលើកទី ៣ ដ្បិតអេស្ប៉ាញ (២០១០) ស្វែងការឈ្នះជាលើកទី២៕ ប្រភព ៖ Aljazeera និងប្រភពផ្សេងទៀត
ចែករំលែកព័តមាននេះ