ប្រទេសអាហ្វ្រិកខាងត្បូង ៖ កីឡាករបាល់ទាត់ជម្រើសជាតិអាហ្វ្រិកខាងត្បូង Jayden Adams ដែលទើបតែបានចូលរួមប្រកួតព្រឹត្តិការណ៍ World Cup ឆ្នាំ២០២៦ កន្លងទៅថ្មីៗនេះ បានទទួលមរណភាពនៅក្នុងវ័យ ២៥ឆ្នាំ ដែលបង្កការភ្ញាក់ផ្អើលយ៉ាងខ្លាំងដល់សហគមន៍បាល់ទាត់របស់ប្រទេសមួយនេះ។ នេះបើតាមប្រភពពី BBC បានចេញផ្សាយកាលពីថ្ងៃទី១១ ខែកក្កដា ឆ្នាំ២០២៦។
រដ្ឋមន្ត្រីក្រសួងកីឡា សិល្បៈ និងវប្បធម៌អាហ្វ្រិកខាងត្បូង លោក Gayton McKenzie បានបញ្ជាក់នៅក្នុងសេចក្តីថ្លែងការណ៍ ដោយបង្ហាញការភ្ញាក់ផ្អើលយ៉ាងខ្លាំង និងក្តុកក្តួលជាទីបំផុត ដែលលោកបានទទួលដំណឹងពីមរណភាពរបស់ Jayden Adams។ លោក បានបន្តថា បាល់ទាត់អាហ្វ្រិកខាងត្បូងបានបាត់បង់កីឡាករវ័យក្មេងទេពកោសល្យដ៏ភ្លឺស្វាងបំផុតម្នាក់ ហើយប្រទេសជាតិកំពុងកាន់ទុក្ខជាមួយក្រុមគ្រួសារ មិត្តរួមក្រុម និងអ្នកគាំទ្ររាប់លាននាក់ ដែលបានទស្សនាការរីកចម្រើនរបស់គេ តាំងពីជាកីឡាករវ័យក្មេងដ៏មានសក្តានុពល រហូតក្លាយជាកីឡាកររបស់ក្រុមឈុតអាហ្វ្រិកខាងត្បូង។
ព័ត៌មាននេះ ត្រូវបានបណ្តាញសារព័ត៌មានអាហ្វ្រិកខាងត្បូងចុះផ្សាយយ៉ាងទូលំទូលាយកាលពីថ្ងៃទី១១ ខែកក្កដា ហើយអ្នកតំណាងរបស់ Adams និងអាណាព្យាបាលរបស់គេ ក៏បានបញ្ជាក់ពីព័ត៌មានដ៏ក្រៀមក្រំនេះផងដែរ ប៉ុន្តែមូលហេតុការស្លាប់មិនទាន់ត្រូវបានប្រកាសជាផ្លូវការនៅឡើយទេ។ ក្លិប Mamelodi Sundowns FC ដែលកីឡាកររូបនេះកំពុងប្រកបអាជីព ក៏មិនទាន់បានចេញសេចក្តីថ្លែងការណ៍ផ្លូវការណាមួយឡើយ។ នៅពេលដែលប្រព័ន្ធផ្សព្វផ្សាយទាក់ទងទៅ ក្លិបបានស្នើសុំឱ្យគោរពឯកជនភាពគ្រួសាររបស់កីឡាកររូបនេះ អំឡុងពេលដ៏លំបាកមួយនេះ។
ប៉ូលិសនៅអាហ្វ្រិកខាងត្បូងបានអះអាងថា ពួកគេបានបើកការស៊ើបអង្កេតមួយ បន្ទាប់ពីសាកសពបុរសអាយុ ២៥ ឆ្នាំម្នាក់ ត្រូវបានប្រទះរកឃើញនៅផ្ទះមួយកន្លែងក្នុងតំបន់ Schotschekloof ដែលជាជាយក្រុងមួយនៅកណ្តាលទីក្រុងខេបថោន (Cape Town) កាលពីព្រឹកថ្ងៃទី១១ ខែកក្កដា កន្លងទៅ។
គួររំលឹកជូនថា Jayden Adams ទើបតែបានត្រឡប់មកពីការប្រកួតព្រឹត្តិការណ៍ World Cup ឆ្នាំ ២០២៦។ ខ្សែបម្រើឆ្នើមរូបនេះ បានលេងក្នុងជំនួបវគ្គចែកពូលទាំង៣ប្រកួត និង ២ ប្រកួតជាជម្រើស១១នាក់ដំបូង ដោយបានជួយអាហ្វ្រិកខាងត្បូងឱ្យឡើងដល់វគ្គ ៣២ ក្រុម។ ទោះយ៉ាងណាក៏ដោយ អាហ្វ្រិកខាងត្បូងបានធ្លាក់ចេញពីការប្រកួតក្នុងវគ្គនេះ បន្ទាប់ពីចាញ់ម្ចាស់ផ្ទះកាណាដា ដោយលទ្ធផល ១-០ កាលពីថ្ងៃទី២៨ ខែមិថុនា កន្លងទៅ ដោយ Adams មិនត្រូវបានដាក់ឱ្យលេងឡើយប្រកួតនោះ។
Adams បានចាប់ផ្តើមអាជីពនៅក្លិប Stellenbosch FC មុនផ្លាស់ទៅក្លិប Mamelodi Sundowns កាលពីខែមករា ឆ្នាំ២០២៥ ជាកន្លែងដែលរូបគេបានឈ្នះជើងឯកលីគ និងពានរង្វាន់ African Champions League។ កីឡាកររូបនេះជាផ្នែកមួយនៃក្រុមជម្រើសជាតិអាហ្វ្រិកខាងត្បូង ដែលបានឡើងដល់វគ្គពាក់កណ្តាលផ្តាច់ព្រ័ត្រពានរង្វាន់ Africa Cup of Nations ឆ្នាំ២០២៣ មុនត្រូវបានកោះហៅចូលក្រុមរបស់លោក Hugo Broos សម្រាប់ព្រឹត្តិការណ៍ World Cup ដែលក្នុងនោះក្រុមរបស់គ្រូបង្វឹកជនជាតិបែលហ្ស៊ិករូបនេះ បានបង្កើតប្រវត្តិសាស្ត្រដោយឡើងដល់វគ្គចាញ់ធ្លាក់ (Knockout) ព្រឹត្តិការណ៍ World Cup ជាលើកដំបូងបង្អស់៕
ចែករំលែកព័តមាននេះ