មន្ទីរព័ត៌មានខេត្តពោធិ៍សាត់ បន្តផ្សព្វផ្សាយយុទ្ធនាការ«និយាយថាទេចំពោះព័ត៌មានក្លែងក្លាយ» ដល់លោកគ្រូអ្នកគ្រូនិងសិស្សានុសិស្សនៅអនុនិងវិទ្យាល័យហ៊ុនសែនកណ្ដៀង
- ពោធិ៍សាត់
ខេត្តពោធិសាត់ ៖ នៅព្រឹកថ្ងៃទី១០ខែកក្កដាឆ្នាំ២០២៦ មន្ទីរព័ត៌មានខេត្តពោធិ៍សាត់ សហការជាមួយមន្ទីរអប់រំយុវជននិងកីឡាខេត្ត បានធ្វើពិធីផ្សព្វផ្សាយយុទ្ធនាការ(និយាយថាទេ ចំពោះព័ត៌មានក្លែងក្លាយ) ដល់សិស្សានុសិស្ស អនុនិងវិទ្យាល័យហ៊ុនសែនកណ្ដៀង សរុបប្រមាណជាង១០០០នាក់ ដែលក្នុងឱកាសនោះក៍មានការអញ្ជើញចូលរួមជាអធិបតី ពីលោក ណារ៉ា ចំរើន អភិបាលនៃគណៈអភិបាលស្រុកកណ្ដៀងផងដែរ។
ការរៀបចំយុទ្ធនាការ(និយាយថាទេចំពោះព័ត៌មានក្លែងក្លាយ)ជាលើកទី២នេះ ក្នុងគោលបំណង ដើម្បីឆ្លើយតបទៅនឹងការរីករាលដាលនៃព័ត៌មានមិនពិតនៅលើបណ្តាញសង្គម ដោយផ្តោតលើការអប់រំសិស្សានុសិស្ស ឱ្យយល់ដឹងពីផលប៉ះពាល់ដ៍ធ្ងន់ធ្ងរនៃព័ត៌មានក្លែងក្លាយ ព័ត៌មានមិនពិត មកលើសង្គមជាតិនិងបុគ្គល។ បណ្តុះបណ្តាលជំនាញឌីជីថល ក្នុងការផ្ទៀងផ្ទាត់ប្រភពព័ត៌មាន មុននឹងជឿឬចែករំលែក ។ បង្កើតបណ្តាញយុវជនស្រឡាញ់ការពិត ដើម្បីលុបបំបាត់ព័ត៌មានបំពុលក្នុងសហគមន៍។ ការរៀបចំយុទ្ធនាការនេះឡើង ចំពេលដែលសង្គមឌីជីថលកំពុងដើរតួនាទីយ៉ាងលឿន និងបានជម្រុញឱ្យគ្រប់គ្រឹះស្ថានសិក្សាទាំងអស់ក្នុងខេត្ត បន្តផ្សព្វផ្សាយសារនេះឱ្យបានទូលំទូលាយ។ យុទ្ធនាការនេះគឺត្រូវបានផ្ដួចផ្ដើមនិងដឹកនាំដោយឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងគោលដៅយុទ្ធសាស្ត្រ ដើម្បីលើកកម្ពស់សន្តិសុខព័ត៌មាន និងធានាការទទួលព័ត៌មានពិត ប្រកបដោយគុណភាពនិងសុវត្ថិភាព សម្រាប់ប្រជាពលរដ្ឋទូទៅ។
បន្ទាប់ពីមតិចូលរួមរបស់លោក សុខ មករា តំណាងមន្ទីរអប់រំយុវជននិងកីឡាខេត្ត និងលោក លាង ទិតដ្ឋាន ប្រធានមន្ទីរព័ត៌មានខេត្តរួចមក លោក ណារ៉ា ចំរើន អភិបាលនៃគណៈអភិបាលស្រុកកណ្ដៀង បានថ្លែងកោតសរសើរចំពោះក្រសួងនិងមន្ទីរព័ត៌មាន ដែលបានផ្ដួចផ្ដើមយុទ្ធនាការនេះឡើង ដោយផ្ដោតជាសំខាន់លើសិស្សវិទ្យាល័យ និងអនុវិទ្យាល័យនៅទូទាំងប្រទេស ក្នុងគោលបំណងលើកកម្ពស់ការយល់ដឹងរបស់សិស្សានុសិស្ស លើអក្ខរកម្មព័ត៌មាននិងប្រព័ន្ធផ្សព្វផ្សាយ ដើម្បីធានាបាននូវការទទួលព័ត៌មានពិត ត្រឹមត្រូវ និងការប្រើប្រាស់ប្រព័ន្ធផ្សព្វផ្សាយ ជាពិសេសបណ្ដាញទំនាក់ទំនងសង្គម ក្នុងការចែករំលែកនិងទទួលបានព័ត៌មានប្រកបដោយការទទួលខុសត្រូវខ្ពស់។
លោក ណារ៉ា ចំរើន បន្តទៀតថា ព័ត៌មានក្លែងក្លាយគឺជាអាវុធលាក់មុខនិងជាថ្នាំពុល ដែលអាចបំផ្លាញសណ្តាប់ធ្នាប់សង្គម និងសេចក្តីថ្លៃថ្នូររបស់បុគ្គលបានយ៉ាងងាយ។ ក្មួយៗជាទំពាំងស្នងឫស្សី និងជាអ្នកប្រើប្រាស់បណ្តាញសង្គមយ៉ាងសកម្ម ដូច្នេះត្រូវមាន”វិចារណញ្ញាណ” ខ្ពស់ មុននឹងចុច Share ត្រូវសួរខ្លួនឯងថា តើព័ត៌មាននេះពិតឬក្លែងក្លាយ? ចេញពីប្រភពណា? និងផ្តល់ផលប្រយោជន៍ដល់សង្គមដែរឬទេ? ។
ព័ត៌មានក្លែងក្លាយគឺជាបញ្ហាប្រឈមដ៍ធំមួយនៅក្នុងយុគសម័យឌីជីថល ដែលវាបានជះឥទ្ធិពលអវិជ្ជមានយ៉ាងខ្លាំង ដល់បុគ្គលម្នាក់ៗនិងសង្គមជាតិទាំងមូល។ បុគ្គលដែលជាជនរងគ្រោះនៃការវាយប្រហារដោយព័ត៌មានក្លែងក្លាយ ឬការមូលបង្កាច់ អាចត្រូវបាត់បង់ឱកាសការងារ ទំនាក់ទំនងក្នុងសង្គម និងការរើសអើងពីមនុស្សជុំវិញខ្លួន។ នៅពេលព័ត៌មានក្លែងក្លាយរីករាលដាលខ្លាំង វាធ្វើឲ្យសាធារណជនលែងមានទំនុកចិត្ត លើប្រភពព័ត៌មានផ្លូវការ ស្ថាប័នរដ្ឋ និងអ្នកសារព័ត៌មានអាជីព ដែលនាំឲ្យមានភាពវឹកវរក្នុងការគ្រប់គ្រងព័ត៌មាន។
លោកអភិបាលស្រុកកណ្ដៀងមានប្រសាសន៍ថា ព័ត៌មានក្លែងក្លាយ ជារឿយៗត្រូវបានគេប្រើប្រាស់ដើម្បីញុះញង់ បង្កើតការរើសអើងជាតិសាសន៍ សាសនា ឬនិន្នាការនយោបាយ ដែលធ្វើឲ្យមានការបែកបាក់សាមគ្គីភាព និងអាចឈានទៅដល់អំពើហឹង្សាទៀតផង។ ខណៈការទទួលនិងប្រើប្រាស់ព័ត៌មានប្រឈមនឹងហានិភ័យ និងគ្រោះថ្នាក់ដែលបង្កឡើងដោយព័ត៌មានក្លែងក្លាយ យុទ្ធនាការនេះត្រូវបានទទួលស្គាល់ថា បានដើរតួនាទីយ៉ាងសំខាន់ កាត់បន្ថយផលវិបាកអវិជ្ជមាន និងការពារប្រជាពលរដ្ឋពីគ្រោះថ្នាក់នានា ដែលបង្កឡើងដោយព័ត៌មានក្លែងបន្លំ ព័ត៌មានបំភ្លៃ និងព័ត៌មានដែលបង្កើតឡើងដោយបច្ចេកវិទ្យាសិប្បនិមិត្តAI។ ដើម្បីទប់ស្កាត់បញ្ហានេះ ទាំងបុគ្គលនិងសង្គម ត្រូវបង្កើនចំណេះដឹងផ្នែកប្រព័ន្ធផ្សព្វផ្សាយនិងឌីជីថល ដោយការផ្ទៀងផ្ទាត់ប្រភពព័ត៌មានឲ្យបានច្បាស់លាស់ មុននឹងជឿឬចែករំលែក ។
លោក ណារ៉ា ចំរើន សូមគាំទ្រយ៉ាងពេញទំហឹងចំពោះយុទ្ធនាការ(និយាយថាទេ ចំពោះព័ត៌មានក្លែងក្លាយ) និងបានផ្ដាំផ្ញើទៅកាន់ក្មួយៗសិស្សានុសិស្សទាំងអស់ ត្រូវប្រើប្រាស់បច្ចេកវិទ្យានិងបណ្ដាញទំនាក់ទំនងសង្គម ប្រកបដោយការយល់ដឹងនិងការទទួលខុសត្រូវខ្ពស់៕
ចែករំលែកព័តមាននេះ