សហរដ្ឋអាមេរិក ៖ បន្ទាប់ពីបានចាកចេញពីទីលានប្រកួតជាមួយថង់ទឹកកកស្អំលើកជើងខាងស្តាំ អំឡុងពេលការប្រកួតបារាំងយកឈ្នះលើម៉ារ៉ុកក្នុងលទ្ធផល ២-០ កាលពីវេលាឈានព្រឹកថ្ងៃទី១០ ខែកក្កដា (ម៉ោងនៅកម្ពុជា) នោះ កីឡាករ Kylian Mbappe បានធានាចំពោះអ្នកគាំទ្រអំពីស្ថានភាពរបួសរបស់ខ្លួនយ៉ាងច្បាស់ៗ។
បើទោះបីជាត្រូវចាកចេញពីទីលានមុនបញ្ចប់ការប្រកួត និងត្រូវបានគេឃើញមានថង់ទឹកកកស្អំកជើងក៏ដោយ ក៏ប្រធានក្រុមមាន់គកបារាំងវ័យ២៧ឆ្នាំរូបនេះបានអះអាងថា ស្ថានភាពមិនធ្ងន់ធ្ងរដូចអ្វីដែលអ្នកគាំទ្របានព្រួយបារម្ភដំបូងឡើយនោះទេ។ ជាកស្តែង ថ្លែងដោយផ្ទាល់ទៅកាន់ប្រព័ន្ធផ្សព្វផ្សាយ ខ្សែប្រយុទ្ធឆ្នើមក្លិប Real Madrid រូបនេះ បាននិយាយថា «ខ្ញុំមិនអីទេ។ កជើងខ្ញុំបានរងការប៉ះទង្គិចបន្តិចបន្តួច ប៉ុន្តែឥឡូវនេះគ្រប់យ៉ាងគឺមិនអីនោះទេ»។
លើសពីនេះទៀត ប្រធានក្រុមជម្រើសជាតិបារាំងរូបនេះ ក៏បានពន្យល់ផងដែរអំពីការសម្រេចចិត្តប្តូរចេញនៅចុងម៉ោងនៃការប្រកួត ដោយបានបញ្ជាក់ដូច្នេះថា «ខ្សែប្រយុទ្ធ Jean-Philippe Mateta គឺជាជម្រើសដ៏សមស្របជាង ដើម្បីរក្សាភាពខ្លាំងនៃការប្រកួតនៅក្នុងរយៈពេល ១៥ នាទីចុងក្រោយ ដោយសារតែកាយសម្បទាដ៏ល្អឥតខ្ចោះរបស់គេ»។ នៅពេលត្រូវបានសួរអំពីការប្រកួតវគ្គពាក់កណ្តាលផ្តាច់ព្រ័ត្រខាងមុខ ខ្សែប្រយុទ្ធពាក់អាវលេខ ១០ រូបនេះ បានលើកឡើងថា «ផ្លូវខាងមុខ គឺនៅវែងឆ្ងាយណាស់។ យើងយល់ថា ការប្រកួតប្រជែងខាងមុខនឹងពិបាកជាងអ្វីដែលក្រុមធ្លាប់បានជួបប្រទះពីមុនមក ប៉ុន្តែយើងបានត្រៀមខ្លួនរួចរាល់ហើយ»។
នៅក្នុងការប្រកួតវគ្គ ៨ ក្រុមចុងក្រោយ នៃព្រឹត្តិការណ៍ World Cup ឆ្នាំ២០២៦ ទល់នឹងម៉ារ៉ុក ទោះបីជាទាត់បាល់ប៉េណាល់ទីមិនចូលនៅនាទីទី ២៩ ក៏ពិតមែន ប៉ុន្តែ Mbappe នៅតែបង្ហាញភាពខ្លាំង តាមរយៈទម្រង់ប្រយុទ្ធដ៏មុតស្រួចជាមួយល្បឿនរត់ដ៏លឿនរបស់ខ្លួន ដើម្បីអាចបើកការនាំមុខមុនឱ្យបារាំងដោយការទាត់បញ្ចូលទីដ៏ស្អាតនៅនាទី ៦០។ មុនមិត្តរួមក្រុមរបស់គេ ខ្សែប្រយុទ្ធ Ousmane Dembele បន្ថែម១គ្រាប់ទៀត នៅនាទី ៦៦ ជួយក្រុមដែលដឹកនាំដោយលោកគ្រូបង្វឹក Didier Deschamps មួយនេះ បន្តឡើងទៅកាន់វគ្គពាក់កណ្តាលផ្តាច់។
គួរបញ្ជាក់ថា បច្ចុប្បន្ន Kylian Mbappe កំពុងឈរបណ្តោះអាសន្នជាកីឡាកររកគ្រាប់បាល់បានជាងគេនៅព្រឹត្តិការណ៍ World Cup ឆ្នាំ២០២៦ ពោល ៨ គ្រាប់ស្មើជាមួយនឹងប្រធានក្រុមជម្រើសជាតិអាហ្សង់ទីន Lionel Messi ដែលត្រៀមប្រកួតទល់នឹងស្វីស នៅម៉ោង៨ព្រឹកថ្ងៃទី១២ ខែកក្កដា ខាងមុខនេះ (ម៉ោងនៅកម្ពុជា)៕ ប្រភព ៖ The New York Times និង Znews
ចែករំលែកព័តមាននេះ