សហរដ្ឋអាមេរិក ៖ យោងតាមប្រភពពីទស្សនាវដ្តី Forbes របស់សហរដ្ឋអាមេរិក ក៏ដូចជាកាសែត The Sun របស់ចក្រភពអង់គ្លេស កាលពីថ្ងៃទី៨ ខែកក្កដា ឆ្នាំ២០២៦ បានរាយការណ៍ថា តម្លៃសំបុត្រទស្សនាការប្រកួតវគ្គ ៨ ក្រុមចុងក្រោយព្រឹត្តិការណ៍ World Cup ឆ្នាំ ២០២៦ បានធ្លាក់ចុះជិត ៦០% បន្ទាប់ពីក្រុមម្ចាស់ផ្ទះសហរដ្ឋអាមេរិក និងក្រុមព័រទុយហ្គាល់ ត្រូវបានធ្លាក់ចេញពីការប្រកួតត្រឹមវគ្គ ១៦ ក្រុមចុងក្រោយ។
តាមរបាយការណ៍ តម្លៃសំបុត្រ World Cup បានធ្លាក់ចុះយ៉ាងគំហុកនៅលើទីផ្សារលក់បន្ត (Secondary Market) បន្ទាប់ពីម្ចាស់ផ្ទះសហរដ្ឋអាមេរិកចាញ់បែលហ្ស៊ិកលទ្ធផល ៤-១ ហើយព័រទុយហ្គាល់ចាញ់អេស្ប៉ាញលទ្ធផល ១-០ នៅវគ្គ ១៦ ក្រុមចុងក្រោយ។ អ្នកវិភាគមើលឃើញថា World Cup ឆ្នាំ ២០២៦ ដែលជាការប្រកួតព្រឹត្តិការណ៍បាល់ទាត់ធំបំផុតលើពិភពលោកចុងក្រោយរបស់ខ្សែប្រយុទ្ធឆ្នើម Cristiano Ronaldo ធ្វើឱ្យការប្រកួតបាត់បង់ភាពទាក់ទាញមួយចំនួនសម្រាប់ការប្រកួតវគ្គ ៨ ក្រុមផងដែរ។
ជាក់ស្តែង យោងតាមគេហទំព័រ TickPick បានឱ្យដឹងថា តម្លៃសំបុត្រទាបបំផុត (Get-in Price) សម្រាប់វគ្គ ៨ ក្រុម ម៉ោង ២ ឈានចូលព្រឹកថ្ងៃទី១១ ខែកក្កដា (ម៉ោងនៅកម្ពុជា) រវាងអេស្ប៉ាញ និងបែលហ្ស៊ិក បានដាំក្បាលចុះយ៉ាងខ្លាំង ពោលបានធ្លាក់ចុះពី ២ ៩៥០ ដុល្លារ មកនៅត្រឹមជិត ១ ២០០ ដុល្លារ គិតត្រឹមរសៀលថ្ងៃទី៧ ខែកក្កដា ឆ្នាំ២០២៦។
ទោះយ៉ាងណាក៏ដោយ តម្លៃសំបុត្រសម្រាប់ការប្រកួតរវាងអេស្ប៉ាញ និងបែលហ្ស៊ិក មិនមែនជាតម្លៃសំបុត្រតែមួយគត់ដែលកំពុងធ្លាក់ថ្លៃនោះទេ។ បើតាមទិន្នន័យពីគេហទំព័រ SeatPick តម្លៃសំបុត្រទាបបំផុតសម្រាប់វគ្គ ៨ ក្រុមទាំងអស់ ព្រឹត្តិការណ៍ World Cup ឆ្នាំ២០២៦ បានធ្លាក់ចុះ ៣១,៥% នៅក្នុងរយៈពេល ២៤ ម៉ោងចុងក្រោយ និងធ្លាក់ចុះប្រហែល ៥០% នៅក្នុងរយៈពេល ៣ ថ្ងៃចុងក្រោយ។
ផ្អែកតាមគេហទំព័រ TickPick បានឱ្យដឹងថា ការប្រកួតនៅម៉ោង ៣ ឈានចូលព្រឹកថ្ងៃទី១០ ខែកក្កដា (ម៉ោងនៅកម្ពុជា) រវាងបារាំង និងម៉ារ៉ុក គឺជាការប្រកួតសំបុត្រមានតម្លៃថោកជាងគេបំផុតលើទីផ្សារលក់បន្ត។ គិតត្រឹមរសៀលថ្ងៃទី៨ ខែកក្កដា តម្លៃសំបុត្រការប្រកួតនៅទីក្រុង Foxborough រដ្ឋ Massachusetts នេះ គឺចាប់ផ្តើមពីតម្លៃ ១ ១១៧ ដុល្លារ។
យ៉ាងណាមិញ តាមគេហទំព័រ SeatPick បានរាយការណ៍ថា ចំនួនសំបុត្រមាននៅលើទីផ្សារលក់បន្ត បានកើនឡើងរហូតដល់ជិត ៥ ម៉ឺនសំបុត្រ ដែលជាការកើនឡើងខ្លាំងធៀបនឹងចំនួន ២៨ ២៨៥ សំបុត្រ កាលពីពេលព្រឹត្តិការណ៍ World Cup ឆ្នាំ ២០២៦ ទើបតែចាប់ផ្តើម។ ដ្បិតព្រឹត្តិការណ៍ World Cup ឆ្នាំ២០២៦ ស្ថិតក្នុងចំណោមព្រឹត្តិការណ៍ដែលសំបុត្រទស្សនាមានតម្លៃថ្លៃបំផុតនៅក្នុងប្រវត្តិសាស្ត្រ៕
ចែករំលែកព័តមាននេះ