ឆេះបន្ទប់ជួលជាន់ទី១ ផ្អើលសង្កាត់ផ្សារដើមថ្កូវ
- ភ្នំពេញ
រាជធានីភ្នំពេញ ៖ ឆេះបន្ទប់ជួលជាន់ទី១ក្នុងផ្ទះល្វែងមួយកន្លែងបង្កការភ្ញាក់ផ្អើលកាលពីវេលាម៉ោង១២អធ្រាត្រថ្ងៃទី៨ ខែកក្កដា ឆ្នាំ២០២៦ តាមផ្លូវលេខ១៣៥ កែង៤៩៦ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញផ្សែងហ៊ុយចេញពីជាន់ទី១ នៃផ្ទះល្វែងកើតហេតុខាងលើ បន្ទាប់មកក៏ក្លាយជាអណ្តាតភ្លើងឆាបឆេះខ្លាំងឡើងៗ ។
ពលរដ្ឋក្នុងភូមិឃើញដូចនេះ ក៏បាននាំគ្នារាយការណ៍ជូនសមត្ថកិច្ច ដើម្បីសុំការអន្តរាគមន៍ពីរថយន្តពន្លត់អគ្គិភ័យ ខណៈអ្នកផ្សេងទៀត នាំគ្នាជួយយកបំពង់ឧស្ម័នពន្លត់អគ្គិភ័យ ជួយពន្លត់ ។
បន្ទាប់ពីទទួលដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យ២គ្រឿង ចេញពីគោលដៅជិតបំផុតទៅអន្តរាគមន៍ភ្លាមៗផងដែរ ។
អគ្គិភ័យនេះត្រូវបានគ្រប់គ្រងទាំងស្រុង នៅយប់ថ្ងៃខែឆ្នាំដដែល ដោយប្រើប្រាស់រថយន្តពន្លត់អគ្គិភ័យចំនួន១គ្រឿង ។ ករណីនេះ មិនបង្កឲ្យមានមនុស្សរងរបួសធ្ងន់នោះទេ គ្រាន់តែខូចខាតទ្រព្យសម្បត្តិមួយចំនួន ។ ចំពោះមូលហេតុនៃការឆាបឆេះ មន្ត្រីជំនាញធ្វើការស្រាវជ្រាវជាបណ្តោះអាសន្នសិន ៕
ចែករំលែកព័តមាននេះ