ប្រទេសស៊ីរី ៖ ការផ្ទុះ២កើតមាននៅកណ្ដាលក្រុងដាម៉ាស់ កាលពីថ្ងៃទី៧ កក្កដា ពេលដែលប្រធានាធិបតីបារាំង លោកអេមម៉ានុយអែលម៉ាក្រុង កំពុងស្ថិតនៅទីនោះអំឡុងពេលទស្សនកិច្ចផ្លូវការមួយនៅស៊ីរី ។
គ្រាប់បែកច្នៃដាក់នៅក្បែរសណ្ឋាគារ FOUR SEAISONS កន្លែងដែលគណៈប្រតិភូប្រធានាធិបតីបារាំង ស្នាក់នាពេលយប់ បានផ្ទុះ បណ្ដាលឲ្យមនុស្ស១៨នាក់ រងរបួស ក្នុងនោះមានប៉ូលិស៤នាក់ ។ ទោះបីការវាយប្រហារនេះ នៅមិនទាន់មានការប្រកាសទទួលខុសត្រូវពីក្រុមណា តែបង្ហាញថា ការគំរាមកំហែងភេរវកម្ម នៅតែមានក្នុងប្រទេសស៊ីរី១ឆ្នាំកន្លះ ក្រោយការដួលរលំនៃរបបប្រធានាធិបតីលោកបាចាអាល់អាសាដ ។
ក្នុងសន្និសីទសារព័ត៌មានរួមមួយជាមួយលោកម៉ាក្រុង ប្រធានាធិបតីបណ្ដោះអាសន្នស៊ីរី លោកអាហ៍ម៉េដចារ៉ាអាថ្លែងថា ខ្ញុំជឿជាក់ដែលពួកឧក្រិដ្ឋជននឹងចាប់ខ្លួនបាននាពេលខាងមុខនេះ ។ ចំណែករដ្ឋមន្ត្រីមហាផ្ទៃស៊ីរីលោកអាណាស់ខាតតាបដែលទៅកាន់កន្លែងគ្រាប់បែកផ្ទុះថ្លែងថា អំពើភេរវកម្មដែលប្រព្រឹត្តនាពេលនេះ គឺក្នុងបំណងបំផ្លាញទស្សនកិច្ចរបស់ប្រធានាធិបតីបារាំង ។
ក៏ទោះបីការវាយប្រហារនេះពុំមានការប៉ះពាល់ ដល់ទស្សនកិច្ចរបស់លោកម៉ាក្រុងដែលជាមេដឹកនាំមហាអំណាចលោកខាងលិចដំបូងគេមួយរូបមកកាន់ស៊ីរីក្ដី តែវាជាការវាយបកមួយខាងសន្តិសុខសម្រាប់ប្រធានាធិបតីថ្មីស៊ីរី ។ ប្រធានាធិបតីរូបនោះខិតខំពន្យល់គេថា ស៊ីរីពេលនេះ មានសន្តិសុខល្អ និងមានស្ថេរភាពឡើងវិញ ដោយការប្រឈមបច្ចុប្បន្នគឺការអភិវឌ្ឍសេដ្ឋកិច្ច ដើម្បីទាក់ទាញការវិនិយោគរបស់បណ្ដាសហគ្រាសលោកខាងលិច។ ប៉ុន្តែការផ្ទុះ២នៅក្រុងដាម៉ាស់ បង្ហាញសញ្ញាផ្ទុយពីនេះដែលស៊ីរីមិនទាន់មានសន្តិសុខពេញលេញ និងស្ថេរភាពនៅឡើយ ៕
ចែករំលែកព័តមាននេះ