អន្តរជាតិ ៖ តម្លៃប្រេងឆៅអន្តរជាតិបានកើនឡើងដល់ជិត ៣% នៅថ្ងៃទី៨ ខែកក្កដា ឆ្នាំ២០២៦ បន្ទាប់ពីកងទ័ពសហរដ្ឋ អាមេរិកបានបើកការវាយប្រហារតាមផ្លូវអាកាសប្រឆាំងនឹងប្រទេសអ៊ីរ៉ង់ និងបានដាក់ទណ្ឌកម្មលើការលក់ប្រេងឆៅឡើងវិញ ដែលបង្កឱ្យមានការភ័យខ្លាចថា បទឈប់បាញ់ដ៏ផុយស្រួយរបស់ភាគីទាំងពីរ កំពុងតែរលាយសាបសូន្យ ហើយការផ្គត់ផ្គង់នៅមជ្ឈិមបូព៌ាអាចនឹងត្រូវរំខានជាថ្មីម្តងទៀត។ នេះបើតាមប្រភពពី Reuters បានចេញផ្សាយ។
ប្រេងឆៅ Brent ដែលជាស្តង់ដាអន្តរជាតិ បានកើនឡើង ២,១៥ ដុល្លារ ឬ ២,៩០% ដល់ ៧៦,៣១ ដុល្លារអាមេរិកក្នុង១បារ៉ែល ដោយគិតត្រឹមម៉ោង ១២ និង ៣០ នាទីថ្ងៃត្រង់ (ម៉ោងនៅកម្ពុជា)។ ចំណែកប្រេងឆៅ West Texas Intermediate (WTI) របស់សហរដ្ឋអាមេរិក បានកើនឡើង ២,០៦ ដុល្លារ ឬ ២,៩២% ដល់ ៧២,៥០ ដុល្លារក្នុង១បារ៉ែល។
កិច្ចសន្យាប្រេងទាំង ២ បានកើនឡើងប្រហែល ៣% កាលពីថ្ងៃទី៧ ខែកក្កដា កន្លងទៅ បន្ទាប់ពីសហរដ្ឋអាមេរិកបានលុបចោលអាជ្ញាប័ណ្ណទូទៅដែលអនុញ្ញាតឱ្យមានការលក់ប្រេងឆៅរបស់អ៊ីរ៉ង់ ក្រោយការវាយប្រហារដោយមីស៊ីលរបស់អ៊ីរ៉ង់លើកប៉ាល់ដឹកប្រេងពាណិជ្ជកម្ម ៣ គ្រឿងក្នុងច្រកសមុទ្រហ័រមូស (Hormuz)។
បញ្ជាការដ្ឋានកណ្តាលសហរដ្ឋអាមេរិក (CENTCOM) កាលពីថ្ងៃទី៧ ខែកក្កដា (ម៉ោងនៅសហរដ្ឋអាមេរិក) បានប្រកាសថា ការវាយប្រហារតាមអាកាសរបស់សហរដ្ឋអាមេរិក គឺជាការឆ្លើយតបទៅនឹងការវាយប្រហាររបស់អ៊ីរ៉ង់លើកប៉ាល់ពាណិជ្ជកម្ម ៣ ដែលកំពុងធ្វើដំណើរឆ្លងកាត់ច្រកសមុទ្រហ័រមូស។
ការវាយប្រហារទាំងនោះបានបង្កឱ្យមានក្តីបារម្ភជាថ្មី ជុំវិញចរាចរណ៍ឆ្លងកាត់ច្រកសមុទ្រហ័រមូស ដែលធ្លាប់បានដឹកប្រេងស្មើនឹងប្រហែល១ភាគ៥ នៃការផ្គត់ផ្គង់ថាមពលសកល មុនពេលសង្គ្រាមបានចាប់ផ្តើម កាលពីខែកុម្ភៈ។
អ៊ីរ៉ង់កំពុងអះអាងពីការគ្រប់គ្រងរបស់ខ្លួនលើច្រកសមុទ្រនេះ ហើយបានបញ្ជាឱ្យកប៉ាល់ទាំងឡាយប្រើប្រាស់ផ្លូវមួយដែលនៅជិតឆ្នេរសមុទ្ររបស់ខ្លួន ជំនួសឱ្យផ្លូវដែលនៅជិតប្រទេសអូម៉ង់ ដែលជាប្រទេសមានព្រំប្រទល់ជាប់នឹងផ្លូវទឹកនេះដែរ។ ទោះយ៉ាងណាក៏ដោយ សហរដ្ឋអាមេរិកបានទទូចថា ផ្លូវទឹកនេះ ត្រូវតែបើកចំហដោយសេរីសម្រាប់ទាំងអស់គ្នា ដូចកាលពីមុនពេលជម្លោះបានចាប់ផ្តើម៕
ចែករំលែកព័តមាននេះ