កាលពីថ្ងៃអាទិត្យ ភ្លៀងធ្លាក់យ៉ាងគំហុកបានចាប់ផ្តើមវាយប្រហារលើភូមិ Renhe ក្នុងខេត្ត Guangxi ភាគខាងត្បូងប្រទេសចិន ។ នេះបើយោងតាមការចុះផ្សាយរបស់ BBC News ។
ទោះបីជាអ្នកភូមិធ្លាប់ស៊ាំនឹងការធ្លាក់ភ្លៀងក៏ដោយ ប៉ុន្តែលើកនេះ ភ្លៀងមិនព្រមឈប់ទាល់តែសោះ ហើយកម្រិតទឹកបានកើនឡើងយ៉ាងគំហុក ។ ត្រឹមព្រឹកព្រលឹមថ្ងៃចន្ទ ទឹកបានឡើងដល់ជង្គង់ ហើយបន្តិចក្រោយមក វាបានលិចលង់ជាន់ទីមួយនៃផ្ទះរបស់ពួកគេទាំងស្រុង។
ស្ត្រីអ្នកភូមិម្នាក់ឈ្មោះ Zhou បានប្រាប់សារព័ត៌មាន BBC ថា៖ «ទឹកជំនន់បានកើតឡើងលឿនពេក ទឹកហូរខ្លាំងណាស់ រហូតធ្វើឱ្យអ្នកភូមិមិនមានពេល សូម្បីតែប្រមូលអាហារតាមខ្លួននៅពេលរត់គេចខ្លួន»។គ្រួសាររបស់លោកស្រី Zhou ស្ថិតក្នុងចំណោមមនុស្សរាប់ម៉ឺននាក់ក្នុងខេត្ត Guangxi ដែលត្រូវបានជម្លៀសចេញពីផ្ទះសម្បែង ចាប់តាំងពីព្យុះទីហ្វុង Maysak បានបោកបក់មកលើតំបន់នេះកាលពីចុងសប្តាហ៍ ។ ព្យុះនេះ បានធ្វើឱ្យទឹកទន្លេហក់ឡើងខ្លាំង និងបាក់ទំនប់ បណ្តាលឱ្យមនុស្សយ៉ាងហោចណាស់៤នាក់ស្លាប់នៅទីនោះ។
ព្យុះទីហ្វុងនេះ បានជន់លិចទីក្រុងណាននីង និងភូមិឋានជុំវិញ ធ្វើឱ្យប្រជាជនត្រូវឡើងទៅលើដំបូលផ្ទះដើម្បីស្រែករកជំនួយ ។ បន្ថែមពីនេះ វាបានបង្កជាព្យុះ ផ្គរ រន្ទះ និងខ្យល់កន្ត្រាក់នៅខេត្តហ៊ូប៉ីភាគកណ្តាល ដែលមានចម្ងាយរាប់រយគីឡូម៉ែត្រពីទីនោះ។
យោងតាមប្រព័ន្ធផ្សព្វផ្សាយរដ្ឋ គ្រោះធម្មជាតិនេះបានសម្លាប់មនុស្សសរុបយ៉ាងហោចណាស់១៧នាក់ របួសរាប់រយនាក់ និងរាប់ម៉ឺននាក់ផ្សេងទៀតត្រូវជម្លៀសខ្លួន ។ ការបំផ្លិចបំផ្លាញយ៉ាងធ្ងន់ធ្ងរនេះ បានជំរុញឱ្យប្រធានាធិបតី ស៊ី ជីនពីង ចេញបញ្ជាឱ្យប្រើប្រាស់កម្លាំងសរុបក្នុងប្រតិបត្តិការជួយសង្គ្រោះ និងផ្តល់ជំនួយជាបន្ទាន់ ។
ព្យុះទីហ្វុងដែលបង្កឱ្យមានទឹកជំនន់រីករាលដាលបែបនេះ គឺជារឿងធម្មតានៅក្នុងប្រទេសចិន ក្នុងអំឡុងពេលនេះនៃឆ្នាំ ប៉ុន្តែ Maysak គឺជាព្យុះដំបូងគេបង្អស់ ដែលបានបោកបក់ចូលប្រទេសនេះសម្រាប់រដូវកាលឆ្នាំ២០២៦ ។ប្រព័ន្ធផ្សព្វផ្សាយរដ្ឋបានបញ្ជាក់ថា ព្យុះនេះមានលក្ខណៈពិសេសត្រង់ «ការកើតឡើងភ្លាមៗ និងមានខ្យល់បក់ខ្លាំងក្នុងរយៈពេលខ្លី»។
យោងតាមការទស្សន៍ទាយអាកាសធាតុ ព្យុះទីហ្វុងមួយទៀតឈ្មោះថា «បាវី» (Bavi) កំពុងតែបោកបក់ឆ្លងកាត់មហាសមុទ្រប៉ាស៊ីហ្វិក ហើយនឹងមកដល់ឆ្នេរសមុទ្រភាគខាងកើតនៃប្រទេសចិន នៅចុងសប្តាហ៍នេះ។ អាជ្ញាធរនៅក្រុងណាននីងបានព្រមានថា «ភ្លៀងធ្លាក់ខ្លាំង» បន្តបន្ទាប់ទៀត អាចនឹងរារាំងដល់កិច្ចខិតខំប្រឹងប្រែងជួយសង្គ្រោះ។
អាកាសធាតុដ៏អាក្រក់ និងធ្ងន់ធ្ងរទាំងនេះ ដែលអ្នកជំនាញភ្ជាប់ទៅនឹងការប្រែប្រួលអាកាសធាតុសកល កំពុងគំរាមកំហែងកាន់តែខ្លាំងឡើងដល់អាយុជីវិតប្រជាជន និងសេដ្ឋកិច្ចរបស់ប្រទេសចិន ជាពិសេស គឺវិស័យកសិកម្មដែលមានតម្លៃរាប់ពាន់ពាន់លានដុល្លារ ។
ចែករំលែកព័តមាននេះ