សង្គ្រាមអ៉ីរ៉ង់ ៖ កងទ័ពអាមេរិក កាលពីថ្ងៃទី៧ កក្កដា បានវាយប្រហារខ្លាំងក្លាមួយចំនួនប្រឆាំងអ៉ីរ៉ង់ ជាការឆ្លើយតបចំពោះការវាយប្រហាររបស់អ៉ីរ៉ង់លើនាវាពាណិជ្ជកម្ម៣គ្រឿង ដែលបើកឆ្លងកាត់ច្រកសមុទ្រហ័រមូស ។ នេះបើតាមសេចក្ដីរាយការណ៍របស់ទីបញ្ជាការដ្ឋានកណ្ដាលកងទ័ពអាមេរិកនៅមជ្ឈឹមបូព៌ាតាមបណ្ដាញសង្គមX ។
ទីបញ្ជាការដ្ឋាននោះបន្តថា ការឈ្លានពានរបស់អ៉ីរ៉ង់ពិតជាគ្រោះថ្នាក់ ហើយជាការរំលោភបំពានជាក់ស្ដែងលើបទឈប់បាញ់គ្នា។ យើងចង់ឲ្យអ៉ីរ៉ង់បង់តម្លៃខ្ពស់ ។ ចំណែកទីភ្នាក់ងារសន្តិសុខសមុទ្រអង់គ្លេសUKMTO រាយការណ៍ថា រយៈពេល២៤ម៉ោងចុងក្រោយនេះ នាវា៣គ្រឿងរងការវាយប្រហារ ហើយប្រទេសកាតា និងអារ៉ាប៊ីសាអូឌីតបានទម្លាក់ការទទួលខុសត្រូវលើអ៉ីរ៉ង់ ចំពោះការវាយប្រហារ២ ក្នុងចំណោមការវាយប្រហារលើនាវាទាំង៣គ្រឿងនោះ ក៏ទោះបីមានបទឈប់បាញ់គ្នារវាងក្រុងតេហេរ៉ង់ និងក្រុងវ៉ាស៊ីនតោនក្ដី ។
ទន្ទឹមនឹងការវាយប្រហារថ្មីនេះ អាមេរិកក៏ដាក់ទណ្ឌកម្មពាណិជ្ចកម្ម លើប្រេងអ៉ីរ៉ង់ឡើងវិញដោយអះអាងថា បែបនេះជាការឆ្លើយតបចំពោះបណ្ដាសកម្មភាពដែលមិនអាចទទួលយកបានទាំងស្រុង របស់អ៉ីរ៉ង់ក្នុងច្រកសមុទ្រហ័រមូស ។ បណ្ដាសារ
ព័ត៌មានអ៉ីរ៉ង់អះអាងពីការផ្ទុះមួយចំនួន ។ ការផ្ទុះ៦កើតមានលើកោះQESHM អ៉ីរ៉ង់ ការផ្ទុះ៧នៅទីក្រុងស៊ីរិកហើយការផ្ទុះដទៃៗទៀតកើតមាននៅទីក្រុងកំពង់ផែធំបានដាអាប់បាស់ ។ ក្រសួងការបរទេសអ៉ីរ៉ង់ក្នុងសេចក្ដីប្រកាសមួយថ្លែងថា អ៉ីរ៉ង់បានព្រមានខ្លាំងលើបណ្ដាផលវិបាកនៃការរំលោភបំពានលើកិច្ចព្រមព្រៀង ពីសំណាក់អាមេរិក ហើយនឹងចាត់បណ្ដាវិធានការម៉ឺងម៉ាត់នានា ដើម្បីការពារផលប្រយោជន៍ និងសន្តិសុខជាតិរបស់ខ្លួន។
អាមេរិកនិងអ៉ីរ៉ង់បានចុះហត្ថលេខា កាលពីថ្ងៃទី១៧ មិថុនា លើពិធីសារនៃកិច្ចព្រមព្រៀងមួយដើម្បីបញ្ចប់សង្គ្រាម ។ កិច្ចព្រមព្រៀងនោះគ្រោងជាពិសេស ការបើកឡើងវិញច្រកសមុទ្រហ័រមូស ព្រមទាំងការលុបចោលបណ្ដាទណ្ឌកម្មអាមេរិកលើការនាំចេញប្រេងរបស់អ៉ីរ៉ង់ ។
អារ៉ាប៊ីសាអូឌីតបានថ្កោលទោសការវាយប្រហាររបស់អ៉ីរ៉ង់លើនាវាដឹកប្រេងរបស់ខ្លួនឈ្មោះ WEDYAN ព្រមទាំងនាវាដឹកមេតានកាតាឈ្មោះAL RAKAYYAT ដោយបរិហារថា នោះជាអំពើធ្វើឲ្យប៉ះពាល់ដល់សន្តិសុខ នៃការធ្វើនាវាចរណ៍អន្តរជាតិនិងសន្តិសុខនៃការផ្គត់ផ្គង់ថាមពលពិភពលោក ។ មុននេះ ប្រទេសកាតាប្រកាសថា បានកោះហៅភារធារីអ៉ីរ៉ង់ ដើម្បីតវ៉ាប្រឆាំងការវាយប្រហារនាវាដឹកមេតានរបស់ខ្លួន និងទាមទារឲ្យមានការពន្យល់លើការវាយប្រហារនេះ ។ ក្នុងការវាយប្រហារនាវាទាំង៣គ្រឿងនោះពុំមានអ្នករបួសឬការខូចខាតប៉ះពាល់ដល់បរិស្ថានឡើយ ៕
ចែករំលែកព័តមាននេះ