សហរដ្ឋអាមេរិក ៖ យោងតាមប្រភពពីសារព័ត៌មានអេស្ប៉ាញ AS បានរាយការណ៍ថា សហព័ន្ធបាល់ទាត់អេហ្ស៊ីបបានដាក់ពាក្យប្តឹងឱ្យមានការស៊ើបអង្កេតលើការសម្រេចចិត្តរបស់លោកអាជ្ញាកណ្តាល កាត់សេចក្តីការប្រកួតដែលក្រុមជម្រើសជាតិឈុតធំរបស់ខ្លួន បរាជ័យក្រោមថ្វីក្រុមការពារតំណែងជើងឯកអាហ្សង់ទីន ដោយលទ្ធផល ៣-២ នៅក្នុងវគ្គ ១៦ ក្រុមចុងក្រោយ ព្រឹត្តិការណ៍ World Cup ឆ្នាំ ២០២៦ ដែលបញ្ចប់ទៅកាលពីវេលារំលងអធ្រាត្រឈានចូលថ្ងៃទី៨ ខែកក្កដា ឆ្នាំ២០២៦ (ម៉ោងនៅកម្ពុជា)។
ប្រធានសហព័ន្ធបាល់ទាត់អេហ្ស៊ីប លោក Hany Abo Rida បានដាក់ពាក្យបណ្តឹងតវ៉ាជាផ្លូវការមួយ ប្រឆាំងនឹងអាជ្ញាកណ្តាលជនជាតិបារាំង លោក Francois Letexier និងក្រុមជំនួយការរបស់លោក។ ភាគីអេហ្ស៊ីបអះអាងថា ការសម្រេចចិត្តជាបន្តបន្ទាប់របស់ក្រុមអាជ្ញាកណ្តាល បានជះឥទ្ធិពលផ្ទាល់ដល់លទ្ធផលនៃការប្រកួត និងរួមចំណែកធ្វើឱ្យ អេហ្ស៊ីបធ្លាក់ចេញពី World Cup ឆ្នាំ២០២៦។
ក្រៅអំពីការទាមទារឱ្យសហព័ន្ធកីឡាបាល់ទាត់ពិភពលោក (FIFA) ពន្យល់ពីស្ថានភាពចម្រូងចម្រាសទាំងនោះ សហព័ន្ធអេហ្ស៊ីប ក៏បានស្នើឱ្យស្ថាប័នក្បាលម៉ាស៊ីនបាល់ទាត់ពិភពលោកមួយនេះ បើកការស៊ើបអង្កេតលើការសម្រេចចិត្តរបស់ក្រុមអាជ្ញាកណ្តាល និងអាចឈានទៅដល់ការដកក្រុមអាជ្ញាកណ្តាលរបស់លោក Letexier មិនឱ្យកាត់សេចក្តីការប្រកួតនៅសេសសល់នៃព្រឹត្តិការណ៍ World Cup 2026 ប្រសិនបើរកឃើញថាមានកំហុសឆ្គងធ្ងន់ធ្ងរមែននោះ។ យោងតាមទស្សនៈភាគីអេហ្ស៊ីប លោក Letexier និងក្រុមការងាររបស់លោក បានដើរតួនាទីយ៉ាងសំខាន់ក្នុងការកាត់សេចក្តីឱ្យអាហ្សង់ទីនទទួលបានជ័យជម្នះ។
ភាពចម្រូងចម្រាសនេះ បានកើតឡើងក្នុងម៉ោងបន្ថែមវគ្គទី២ ពោលមុនពេលកីឡាករ Enzo Fernandez ស៊ុតបញ្ចូលទីគ្រាប់ជ័យជម្នះ ដើម្បីជួយឱ្យអាហ្សង់ទីនឈ្នះដោយលទ្ធផល ៣-២។ អេហ្ស៊ីបបានវែកញែកថា ពួកគេគប្បីទទួលបានបាល់ពិន័យ១១ម៉ែត្រ បន្ទាប់ពីខ្សែបម្រើអាហ្សង់ទីន Alexis Mac Allister បានទាញអាវខ្សែបម្រើអេហ្ស៊ីប Hamdi Fathi ហើយខ្សែប្រយុទ្ធអាហ្សង់ទីន Julian Alvarez បានប៉ះទង្គិចគ្នាជាមួយប្រធានក្រុមអេហ្ស៊ីប Mohamed Salah ក្នុងតំបន់គ្រោះថ្នាក់ផងដែរ។ ទោះយ៉ាងណាក៏ដោយ លោកអាជ្ញាកណ្តាល Letexier មិនបានផ្លុំកញ្ចែទេ ហើយក្រុមការងារ VAR ក៏មិនបានស្នើសុំឱ្យមានការពិនិត្យឡើងវិញដែរ។ ភ្លាមៗបន្ទាប់មក អាហ្សង់ទីនក៏បានវាយបកយ៉ាងលឿន ហើយស៊ុតបញ្ចូលទីគ្រាប់បាល់ជ័យជម្នះ ដែលធ្វើផ្ទុះប្រតិកម្មយ៉ាងខ្លាំងក្លាពីសំណាក់កីឡាករអេហ្ស៊ីបតែម្តង។
ក្រោយបញ្ចប់ការប្រកួត សមាជិកជាច្រើននាក់នៃក្រុមជម្រើសជាតិអេហ្ស៊ីបបានរិះគន់ការកាត់សេចក្តីជាដដែលៗ ដោយអះអាងថា ការសម្រេចចិត្តទាំងនេះបានកែប្រែលទ្ធផលនៃការប្រកួតទាំងស្រុង។ វានៅមិនទាន់ច្បាស់នៅឡើយទេថា តើ FIFA នឹងយល់ព្រមបើកការស៊ើបអង្កេត ឬចាត់វិធានការវិន័យលើក្រុមអាជ្ញាកណ្តាលនេះ ឬយ៉ាងណានោះទេ? ប៉ុន្តែជំហរដាច់ណាត់របស់អេហ្ស៊ីប ត្រូវបានរំពឹងថានឹងដុតបញ្ឆេះការខ្វែងគំនិតគ្នានេះសាជាថ្មី ជុំវិញរឿងរ៉ាវអាជ្ញាកណ្តាលក្នុងព្រឹត្តិការណ៍ World Cup ឆ្នាំ ២០២៦ នៅថ្ងៃខាងមុខនេះ។
ភាពចម្រូងចម្រាសនេះ បានកើតឡើងបន្ទាប់ពីមានពាក្យបណ្តឹងជាច្រើនផ្សេងទៀតពាក់ព័ន្ធនឹងការកាត់សេចក្តីរបស់អាជ្ញាកណ្តាលក្នុងព្រឹត្តិការណ៍ World Cup ឆ្នាំ២០២៦។ ជាក់ស្តែងក្នុងរយៈពេលប៉ុន្មានថ្ងៃថ្មីៗនេះ សហព័ន្ធបាល់ទាត់បែលហ្ស៊ិក និងសហព័ន្ធទ្វីបអឺរ៉ុប (UEFA) បានសម្តែងការព្រួយបារម្ភចំពោះការសម្រេចចិត្តរបស់អាជ្ញាកណ្តាល។ ក្រុមអ្នករិះគន់ច្រើនឡើងៗក៏បានវែកញែកថា ស្តង់ដាររួមនៃការកាត់សេចក្តីនៅក្នុងព្រឹត្តិការណ៍ World Cup ឆ្នាំ ២០២៦ បានក្លាយជាបញ្ហាមួយដ៏គួរឱ្យព្រួយបារម្ភ។
ក្រឡេកទៅកាន់ការប្រកួតដ៏ជក់ចិត្តវិញ អេហ្ស៊ីបបានបើកការនាំមុខមុន២គ្រាប់ ប៉ុន្តែបានចាញ់ ក្រោយក្រុមអាហ្សង់ទីនវាយបក៣គ្រាប់យ៉ាងភ្ញាក់ផ្អើល ដើម្បីបញ្ចប់ក្នុងលទ្ធផល ៣-២។ ជ័យជម្ននេះ អាហ្សង់ទីន ត្រូវបន្តឡើងទៅតទល់ជាមួយស្វីស នៅវគ្គ ៨ ក្រុមចុងក្រោយ នៅម៉ោង ៨ ព្រឹកថ្ងៃទី១២ ខែកក្កដា (ម៉ោងនៅកម្ពុជា)។ ដ្បិតស្វីសបានយកឈ្នះកូឡុំប៊ីនៅវគ្គ ១៦ ក្រុមទាំងលំបាក ដោយការទាត់បាល់បេណាល់ទីកាត់សេចក្តី ដោយលទ្ធផល ៤-៣ ក្រោយបញ្ចប់១២០នាទី គ្មានគ្រាប់ស៊ុតបញ្ចូលទីគ្នា។
កាលវិភាគប្រកួតវគ្គ ៨ ក្រុមចុងក្រោយ World Cup ឆ្នាំ២០២៦ (ម៉ោងនៅកម្ពុជា) ៖
-បារាំង ប៉ះ ម៉ារ៉ុក ម៉ោង ៣ ឈានចូលព្រឹកថ្ងៃទី១០ ខែកក្កដា
-អេស្ប៉ាញ ប៉ះ បែលហ្ស៊ិក ម៉ោង ២ ឈានចូលព្រឹកថ្ងៃទី១១ ខែកក្កដា
-ន័រវែស ប៉ះ អង់គ្លេស ម៉ោង ៤ ឈានចូលព្រឹកថ្ងៃទី១២ ខែកក្កដា
-អាហ្សង់ទីន ប៉ះ ស្វីស ម៉ោង ៨ ព្រឹកថ្ងៃទី១២ ខែកក្កដា៕ ប្រភព ៖ AS, Znews និងប្រភពផ្សេងទៀត
ចែករំលែកព័តមាននេះ