ទីក្រុងតេអេរ៉ង់៖ ថ្ងៃនេះ កប៉ាល់២គ្រឿងរងការវាយប្រហារនៅច្រកសមុទ្រហ័រម៉ូស ខណៈដែលអ៊ីរ៉ង់ប្រកាសជាចំហតែម្ដងថាខ្លួននឹងមិនព្រមចូលតុចរចាជាបន្តទៀតដើម្បីឱ្យមានកិច្ចព្រមព្រៀងសន្តិភាពទេលុះត្រាតែលោកដូណាល់ត្រាំបញ្ឈប់រាល់ការគំរាមកំហែងទាំងឡាយដែលចង់ផ្ទុះសង្គ្រាមសាជាថ្មី។ នៅពេលនេះ អ៊ីរ៉ង់ចាប់ផ្ដើមផ្ទុះកំហឹងជាថ្មីនឹងអាមេរិកនៅពេលខ្លួនរៀបចំពិធីគោរពវិញ្ញាណក្ខន្ធរបស់អតីតមេដឹកនាំកំពូល អាលី ខាមេនី។ ម្ចាស់កប៉ាល់របស់ប្រទេសកាតាឈ្មោះអាល់ រេកាយ៉ាត (Al Rekayyat) រាយការណ៍ថាកប៉ាល់របស់ខ្លួនរងការវាយប្រហារកាលពីយប់មិញ បណ្ដាលឱ្យឆេះម៉ាស៊ីន។
ប្រភពពីភ្នាក់ងារសន្តិសុខលំហសមុទ្របានឱ្យដឹងថាកប៉ាល់មួយគ្រឿងរបស់ប្រទេសអារ៉ាប៊ីសាអូឌីតក៏រងការវាយប្រហារផងដែរ។ អ្នកបើកកប៉ាល់អាល់ រេកាយ៉ាតប្រកាសតាមវិទ្យុទាក់ទងថា «នេះជាថ្ងៃអាសន្នធំហើយ។ នេះជាកប៉ាល់ដឹកហ្គាស ឈ្មោះអាល់ រេកាយ៉ាត។ ដ្រូនមួយគ្រឿងវាយប្រហារមកលើយើង ត្រូវចំម៉ាស៊ីនកប៉ាល់ បណ្ដាលឱ្យឆេះ និងបញ្ចេញផ្សែងហុយទ្រលោមទៅលើអាកាស។ យើងមិនទាន់ប៉ាន់ស្មានដឹងអំពីទំហំនៃការខូចខាតនៅឡើយទេ»។ កាពីទែនរូបនេះថ្លែងបន្តទៀតថានាវឹកនៅលើកប៉ាល់មានសុវត្ថិភាពទាំងអស់គ្នា។ ប៉ុន្តែកប៉ាល់នោះលែងដំណើរការតទៅទៀតដោយសារគ្មានម៉ាស៊ីន និងគ្មានប្រព័ន្ធដៃចង្កូត។ គាត់បានស្នើសុំឱ្យកប៉ាល់ដែលបើកនៅក្បែរៗនោះជួយយកអាសាកប៉ាល់របស់គាត់ផង។
ពាក់ព័ន្ធនឹងការវាយប្រហារទាំង២ករណីនេះ គ្មានក្រុមណាមួយប្រកាសថាជាស្នាដៃរបស់ខ្លួននៅឡើយទេ ហើយទាំងទីក្រុងវ៉ាស៊ីនតោន និងតេអេរ៉ង់ក៏មិនបានធ្វើអត្ថាធិប្បាយអ្វីទាំងអស់ទៅលើរឿងនេះ។ ប៉ុន្តែគេហទំព័រអេកសឺស (Axios) ចុះផ្សាយថាអ៊ីរ៉ង់បាញ់កប៉ាល់ទាំង២នោះ។ ហេតុការណ៍ទាំងនេះជាការរំលឹកថាបញ្ហានៅច្រកសមុទ្រហ័រម៉ូស និងតំបន់ឈូងសមុទ្រពែក្សមិនទាន់បានដោះស្រាយឱ្យបានជ្រះស្រឡះនៅឡើយទេទោះបីសង្គ្រាមអ៊ីរ៉ង់បានកើតឡើងរយៈពេលជាង៤ខែទៅហើយក្ដី។ កាលពីខែមិថុនា ភាគីទាំង២យល់ព្រមផ្អាកប្រយុទ្ធគ្នា និងចុះកិច្ចព្រមព្រៀងសន្តិភាពបណ្ដោះអាសន្ន។ ពួកគេមានពេល៦០ថ្ងៃដើម្បីចរចាគ្នាឱ្យមានកិច្ចព្រមព្រៀងសន្តិភាពជាអចិន្ត្រៃយ៍។
កាលពីសប្ដាហ៍មុន ភាគីទាំង២បានចរចាគ្នាដោយប្រយោលនៅប្រទេសកាតា ប៉ុន្តែគ្មានលទ្ធផលគួរឱ្យកត់សម្គាល់ឡើយ។ លោកត្រាំគំរាមកំហែងជាញឹកញាប់ថាបើគ្មានកិច្ចព្រមព្រៀងទេ លោកនឹងបញ្ជាឱ្យវាយប្រហារអ៊ីរ៉ង់សាជាថ្មី។ លោកថាយើងអាចនឹងសម្រេចបានកិច្ចព្រមព្រៀង ឬយើងនឹងបន្តយុទ្ធនាការរហូតដល់ចប់សព្វគ្រប់, យើងអាចវាយកម្ទេចស្ពានរបស់ពួកគេទាំងអស់ត្រឹមតែរយៈពេលមួយម៉ោងប៉ុណ្ណោះ ហើយយើងក៏អាចវាយកម្ទេចខ្សែសង្វាក់ផ្គត់ផ្គង់ថាមពលរបស់ពួកគេផងដែរ។ ឆ្លើយតបនឹងបញ្ហានេះ រដ្ឋមន្ត្រីការបរទេសអ៊ីរ៉ង់ថ្លែងថាយោងតាមលក្ខខណ្ឌនៃបទឈប់បាញ់ ភាគីទាំង២មិនអាចចរចាគ្នាបានឡើយប្រសិនបើភាគីម្ខាងនៅតែបន្តការគំរាមកំហែងភាគីម្ខាងទៀត។ លោកបានបង្ហោះសារនៅលើបណ្ដាញអ៊ិចដើម្បីរំលឹកអាមេរិកថា «ចូរអ្នកអនុវត្តដូចអ្វីដែលបានសន្យានៅក្នុងកិច្ចព្រមព្រៀង»៕ ប្រភព៖ Reuters
ចែករំលែកព័តមាននេះ