នាយករដ្ឋមន្ត្រីថៃ លោក អានុទីន ព្រមានបិទចោលឧស្សាហកម្មកញ្ឆា ក្រោយផ្ទុះករណីរត់ពន្ធកញ្ឆាថៃរាប់តោនផ្ទួនៗទៅកាន់ទីផ្សារអន្តរជាតិ ប៉ុន្តែត្រូវមហាជនជុំវិញពិភពលោកចំអកវិញថា ថៃគ្មានផ្លូវហ៊ានបិទបានឡើយ ព្រោះកញ្ឆាបានក្លាយជាឆ្នាំងបាយនៃវិស័យទេសចរណ៍ និងសេដ្ឋកិច្ចថៃទៅហើយ!
បាងកក ៖ ការព្រមានរបស់នាយករដ្ឋមន្ត្រីថៃ លោក អានុទីន ចាន់វីរ៉ាគុល ថាអាចឈានទៅដល់ការបិទឧស្សាហកម្មកញ្ឆា ប្រសិនបើការរត់ពន្ធកញ្ឆាពីថៃ ទៅកាន់បរទេសនៅតែបន្តកើនឡើង មិនត្រឹមតែធ្វើឱ្យប្រព័ន្ធផ្សព្វផ្សាយអន្តរជាតិចាប់អារម្មណ៍ប៉ុណ្ណោះទេ ប៉ុន្តែថែមទាំងបានបង្កឱ្យផ្ទុះការជជែកវែកញែកយ៉ាងក្តៅគគុក នៅលើបណ្ដាញសង្គម ដោយអ្នកប្រើប្រាស់ជុំវិញពិភពលោក បានសម្រុកចូលមកខមិនរិះគន់ និងប្រើពាក្យធ្ងន់ៗដូចជា «Drugland, Cannabis Land» និងដែនដីគ្រឿងញៀន» ដើម្បីចំអកចំពោះស្ថានការណ៍នាពេលបច្ចុប្បន្ន ។
បើតាមការចុះផ្សាយរបស់ South China Morning Post លោក អានុទីន បានថ្លែងថា រដ្ឋាភិបាលថៃ ត្រូវរកវិធីទប់ស្កាត់កុំឱ្យប្រទេសដទៃ បន្តចាត់ទុកថៃថា ជាមជ្ឈមណ្ឌលនៃបណ្តាញរត់ពន្ធកញ្ឆាអន្តរជាតិ ។ ការលើកឡើងនេះធ្វើឡើង បន្ទាប់ពីមានករណីរឹបអូសកញ្ឆាបរិមាណទ្រង់ទ្រាយធំៗជាបន្តបន្ទាប់ នៅក្រៅប្រទេស ដែលអាជ្ញាធរនៃប្រទេសទាំងនោះអះអាងថា មានប្រភពពីប្រទេសថៃ ។
ជាក់ស្តែងថ្មីៗនេះ អាជ្ញាធរឥណ្ឌូណេស៊ី បានរឹបអូសផ្កាកញ្ឆាស្ងួត (Cannabis Buds) ជាង៣.៣៧ តោន និងឃាត់ខ្លួនមនុស្ស១២នាក់ ខណៈអាជ្ញាធរប៉ូឡូញ ក៏បានរឹបអូសកញ្ឆាជិត១.២ តោន ដែលត្រូវបានលាក់បាំងក្នុងទំនិញដឹកចេញពីប្រទេសថៃ ឆ្លងកាត់កំពង់ផែអាល្លឺម៉ង់ ។
ករណីទាំងនេះ បានបង្កើនសម្ពាធយ៉ាងខ្លាំងលើរដ្ឋាភិបាលថៃ ឱ្យពិចារណារឹតបន្តឹងគោលនយោបាយកញ្ឆា ដែលត្រូវបានធ្វើឱ្យស្របច្បាប់តាំងពីឆ្នាំ២០២២ ។ ទោះជាយ៉ាងណា ប្រតិកម្មនៅលើបណ្ដាញសង្គមវិញ ហាក់មិនស្របនឹងការព្រមានរបស់លោក អានុទីន ឡើយ ។
ជំនួសឱ្យការទទួលបានការគាំទ្រ មហាជនអន្តរជាតិ បែរជាសម្រុកចូលទៅដេញដោល និងចង្អុលមុខចំៗថា រដ្ឋាភិបាលថៃខ្លួនឯងជាអ្នក «បង្កើតបិសាចនេះឡើង» ។ មតិភាគច្រើនបានលើកឡើងថា ៖ «អ្នកដែលធ្វើឱ្យកញ្ឆាស្របច្បាប់ ថ្ងៃនេះបែរជាចង់បិទវាវិញ» ខណៈអ្នកខ្លះចំអកថា នេះជាការដោះស្រាយបញ្ហាដែលខ្លួនឯងជាអ្នកបង្ក និងដូចជាការយក «ដាវចាក់ខ្លួនឯង» យ៉ាងអញ្ចឹង ។ ការរត់ពន្ធឆ្លងទ្វីបនេះ ត្រូវបានគេរិះគន់ថា ជារឿងដែលអាចទាយដឹងតាំងពីថ្ងៃដំបូង នៃការដោះលែងកញ្ឆាឱ្យប្រើប្រាស់ដោយសេរីមកម្ល៉េះ ។
លើសពីនេះ មហាជនជុំវិញពិភពលោកបានបង្ហាញការមិនជឿជាក់ទាល់តែសោះថា រដ្ឋាភិបាលថៃនឹងហ៊ានបិទឧស្សាហកម្មកញ្ឆានេះពិតប្រាកដ ។ ពួកគេបានអះអាងស្របគ្នាថា បច្ចុប្បន្នកញ្ឆាបានក្លាយជា «ឆ្នាំងបាយ» នៃវិស័យទេសចរណ៍ និងអាជីវកម្ម ដែលបង្កើតចំណូលយ៉ាងមហាសាលទៅហើយ បើសិនជាបិទចោល នោះមនុស្សរាប់ពាន់នាក់នឹងត្រូវបាត់បង់ការងារ សេដ្ឋកិច្ចទេសចរណ៍នឹងដុនដាប ហើយសូម្បីតែមន្ត្រីពុករលួយ និងប៉ូលិសថៃមួយចំនួន ដែលធ្លាប់តែកើបលុយពីអាជីវកម្មនេះក៏ត្រូវដាច់លាភសក្ការៈដូចគ្នា ។
អ្នកលេងបណ្តាញសង្គមមួយចំនួនថែមទាំងបានវាយប្រហារធ្ងន់ៗថា ថៃជាប្រទេសដែលមិនដែលទទួលស្គាល់កំហុសសកម្មភាពខ្លួនឯង តែងតែបង្វែរសាច់រឿង និងទម្លាក់កំហុសឱ្យអ្នកដទៃ ទាំងដែលខ្លួនឯងបានប្រែក្លាយជាមជ្ឈមណ្ឌលចែកចាយគ្រឿងញៀនអន្តរជាតិទៅហើយ ។ មិនតែប៉ុណ្ណោះ មតិមួយចំនួនបានប្រើពាក្យធ្ងន់ៗចំៗ ដោយហៅថៃថា «Cannabis Land», «Drugland» ។
គួរបញ្ជាក់ថា រហូតមកដល់ពេលនេះ រដ្ឋាភិបាលថៃមិនទាន់ប្រកាសសម្រេចបិទឧស្សាហកម្មកញ្ឆាជាផ្លូវការនៅឡើយទេ ។
អ្វីដែលលោក អានុទីន បានលើកឡើង គឺគ្រាន់តែជាការព្រមានថា វិធានការដាច់ណាត់បែបនេះអាចនឹងត្រូវយកមកពិចារណា ប្រសិនបើការរត់ពន្ធកញ្ឆាទៅកាន់ទីផ្សារអន្តរជាតិ នៅតែបន្តធ្វើឱ្យកេរ្តិ៍ឈ្មោះ និងសន្តិសុខរបស់ប្រទេសថៃរងផលប៉ះពាល់ធ្ងន់ធ្ងរជាងនេះ៕
ចែករំលែកព័តមាននេះ