ទីក្រុងប្រាយ៉ា ៖ ក្រុមបាល់ទាត់ជម្រើសជាតិកាប់វែរ ទទួលបានការស្វាគមន៍យ៉ាងកក់ក្តៅជាទីបំផុតដូចជាវីរជនពីសំណាក់ប្រជាជនរាប់ពាន់នាក់ នៅពេលពួកគេបានត្រឡប់មកដល់ប្រទេសកំណើតវិញ កាលពីថ្ងៃទី៥ ខែកក្កដា ឆ្នាំ២០២៦ (ម៉ោងក្នុងស្រុក) បន្ទាប់ពីបញ្ចប់យុទ្ធនាការដ៏អស្ចារ្យនៅក្នុងព្រឹត្តិការណ៍ World Cup ឆ្នាំ២០២៦ ដោយការចាញ់ក្រុមការពារតំណែងជើងឯកអាហ្សង់ទីន លទ្ធផល ៣-២ វគ្គ ៣២ ក្រុមចុងក្រោយ កាលពីព្រឹកថ្ងៃទី៤ ខែកក្កដា កន្លងទៅ។
យោងតាមប្រភពពីទីភ្នាក់ងារសារព័ត៌មាន Reuters កាលពីថ្ងៃទី៦ ខែកក្កដា ឆ្នាំ២០២៦ បានរាយការណ៍ថា អ្នកគាំទ្ររាប់រយនាក់ដែលគ្រវីទង់ជាតិប្រទេសកាប់វែរ បានរង់ចាំនៅព្រលានយន្តហោះដើម្បីទទួលស្វាគមន៍ក្រុមបាល់ទាត់ជម្រើសជាតិរបស់ពួកគេ ហើយនៅពេលយន្តហោះក្រុមចុះចតនៅក្នុងទីក្រុងប្រាយ៉ា គេសង្កេតហ្វូងមនុស្សជាច្រើនផ្សេងទៀតបានតម្រង់ជួរគ្នាតាមដងផ្លូវ ខណៈពេលដែលក្រុមបានធ្វើដំណើរទៅឆ្នេរកេប្រា កាណេឡា (Quebra Canela) តាមរថយន្តដឹកទំនិញបើកដំបូល សម្រាប់ការប្រារព្ធពិធីវិលត្រឡប់មកមាតុភូមិវិញ។
ដ្បិតនៅថ្ងៃទី៥ ខែកក្កដា ឆ្នាំ២០២៦ គឺជាថ្ងៃខួបលើកទី៥១ នៃទិវាបុណ្យឯករាជ្យជាតិរបស់ប្រទេសកាប់វែរ ដោយបានញ៉ាំងបរិយាកាសឱ្យកាន់តែដ៏រីករាយបន្ថែមទៀត ខណៈដែលក្រុមរហស្សនាម «ឆ្លាមខៀវ» និងគ្រូបង្វឹកដ៏មានប្រជាប្រិយភាពគឺលោក Bubista បានច្រៀងរាំតាមតន្ត្រីដ៏រំភើបនៅលើឆាកចំពីមុខផ្លាកសញ្ញាសរសេរថា «Obrigado! Cabo Verde» ឬ «អរគុណ! កាប់វែរ»។
ជាប្រជុំកោះភ្នំភ្លើងនៅក្នុងមហាសមុទ្រអាត្លង់ទិក ភាគខាងលិចនៃទ្វីបអាហ្វ្រិក ដែលមានប្រជាជនជាង ៥០ ម៉ឺននាក់ ប្រទេសកាប់វែរ បង្ហាញខ្លួនជាលើកដំបូងបង្អស់នៅក្នុងការប្រកួតជុំផ្តាច់ព្រ័ត្រ ព្រឹត្តិការណ៍ World Cup ឆ្នាំ២០២៦។ បើទោះជាក្រុមចំណូលថ្មី តែពួកគេបានធ្វើឱ្យពិភពបាល់ទាត់ភ្ញាក់ផ្អើលយ៉ាងខ្លាំង ដោយទប់ស្មើអតីតម្ចាស់ជើងឯកទាំង ២ អេស្ប៉ាញ និងអ៊ុយរ៉ូហ្គាយក្នុងការប្រកួតវគ្គចែកពូល ហើយបានក្លាយជាប្រទេសមានប្រជាជនតិចបំផុត ដែលបានឡើងដល់វគ្គជម្រុះនៃព្រឹត្តិការណ៍ World Cup។
លើសពីនេះទៅទៀត ពួកគេបានឆក់យកបេះដូងអ្នកគាំទ្របាល់ទាត់នៅជុំវិញពិភពលោក ជាមួយការបង្ហាញភាពតស៊ូដោយគ្មានការភ័យខ្លាចទល់នឹងក្រុមការពារតំណែងជើងឯកអាហ្សង់ទីន និងធ្វើឱ្យគូប្រកួតយកឈ្នះពួកគេទាំងលំបាកខ្លាំងនៅក្នុងម៉ោងបន្ថែម ១៥ នាទី ២ ដង ថែមទៀតផង៕
ចែករំលែកព័តមាននេះ