រាជរដ្ឋាភិបាលចាត់ទុកផ្លូវ គឺជាសរសៃឈាមនៃសេដ្ឋកិច្ចជាតិសំខាន់
- កំពង់ចាម
ខេត្តកំពង់ចាម ៖ ថ្លែងពីទឹកដីខេត្តកំពង់ចាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានមានប្រសាសន៍ថា រាជរដ្ឋាភិបាលកម្ពុជាតែងតែចាត់ទុកផ្លូវ គឺជាសរសៃឈាមនៃសេដ្ឋកិច្ចជាតិ ស្របតាមពាក្យស្លោក «មានផ្លូវមានសង្ឃឹម»។
ការលើកឡើងរបស់សម្តេចធិបតី ហ៊ុន ម៉ាណែត នាឱកាសអញ្ជើញជាអធិបតីក្នុងពិធីបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧ ប្រវែង៤៥,៤៨៩ គ.ម. ចាប់ពីរង្វង់មូលស្គន់ ដល់រង្វង់មូលគល់ស្ពានគីហ្សូណា ក្រុងកំពង់ចាម នៅព្រឹកថ្ងៃអង្គារ ទី៧ ខែកក្កដា ឆ្នាំ២០២៦ ។
សម្ដេចធិបតីនាយករដ្ឋមន្ត្រីបានគូសបញ្ជាក់ថា «រាជរដ្ឋាភិបាលកម្ពុជា តែងតែចាត់ទុកផ្លូវ គឺជាសរសៃឈាមនៃសេដ្ឋកិច្ចជាតិដែលបន្ដអាទិភាពខ្ពស់ចំពោះការអភិវឌ្ឍប្រព័ន្ធផ្លូវថ្នូរ ផ្លូវដែក ផ្លូវទឹក ផ្លូវអាកាស ស្របតាមពាក្យស្លោកមានផ្លូវមានសង្ឃឹម»។
សម្ដេចធិបតីបានបន្ដថា ដូច្នេះអាទិភាព នៃការរៀបចំកសាងផ្លូវបន្ទាប់ពីមនុស្ស គឺជាអាទិភាពសំខាន់ «មនុស្ស ផ្លូវ ទឹក ភ្លើង បច្ចេកវិទ្យា» ហើយប្រព័ន្ធផ្លូវដែកដែលមានស្រាប់ ក៏រាជរដ្ឋាភិបាល ត្រូវការពង្រឹងផងដែរ ។
សម្ដេចធិបតីនាយករដ្ឋមន្ត្រីបានគូសបញ្ជាក់ថា៖ «ផ្លូវទឹក យើងក៏នឹងបន្ដធ្វើបន្ដអភិវឌ្ឍបន្ថែមទៀត ជាពិសេស ព្រែកជីកហ្វូណនតេជោរបស់យើង ដែលនឹងបន្ដភ្ជាប់នឹងទន្លេមេង្គ ទន្លេសាប ចឹងកសិផល លែងទៅផ្លូវគោកទៀតហើយ គឺអាចចុះទឹកតែម្ដង»។
សម្ដេចនាយករដ្ឋមន្ដ្រីបន្ថែមថា «ឥឡូវយើងមានគម្រោងស្ដារពីភ្នំពេញឡើងទៅកំពង់ឆ្នាំង។ ឡើងមកមួយផ្នែកនៃខេត្តកំពង់ចាមតាមទន្លេមេង្គ ចឹងនៅថ្ងៃមុខយើងស្ដាររហូតដល់ក្រចេះ» ៕
ចែករំលែកព័តមាននេះ