សម្តេចធិបតីស្នើឲ្យក្រសួងសាធារណការត្រួតពិនិត្យការដឹកលើសទម្ងន់តាមផ្លូវឱ្យបានត្រឹមត្រូវ «កុំពេលយប់មនុស្សដេកជញ្ជីងដេកដែរ»
- ភ្នំពេញ
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើឲ្យក្រសួង សាធារណការ និងដឹកជញ្ជូន ត្រូវធ្វើការពិនិត្យចំពោះករណីដឹកជញ្ជូនលើសទម្ងន់នៅតាមផ្លូវនានា ក្នុងនោះ ជញ្ជីងថ្លឹងតាមផ្លូវត្រូវធ្វើឲ្យបានត្រឹមត្រូវ កុំពេលយប់មនុស្សដេក ជញ្ជីងដេកដែរ ។
ថ្លែងក្នុងការបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧ប្រវែង៤៥,៤៨៩គ.ម ចាប់ពី រង្វង់មូលស្គន់ ដល់រង្វង់មូលគល់ស្ពានគីហ្សូណា ក្រុងកំពង់ចាម នាព្រឹកថ្ងៃទី៧ ខែកក្កដាឆ្នាំ២០២៦ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងយ៉ាងដូច្នេះថា៖ «សូមឲ្យក្រសួងសាធារណការ និងដឹកញ្ជូនពិនិត្យមើលការដឹក ជញ្ជូនលើសទម្ងន់ ហើយជញ្ជីងខ្ញុំឧស្សាហ៍ឃើញតាមហ្វេសប៊ុក និងរឿងផ្សេងៗ ពេលខ្ញុំ ឃើញ បាញ់ឲ្យឯកឧត្តម ប៉េង ពោធិ៍នា មើលជញ្ជើងដំណើរការរហូតមែនទេ? មិនមែនពីម៉ោង១២ ដល់ម៉ោង៤ភ្លឺ អត់ដើរឬយ៉ាងណា? សូមមើលឲ្យច្បាស់ ប្រយ័ត្នពេលមនុស្សដេក ជញ្ជីងដេកដែរ? » ។
សម្តេចធិបតីនាយករដ្ឋមន្ត្រីបានលើកឡើងថា តៃកុងរថយន្តខ្លះខ្លាចពន្លឺថ្ងៃ ដោយពេល ម៉ោង១២ទៅគេចេញដល់ម៉ោង៤ទៅគេឈប់ ។ ចំណុចនេះ សូមមើលផង ព្រោះថាអ្នក បើកពេលថ្ងៃនិងពេលយប់ ដាក់សំពាធផ្លូវដូចតែគ្នានោះទេ ។ ដូច្នេះ សូមចាត់វិធានការលើកកិច្ចការងារដឹកលើសទម្ងន់នេះ ។
សម្តេចធិបតីបានស្នើឲ្យក្រសួងសាធារណការធ្វើការពង្រឹងអភិក្រមចំពោះកិច្ចការងារដឹកលើសទម្ងន់ ដើម្បីធានានូវការប្រកួតប្រជែងឲ្យស្មើភាព ចំពោះក្រុមហ៊ុននានា ។ ព្រោះថាក្រុមហ៊ុនណា ក៏ត្រូវអនុវត្តឲ្យបានស្មើភាពគ្នា មិនមែនក្រុមហ៊ុនណាមានអាទិភាពជាងក្រុមហ៊ុនណានោះទេ ។ ច្បាប់ត្រូវអនុវត្តដូចគ្នា ចំពោះកន្លែងលើកលែងចំពោះកសិករ យើង អនុវត្តចំពោះកសិ
ករ ។
ជាមួយគ្នានោះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រីបានលើកឡើងចំពោះច្បាប់ត្រូវអនុវត្តឲ្យបានស្នើគ្នា កុំក្រសួងសាធារណការអនុវត្តប៉ុណ្ណេះ ដល់ក្រសួងអភិវឌ្ឍន៍ជនបទអនុវត្តប៉ុណ្ណោះ ។ ឧទាហរណ៍៖ ក្រសួងអភិវឌ្ឍន៍ជនបទអនុញ្ញាតឲ្យដឹក៦០តោន ដល់ពេលក្រសួងសាធារណការ អនុញ្ញាតឲ្យដឹងជាង៥០តោន ។ មិនត្រូវធ្វើដូច្នេះទេ គឺត្រូវធ្វើការឲ្យឯកភាពគ្នានៅតាមស្ថាប័ន ។ ការធ្វើបែបនេះ មានភាពងាយស្រួលដល់ការដឹកជញ្ជូន និងដល់កសិករផងដែរ ។
សម្តេចធិបតីនាយករដ្ឋមន្ត្រីបានបន្ថែមថា គ្រប់ភាគីទាំងអស់ត្រូវអនុវត្តច្បាប់ឲ្យបាន ព្រោះថា បើច្បាប់ចេញមកហើយត្រូវតែអនុវត្តឲ្យបានគ្រប់គ្នា កុំពេលច្បាប់ដាក់ចេញមកហើយ អនុវត្តមិនបាន ៕
ចែករំលែកព័តមាននេះ