រាជធានីភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌកម្រិតធ្ងន់ក្រសួងមហាផ្ទៃ បានឆ្មក់ចូលទៅបង្ក្រាបទីតាំងសង្វៀនជល់មាន់មួយកន្លែង ដែលបានលួចលាក់បើកលេងយូរមកហើយ និងបានឃាត់ខ្លួនអ្នកញៀនល្បែងមួយចំនួន ព្រមទាំងដកហូតយកម៉ូតូបានច្រើនគ្រឿងទៀតផង ។
ទីតាំងសង្វៀនជល់មាន់ខាងលើនោះ ស្ថិតនៅក្នុងដីឡូត៌មួយកន្លែង ដែលមានរបងថ្មបិទជិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ហើយប្រតិបត្តិការបង្ក្រាបនោះ បានធ្វើឡើងកាលពីវេលាម៉ោងជាង៩ព្រឹក ថ្ងៃទី៤ ខែកក្កដា ឆ្នាំ២០២៦ ។
ពុំមានរបាយការណ៍ ឬការអះអាងណាមួយឲ្យដឹងថា អ្នកញៀនល្បែងជល់មាន់ ដែលត្រូវនគរបាលខាងលើចាប់ខ្លួននោះមានចំនួនប៉ុន្មាននាក់ហើយរឹបអូសបានម៉ូតូចំនួនប៉ុន្មានគ្រឿងនៅឡើយទេ។ ប៉ុន្តែឃាត់បានច្រើននាក់ ហើយម៉ូតូ ដែលត្រូវដកហូតបានច្រើនគ្រឿង រួមទាំងសម្ភារៈពាក់ព័ន្ធនឹងការលេងល្បែងនេះមួយចំនួនទៀតផងដែរ ។
ក្រោយពេលបង្ក្រាប និងឃាត់ខ្លួនមនុស្សទាំងនោះរួមទាំងម៉ូតូ ត្រូវបានបញ្ជូនទៅកាន់នាយកដ្ឋាននគរបាលព្រហ្មទណ្ឌកម្រិតធ្ងន់ ក្រសួងមហាផ្ទៃ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការបន្តតាមនីតិវិធីច្បាប់ ៕
ចែករំលែកព័តមាននេះ