អន្តរជាតិ ៖ តម្លៃប្រេងឆៅអន្តរជាតិបានធ្លាក់ចុះ នៅថ្ងៃទី៦ ខែកក្កដា ឆ្នាំ២០២៦ បន្ទាប់ពីអង្គការនៃប្រទេសនាំចេញប្រេង (OPEC) និងសម្ព័ន្ធភាពរបស់ខ្លួន (OPEC+) បានយល់ព្រមបង្កើនគោលដៅផលិតកម្មបន្ថែមទៀត ចាប់ពីខែសីហា ចំពេលដែលការនាំចេញពីក្រុមហ៊ុនផលិតសំខាន់ៗ តាមរយៈច្រកសមុទ្រហ័រមូស (Hormuz) កំពុងងើបឡើងវិញ ដែលអាចបន្ថែមការផ្គត់ផ្គង់ទៅកាន់ទីផ្សារសកល។ នេះបើតាមប្រភពពីសារព័ត៌មាន Reuters បានចេញផ្សាយ។
ប្រេងឆៅ Brent ដែលជាស្តង់ដាអន្តរជាតិ បានធ្លាក់ចុះ ៧៣ សេន ឬ ១,០១% មកនៅត្រឹម ៧១,៣៩ ដុល្លារអាមេរិកក្នុង១បារ៉ែល គិតត្រឹមម៉ោង ៣ រសៀល (ម៉ោងនៅកម្ពុជា) បន្ទាប់ពីបានកើនឡើង ០,៤៥% កាលពីថ្ងៃសុក្រសប្តាហ៍មុន។ ចំណែកប្រេងឆៅ West Texas Intermediate (WTI) របស់សហរដ្ឋអាមេរិក មានតម្លៃ ៦៨,១៥ ដុល្លារអាមេរិកក្នុង១បារ៉ែល ពោលធ្លាក់ចុះ ៥៤ សេន ឬ ០,៧៩%។ គ្មានតម្លៃបិទផ្សារប្រចាំសប្តាហ៍សម្រាប់ប្រេង WTI កាលពីថ្ងៃសុក្រនោះទេ ដោយសារទីផ្សារអាមេរិកត្រូវបានបិទ មុនថ្ងៃបុណ្យឯករាជ្យជាតិ ដែលប្រារព្ធឡើងកាលពីថ្ងៃសៅរ៍។
កិច្ចសន្យាប្រេងទាំង ២ មានការផ្លាស់ប្តូរតិចតួចកាលពីសប្តាហ៍មុន បន្ទាប់ពីបានធ្លាក់ចុះភាគច្រើនក្នុងរយៈពេលប៉ុន្មានសប្តាហ៍កន្លងមកនេះ ខណៈដែលវិនិយោគិនបានតាមដានយ៉ាងដិតដល់នូវកិច្ចចរចារវាងសហរដ្ឋអាមេរិក និងអ៊ីរ៉ង់ ជុំវិញជោគវាសនាការដឹកជញ្ជូនតាមច្រកសមុទ្រហ័រមូស ព្រមទាំងបន្តតាមដានការងើបឡើងវិញនៃការនាំចេញប្រេងនៅតំបន់ឈូងសមុទ្រពែក្ស។
អង្គការ OPEC និងសម្ព័ន្ធមិត្តរបស់ខ្លួន រួមទាំងរុស្ស៊ី បានព្រមព្រៀងគ្នាកាលពីថ្ងៃអាទិត្យ ដើម្បីបង្កើនគោលដៅផលិតកម្មបន្ថែមទៀតចំនួន ១៨៨ ០០០ បារ៉ែលក្នុង១ថ្ងៃ ចាប់ពីខែសីហា បន្ថែមលើការកើនឡើងស្រដៀងគ្នានេះ សម្រាប់ខែមិថុនា និងកក្កដា។
ទោះជាយ៉ាងណាក៏ដោយ ការកើនឡើងនេះ ភាគច្រើនមានតែលើក្រដាសស្នាមប៉ុណ្ណោះ ដោយសារតែសង្គ្រាមរវាងសហរដ្ឋអាមេរិក-អ៊ីស្រាអែល ជាមួយអ៊ីរ៉ង់ ដែលបានបិទខ្ទប់ច្រកសមុទ្រហ័រមូស មិនឱ្យនាវាដឹកប្រេងរបស់ក្រុមហ៊ុនផលិតសំខាន់ៗពីអង្គការ OPEC ឆ្លងកាត់ រួមមានអារ៉ាប៊ីសាអូឌីត កូវែត និងអ៊ីរ៉ាក់ ដែលធ្វើឱ្យទាំងនោះត្រូវកម្រិតទិន្នផលប្រេងរបស់ខ្លួន។
ការស្ទង់មតិរបស់ទីភ្នាក់ងារ Reuters រកឃើញថា ទិន្នផលប្រេងរបស់អង្គការ OPEC នៅក្នុងខែមិថុនា បានកើនឡើង ៣,៣ លានបារ៉ែលក្នុង១ថ្ងៃ ធៀបនឹងខែមុន ពោលឡើងដល់ ១៩,៤៣ លានបារ៉ែលក្នុង១ថ្ងៃ ដែលជាការងើបឡើងវិញពីកម្រិតទាបបំផុតរបស់ខ្លួន ក្នុងរយៈពេលជាង២ទសវត្សរ៍។
ទិន្នន័យក៏បានបង្ហាញថា ការនាំចេញប្រេងរបស់តំបន់ឈូងសមុទ្រពែរ្សក្នុងខែមិថុនា បានកើនឡើងជាង ៣លានបារ៉ែលក្នុង១ថ្ងៃ ធៀបនឹងខែឧសភា ដែលធ្វើឱ្យបរិមាណនាំចេញសរុបកើនលើស ១០លានបារ៉ែលក្នុង១ថ្ងៃ ប៉ុន្តែបរិមាណនេះ នៅតែទាបជាងកម្រិតមុនពេលមានសង្គ្រាមនៅអ៊ីរ៉ង់ចំនួន ៤០% ដដែល៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ