តែងតាំងលោក អ៊ន សុផល្លា ពីអភិបាលរងស្រុកកណ្ដៀង ទៅជាអភិបាលនៃគណៈអភិបាលស្រុកក្រគរ
- ពោធិ៍សាត់
ខេត្តពោធិ៍សាត់៖ ថ្ងៃទី០៦ ខែកក្កដា ឆ្នាំ២០២៦ លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញជាអធិបតី ក្នុងពិធីប្រកាសចូលកាន់មុខតំណែង អភិបាលនិងអភិបាលរងស្រុកក្រគរ ដែលបានប្រារព្ធធ្វើនៅសាលាស្រុក ដោយមានការចូលរួមពីសំណាក់លោកអភិបាលរងខេត្ត ថ្នាក់ដឹកនាំមន្ទីរ-អង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ ក្រុមប្រឹក្សាស្រុក គណៈអភិបាលស្រុក មន្ត្រីរាជការ និងអាជ្ញាធរមូលដ្ឋានជាច្រើនរូបទៀត។
យោងតាមអនុក្រឹត្យរបស់រាជរដ្ឋាភិបាល លេខ៥៦៤ អនក្រ.តត ចុះថ្ងៃទី៣០ខែមិថុនាឆ្នាំ២០២៦ បានសម្រេចតែងតាំងលោក អ៊ន សុផល្លា ឋានន្តរស័ក្កិវរមន្ត្រីថ្នាក់លេខ២ ពីអភិបាលរងស្រុកកណ្ដៀង ឲ្យមកកាន់មុខតំណែងជាអភិបាលនៃគណៈអភិបាលស្រុកក្រគរ ជំនួសលោក លីវ សេងហ៊ីម ដែលត្រូវចូលនិវត្ត ។ ជាមួយគ្នានេះ ប្រកាសរបស់ក្រសួងមហាផ្ទៃលេខ៦៦៧៤.ប្រក ចុះថ្ងៃទី០៨ខែមិថុនាឆ្នាំ២០២៦ ក៍បានសម្រេចផ្ទេរភារកិច្ចលោក ក្រូច សុខុន ឋានន្តរស័ក្កិនាយក្រមការថ្នាក់លេខ២ ពីអភិបាលរងក្រុងពោធិ៍សាត់ ឲ្យមកកាន់មុខតំណែងជាអភិបាលរងស្រុកក្រគរវិញ។
បន្ទាប់ពីទទួលបានអនុក្រឹត្យនិងប្រកាសតែងតាំងរួចមក លោក អ៊ន សុផល្លា និងលោក ក្រូច សុខុន អភិបាលនិងអភិបាលរង នៃគណៈអភិបាលស្រុកក្រគរ ដែលទើបតែងតាំងថ្មី បានឡើងប្ដេជ្ញាចិត្ត ដោយបានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ក្រសួងមហាផ្ទៃ និងថ្នាក់ដឹកនាំខេត្ត ដែលបានផ្តល់សេចក្តីទុកចិត្តដល់រូបលោកទាំងពីរ ឲ្យមកធ្វើជាអភិបាលនិងអភិបាលរងស្រុកក្រគរនាពេលនេះ។ លោកបានប្ដេជ្ញាចិត្តយ៉ាងមុតមាំថា នឹងគោរព និងអនុវត្តតាមរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់រដ្ឋ។ សាមគ្គីភាពផ្ទៃក្នុងឱ្យបានល្អជាមួយក្រុមប្រឹក្សា និងអភិបាលរងស្រុក ព្រមទាំងមន្ត្រីរាជការគ្រប់លំដាប់ថ្នាក់។ ខិតខំបម្រើសេវាសាធារណៈជូនប្រជាពលរដ្ឋក្នុងមូលដ្ឋាន ឱ្យបានកាន់តែល្អប្រសើរ លឿនរហ័ស និងមានតម្លាភាព។
មានប្រសាសន៍សំណេះសំណាលនិងផ្តាំផ្ញើក្នុងឱកាសនោះ លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានសម្តែងនូវការអបអរសាទរចំពោះ លោក អ៊ន សុផល្លា និងលោក ក្រូច សុខុន ដែលត្រូវបានថ្នាក់ដឹកនាំជឿទុកចិត្ត និងតែងតាំងជាអភិបាលនិងអភិបាលរងស្រុកក្រគរនាពេលនេះ។
លោកអភិបាលខេត្ត ក៏បានផ្តល់ការណែនាំ និងផ្តាំផ្ញើដល់លោកអភិបាលស្រុកថ្មី ព្រមទាំងថ្នាក់ដឹកនាំស្រុកទាំងអស់ ត្រូវពង្រឹងសាមគ្គីភាពផ្ទៃក្នុង រួមសហការគ្នាជាធ្លុងមួយ ជៀសវាងការប្រកាន់បក្ខពួក ដើម្បីរួមគ្នាអភិវឌ្ឍន៍ស្រុកក្រគរឱ្យកាន់តែរីកចម្រើនឡើងថែមទៀត។ បម្រើប្រជាពលរដ្ឋដោយស្មោះត្រង់ យកចិត្តទុកដាក់ខ្ពស់លើការផ្តល់សេវារដ្ឋបាល និងសេវាសាធារណៈ ជូនប្រជាពលរដ្ឋឱ្យបានទាន់ពេលវេលា និងមានប្រសិទ្ធភាព។ រក្សាសន្តិសុខសណ្តាប់ធ្នាប់សង្គម ជំរុញនិងអនុវត្តគោលនយោបាយ «ភូមិ ឃុំ សង្កាត់មានសុវត្ថិភាព» ឱ្យមានប្រសិទ្ធភាពខ្ពស់ ពិសេសការបង្ក្រាបបទល្មើសគ្រឿងញៀន ចោរកម្ម ល្បែងស៊ីសងគ្រប់ប្រភេទ និងបទល្មើសធនធានធម្មជាតិ នៅក្នុងដែនសមត្ថកិច្ចរបស់ខ្លួនគ្រប់គ្រង។
ជាមួយគ្នានេះ លោកអភិបាលខេត្តបានជម្រុញឲ្យអាជ្ញាធរស្រុក យកចិត្តទុកដាក់អំពីការដាំដើមឈើ និងសម្អាតសំរាមតាមទីប្រជុំជននិងតាមដងផ្លូវនានា ពិសេសលើផ្លូវជាតិលេខ៥ ផ្លូវទៅកាន់រមណីយដ្ឋាន និងផ្លូវទៅកានឃុំកំពង់លួង ដើម្បីឲ្យមានសោភ័ណភាព និងទាក់ទាញភ្ញៀវទេសចរជាតិនិងអន្តរជាតិមកលេងកំសាន្ត៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ