កីឡាករកម្ពុជា ៦នាក់ ឈ្នះ ៥នាក់ ចាញ់ម្នាក់ ក្នុងព្រឹត្តិការណ៍ប្រកួតកីឡាប្រដាល់ជាលក្ខណៈអន្តរជាតិ
- ភ្នំពេញ
រាជធានីភ្នំពេញ ៖ ព្រឹត្តិការណ៍ប្រកួតកីឡាប្រដាល់ជាលក្ខណៈអន្តរជាតិនៅលើសង្វៀនទូរទស្សន៍ថោននៅតំបន់ដីឡូតិ៍វេងស្រេងកាលពីយប់ថ្ងៃទី៥ ខែកក្កដា ឆ្នាំ២០២៦ ដែលបានប្រផ្ដុំទៅដោយកីឡាករខ្លាំងៗលំដាប់កំពូលរហូតដល់ទៅ៦នាក់ក្នុងនោះឈ្នះ៥នាក់ចាញ់តែ១នាក់ប៉ុណ្ណោះ។
កម្មវិធីប្រកួតដែលមានឈ្មោះថាGolden boy Kun Khmerបានរៀបចំធ្វើឡើងដោយទូរទស្សន៍ថោនលើកនេះបានធ្វើអ្នកតាមដានការប្រកួតមានការចាប់អារម្មណ៍យ៉ាងខ្លាំព្រោះគូប្រកួតទាំកីឡាករកម្ពុជានិងបរទេសសុទ្ធតែជាអ្នកមានបទពិសោធន៍និងថ្វីដៃប្រកួតម្នាក់ៗមិនតិចឆ្នាំនោះ។ជាមួយគ្នានោះដែរកំពូលអ្នកចម្បាំងធឿន ធារ៉ាក្រោយពីបានបាត់មុខពីលើសង្វៀនជាច្រើនខែមកហើយនោះក៏បានបង្ហាញខ្លួនក្នុងកម្មវិធីនេះដែរ។
កីឡាករគោរមៈច័ន្ទរាជបានត្រឹមតែយកឈ្នះកីឡាករអីវ៉ាន់ ហ្គោសជនជាតិរុស្សីបានដោយពិន្ទុប៉ុណ្ណោះ ខណៈកីឡាករមាស ប៊ុនថេនកូនសិស្សលោកគ្រូសេន ប៊ុនថេនប្រកូតចាញ់ពិន្ទុកីឡាករដានីល សានីហ្សូនូវមកពីប្រទេសរុស្ស៉ីដោយពិន្ទុ។កីឡាករអេអាំម៉ារីន ភូថងយកឈ្នះកីឡាករខនន័រ អូរ៉ៃលីមកពីប្រទេសអីរ៉ង់ត្រឹមទឹកទី១។កីឡាករម៉ឺន មេឃាយកឈ្នះកីឡាករសេរហ្សូឌី សាឌុលឡូមកពីប្រទេសអ៉ីរ៉ង់បានដោយពិន្ទុ។
ប៉ុន្តែសម្រាប់គូប្រកួតដែលធ្វើឱ្យអ្នកតាមដានទស្សនាចាប់អារម្មណ៍បំផុតនោះ គឺការប៉ះគ្នារវាងស្ដេចប្រដាល់ពេជ្រ សម្បត្តិជាមួយកីឡាករអាលី ខាន់មកពីប្រទេសគៀជីហ្គីស្ថានក្នុងប្រភេទទម្ងន់៦០គីឡូក្រាម ទោះបីកីឡាករបរទេសម្នាក់នេះមានប្រៀបជាងខាងកម្ពស់បន្តិចមែនក៏មិនអាចធ្វើអ្វីពេជ្រ សម្បត្តិបានដែរ។ទីបំផុតត្រូវកីឡាករពេជ្រ សម្បត្តិបុកត្រូវក្បាលមួយកែងរងរបួសធ្ងន់ត្រូវលោកអាជ្ញាកណ្ដាលបញ្ឈប់លែងឱ្យប្រកួតនៅត្រឹមទឹកទី២។
ទោះជាយ៉ាងណា ពេជ្រ សម្បត្តិក៏មិនសូវស្រួលខ្លួនប៉ុន្មានដែរ ដោយត្រូវគូប្រកួតវាយឱ្យរងរបួសនៅត្រង់ក្បាលដល់ទៅ៣កន្លែង ស្ទើតែត្រូវបានលោកអាជ្ញាកណ្ដាលបញ្ឈប់ការប្រកួតម្ដងៗទៅហើយ។ចំណែកអ្នកលេងពូថៅធំ ធឿន ធារ៉ាទោះបាត់មុខពីសង្វៀនប្រដាល់យូបន្តិចមែន តែវត្តមានរបស់គេលើកនេះមិនធ្វើឱ្យអ្នកគាំទ្រខកចិត្តឡើយ ដោយប្រើពេលត្រឹមតែ២ទឹកអាចយកឈ្នះកីឡាករការីម៉ូវ ការីម មកពីប្រទេអូបេហ្គីស្ថានបានដោយងាយ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ