ទីក្រុងកៀវ៖ ប្រមុខដឹកនាំអ៊ុយក្រែន លោកហ្សេឡិនស្គី ចេញមុខបដិសេធថាគ្មានករណីដែលអ៊ុយក្រែនបាត់បង់ទីក្រុងឈ្មោះកូស្ទីយ៉ាន់ទីនីវកា (Kostiantynivka) ដោយសារកងទ័ពរុស្ស៊ីវាយដណ្ដើមយកបាននោះទេ។ នាយអគ្គសេនាធិការកងទ័ពអ៊ុយក្រែនក៏ចេញមុខច្រានចោលការអះអាងរបស់រុស្ស៊ីផងដែរ។ ការថ្លែងដូច្នេះបន្ទាប់ពីយោធារុស្ស៊ីជម្រាបជូនលោកពូទីនកាលពីថ្ងៃសុក្រថាទីក្រុងកូស្ទីយ៉ាន់ទីនីវកាវត្រូវពួកគេវាយយកបានហើយ។ ទីនេះជាគោលដៅដែលរុស្ស៊ីចិញ្ចឹមចិត្តវាយយកមកគ្រប់គ្រងតាំងពីយូរមកហើយនៅក្នុងដំណើរឆ្ពោះទៅមុខរបស់ខ្លួននៅតំបន់ដូញែត។
ប៉ុន្តែលោកហ្សេឡិនស្គីបង្ហោះសារនៅលើបណ្ដាញអ៊ិចថា «នោះមិនមែនជាការពិតទេ, នោះគ្រាន់តែជាភាសាភូតកុហកមួយទៀតរបស់រុស្ស៊ីតែប៉ុណ្ណោះ។ ប្រសិនបើទីក្រុងកូស្ទីយ៉ាន់ទីនីវកាត្រូវរុស្ស៊ីចូលកាន់កាប់មែន ដូច្នេះលោកពូទីនប្រហែលជាមិនយល់ទាស់ទេក្នុងការជួបគ្នានៅទីនោះដើម្បីស្វែងរកមធ្យោបាយការទូតដោះស្រាយបញ្ចប់សង្គ្រាម»។ នាយអគ្គសេនាធិការកងទ័ពអ៊ុយក្រែនបញ្ជាក់ឡើងវិញថាទីក្រុងនេះនៅតែស្ថិតក្រោមការគ្រប់គ្រងរបស់អ៊ុយក្រែនដដែលទេ។
អ៊ុយក្រែនសរសេររៀបរាប់នៅក្នុងសេចក្ដីថ្លែងការណ៍របស់ខ្លួនថាវរសេនាធំ និងអនុសេនាធំនៃកងអង្គភាពទី១៩នៅស្លាបខាងកើតនៅតែបន្តប្រតិបត្តិការការពារខ្សែត្រៀមមុខរបស់ខ្លួននៃទីក្រុងខាងលើនេះ។ ទីក្រុងនេះស្ថិតនៅចុងប៉ូចភាគខាងជើងនៃតំបន់សំខាន់ៗទាំង៤ដែលបង្កើតជាខ្សែត្រៀមការពារ។ ទីនេះជាចំណុចកណ្ដាលនៃកិច្ចខិតខំប្រឹងប្រែងរបស់អ៊ុយក្រែនដើម្បីការពារតំបន់ដូញែតដែលសម្បូរឧស្សាហកម្មយ៉ាងច្រើនសន្ធឹកសន្ធាប់។
ក្រុមអ្នកវិភាគថ្លែងថាប្រសិនបើរុស្ស៊ីវាយយកបានទីក្រុងនេះមែន ពួកគេប្រាកដជាមានប្រៀបនៅលើសមរភូមិ។ ពួកគេអាចយកទីនោះធ្វើជាទីតាំងឈរជើងដ៏រឹងមាំមួយដើម្បីបន្តដំណើរទៅភាគខាងជើងនៅតាមបណ្ដោយខ្សែត្រៀមការពាររបស់អ៊ុយក្រែន។ យោធារុស្ស៊ីពេលខ្លះក្រៅពីនិយាយថាបានវាយយកទីក្រុងនោះទាំងស្រុង ពួកគេក៏ថ្លែងផងដែរថាវាយយកបានត្រឹមតែមួយផ្នែកប៉ុណ្ណោះ។ ទីក្រុងនេះមានប្រព័ន្ធការពារដ៏រឹងមាំ ហើយរួមគ្នាជាមួយទីតាំងរឹងមាំមួយចំនួនទៀតបង្កើតបានជាតំបន់ខ្សែក្រវាត់ការពារនៃតំបន់ដូញែត៕ ប្រភព៖ Reuters
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ