ទីក្រុងតេអេរ៉ង់៖ ក្រុមអ្នកកាន់មរណទុក្ខជនជាតិអ៊ីរ៉ង់ជាច្រើននាក់បានសម្រុកធ្វើដំណើរទៅទីកន្លែងគោរពសក្ការៈនៃទីក្រុងតេអេរ៉ង់នៅថ្ងៃនេះដើម្បីចូលរួមពិធីគោរពវិញ្ញាណក្ខន្ធអតីតមេដឹកនាំកំពូលរបស់ខ្លួនគឺលោកអាយ៉ាតូឡា អាលី ខាមេនី (Ayatollah Ali Khamenei)។ ពិធីនោះចាប់ផ្ដើមឡើងដោយការចាក់បទភ្លេងគោរពទង់ជាតិអ៊ីរ៉ង់, ការសូត្រវិយោគកថា និងការដកស្រង់ពាក្យពេចន៍នៅក្នុងគម្ពីកូរ៉ាន។ របបដឹកនាំរបស់លោកអាលី ខាមេនីរយៈពេល៣៧ឆ្នាំបានឈានដល់ទីបញ្ចប់នៅពេលអាមេរិក និងអ៊ីស្រាអែលចាប់ផ្ដើមវាយប្រហារភូមិគ្រឹះរបស់គាត់ និងធ្វើឱ្យគាត់បាត់បង់ជីវិតតែម្ដង។
រូបវីឌីអូដែលចាក់ផ្សាយនៅលើកញ្ចក់ទូរទស្សន៍អ៊ីរ៉ង់បង្ហាញរូបក្ដារមឈូសរបស់លោកអាលី ខាមេនី ដែលស្រោបទង់ជាតិអ៊ីរ៉ង់ និងឈ្នួតក្បាលពណ៌ខ្មៅ។ នៅក្បែរនោះគឺក្ដារមឈូសបួនទៀតដែលតម្កល់សពក្រុមគ្រួសាររបស់គាត់ដែលបានស្លាប់នៅក្នុងការទម្លាក់គ្រាប់បែកនោះ។ ក្រុមអ្នកចូលរួមមរណទុក្ខកាន់រូបថតលោកអាលី ខាមេនី និងទង់ជាតិអ៊ីរ៉ង់។ អ្នកខ្លះស្រែកដាក់ទំនាយអាមេរិកឱ្យរលំរលាយបាត់រូបពីភពផែនដីនេះ។
នៅក្នុងវីឌីអូដែលបង្ហោះនៅលើគេហទំព័រជាផ្លូវរដ្ឋ គេឃើញក្រុមអ្នកកាន់មរណទុក្ខស្រែកខ្លាំងៗថា «ពាក្យស្លោករបស់យើងមានតែមួយទេគឺត្រូវតែសងសឹកឱ្យមេដឹកនាំរបស់យើង។ យើងត្រូវសម្លាប់អ្នកដែលសម្លាប់មេដឹកនាំរបស់យើង»។ គេបានបាញ់ទឹកពីលើដើម្បីស្រោចស្រពក្រុមអ្នកកាន់មរណទុក្ខឱ្យត្រជាក់ខ្លួននៅក្នុងអាកាសធាតុក្ដៅហួតហែង។ ក្ដារមឈូសរបស់លោកអាលី ខាមេនី នឹងបន្តរក្សាទុកនៅទីតម្កល់សពរហូតដល់យប់ថ្ងៃអាទិត្យ។ បន្ទាប់មក គេនឹងដឹកក្ដារមឈូសទៅទីក្រុងកូម, ណាចាហ្វ និងខឺបាឡាដែលជាទីតាំងសម្បូរអ្នកកាន់សាសនាឥស្លាមនិកាយស៊ីអាយរស់នៅ។
បន្ទាប់ពីនោះ គេនឹងដង្ហែសពទៅបញ្ចុះនៅម៉ាសាតដែលជាទីតាំងដ៏ពិសិដ្ឋសម្រាប់អ្នកកាន់និកាយនេះ ។ អាជ្ញាធរត្រៀមប្រមូលមនុស្សរាប់លាននាក់ដើម្បីចូលរួមដង្ហែសព។ ពួកគេនឹងផ្ដល់របស់លើកទឹកចិត្តមួយចំនួនដូចជាចំណីអាហារ មធ្យោបាយដឹកជញ្ជូន និងកន្លែងស្នាក់នៅ។ ចាប់តាំងពីឪពុករបស់លោកស្លាប់កាលពីចុងខែកុម្ភៈរហូតមកដល់ពេលនេះ មេដឹកនាំកំពូលថ្មីរបស់អ៊ីរ៉ង់ លោកម៉ុចតាបា ខាមេនី ពុំដែលបង្ហាញមុខជាសាធារណៈម្ដងណាទេ៕ ប្រភព៖ Reuters
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ