កន្លែងមានសុវត្ថិភាពមិនផ្ញើ យកម៉ូតូទៅទុកចោល ត្រូវលោកចោរលួចផ្អើលអ្នកផ្សារខ្នាចរមាសទាំងព្រឹក
- បាត់ដំបង
ខេត្តបាត់ដំបង ៖ បើទោះជាមានកម្លាំងសន្តិសុខ ឬមានមន្ត្រីនគរបាលមូលដ្ឋាន ចុះជួយការពារជាប្រចាំ តាមបណ្ដាទីប្រជុំជន ឬ តាមទីផ្សារនានាក្ដី មិនប្រាកដថា មន្ត្រីទាំងនេះអាចរក្សាការពារសន្តិសុខ ឬគ្រប់គ្រងបទល្មើសដែលបំរុងនឹងកើតឡើងបានគ្រប់ម៉ោង គ្រប់ពេលវេលានោះទេ ប្រសិនបើម្ចាស់ទ្រព្យ ឬម្ចាស់យានយន្តមានការធ្វេសប្រហែសមិនចេះគិតគូរ ជួយថែរក្សាដោយខ្លួនឯងផងនោះ ។
ជាក់ស្ដែង នៅម៉ោង៥ និង៣០នាទីព្រឹកថ្ងៃទី០៤ កក្កដា នៅ«ផ្សារខ្នាចរមាស» ឃុំខ្នាចរមាស ស្រុកបវេល មានការភ្ញាក់ផ្ទើលឆោឡោទាំងព្រលឹមអុរ ដោយសារតែស្ត្រីម្នាក់ស្រែកឡាំប៉ាថា ម៉ូតូរបស់គាត់ទុកនៅទីនេះ ត្រូវលោកចោរលួចយកម៉ូតូបាត់ហើយ ។ គាត់មិនបានជិះម៉ូតូយកទៅទុកនៅកន្លែងមានសុវត្ថិភាពទេ ដែលមានអ្នកទទូលបញ្ញើរត្រឹមត្រូវទេ ទំនងខ្លាចអស់ប្រាក់ថ្លៃផ្ញើ ។
គាត់បែរជាជិះចូលផ្សារ ហើយយកម៉ូតូទៅទុកនៅកន្លែងស្ងាត់ ក្បែរច្រកចង្អៀតមួយនៅក្នុងផ្សារដែលពុំមានអ្នកទទូលខុសត្រូវ។ ហើយពេលគាត់ដើរចេញផុតបន្តិចពីម៉ូតូ ក៏ត្រូវលោកចោរ ដែលទំនងអង្គុយរង់ចាំមុនជាស្រេច កាច់សោ.កទាញជិះចេញទៅបាត់ដោយសុវត្ថិភាព។ លុះម្ចាស់ចេញពីផ្សារមិនឃើញម៉ូតូក៏ស្រែកឡាំប៉ាផ្អើលពេញអ្នកផ្សារខ្នាចរមាសតែម្ដង។
នេះបើតាមរបាយការណ៍ខ្លីរបស់សមត្ថកិច្ច និងយោងលើប្រភពនានា ពីអ្នកអាជីវករខ្នាចរមាសផង ដែលបានប្រាប់កោះសន្តិភាពតាមរយៈទូរស័ព្ទ ។ ម៉ូតូដែលត្រូវលោកចោរលួចយកទៅបាត់ស្ងាត់ជ្រៀបនោះម៉ាក ហុងដាឌ្រីម ពណ៌ខ្មៅ ស៊េរីឆ្នាំ២០២២ ពាក់ស្លាកលេខ បាត់ដំបង 1AR-4905 របស់ឈ្មោះ សារី សាវឿត ភេទស្រី អាយុ៤១ឆ្នាំ នៅភូមិខ្នាចរមាស ឃុំខ្នាចរមាស ស្រុកបវេល ។
អាជីវករនៅផ្សារខ្នាចរមាស លោក រ៉ាល់ មុនី បាននិយាយថា នៅផ្សារខ្នាចរមាស មានមន្ត្រីនគរបាលប៉ុស្តិ៍ និងកម្លាំងសន្តិសុខមួយចំនួនទៀតប្រចាំការ ការពារសន្តិសុខ ហើយមានទីតាំងសម្រាប់ផ្ញើម៉ូតូ ឬកង់ពី០២ ទៅ០៣កន្លែង ប៉ុន្តែប្រជាពលរដ្ឋមួយចំនួនខ្លាចអស់ប្រាក់បន្តិចបន្តួច គាត់មិនព្រមយកម៉ូតូ ឬកង់ទៅផ្ញើគេទេ សុខចិត្តជិះយកទៅទុកកន្លែងស្ងាត់ កន្លែងគ្មានអ្នក
ទទូលខុសត្រូវ នៅក្រោយៗតូប ឬផ្ទះគេ លុះត្រូវចោរលួចបាត់តាំងបន្ទោសសមត្ថកិច្ចថា មិនជួយមើលចោរ ។
លោកបានបញ្ជាក់ថា នេះមិនមែនជាលើកដំបូងទេ ដែលអំពើចោរកម្មកើតឡើងនៅក្នុងផ្សារខ្នាចរមាស គឺបានកើតឡើងញឹកញាប់ណាស់ ដែលភាគច្រើនកើតឡើងដោយសារតែការធ្វេសប្រហែសរបស់ម្ចាស់ទ្រព្យ ឬម្ចាស់យានយន្តខ្លួនឯងតែម្ដង។ កន្លែងមានផ្ញើមិនយកទៅផ្ញើទេ សុខចិត្តយកទៅទុកតាមក្រោយតូប ឬក្រោយផ្ទះគេ ដល់តែចោរលួចបាត់ តាំងស្រែកឡាំប៉ាថា សមត្ថកិច្ចមិនជួយមើល…!
ជាមួយគ្នានេះ ក្នុងនាមលោកជាប្រជាពលរដ្ឋ និងជាអាជីវករលក់ដូរ នៅក្បែរផ្សារខ្នាចរមាសផង លោកសំណូម ដ៏ទទូចសុំឲ្យអាជីវករក្ដី ប្រជាពលរដ្ឋចូលទិញទំនិញក្នុងផ្សារក្ដី បើមានម៉ូតូឬកង់ សូមមេត្តាយកទៅផ្ញើនៅទីតាំងណាមួយ ដែលមានអ្នក
ទទូលខុសត្រូវ សុមកុំសោកស្ដាយថ្លៃផ្ញើបន្តិចន្តួច ព្រោះតំលៃផ្ញើម៉ូតូ០១គ្រឿង មិនថ្លៃដូចទិញម៉ូតូ០១គ្រឿងនោះទេ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ