ទីក្រុងអង់ការ៉ា៖ បណ្ដាថ្នាក់ដឹកនាំរដ្ឋជាសមាជិកអង្គការណាតូរួមទាំងលោកដូណាល់ត្រាំផងដែរនឹងបញ្ជាក់អំពីការប្ដេជ្ញាពួតដៃគ្នាកាន់តែរឹងមាំនៅក្នុងសម្ព័ន្ធភាពនេះដើម្បីការពារសម្ព័ន្ធមិត្តរបស់ខ្លួនដូចដែលមានចែងនៅក្នុងមាត្រា៥នៃកិច្ចព្រមព្រៀង។ ការប្ដេជ្ញាចិត្តដូចខាងលើនេះនឹងប្រកាសឱ្យដឹងនៅក្នុងកិច្ចប្រជុំកំពូលរបស់អង្គការណាតូដែលនឹងរៀបចំឡើងនៅរដ្ឋធានីអង់ការ៉ា ប្រទេសតួកគី នាសប្ដាហ៍ក្រោយ។ នេះបើយោងតាមការសរសេររៀបរាប់ជាលាយលក្ខណ៍អក្សរដែលអនុម័តទទួលស្គាល់ដោយសមាជិកអង្គការនេះទាំងអស់។ ខ្លឹមសារនៃអត្ថបទនេះបានធ្លាក់ដល់ដៃរបស់អ្នកសារព័ត៌មាន។
រដ្ឋជាសមាជិកអង្គការណាតូក៏បានសន្យាផ្ដល់ជំនួយយោធាគិតជាទឹកប្រាក់៧០ពាន់លានអឺរ៉ូ (ស្មើនឹង៨០ពាន់លានដុល្លារអាមេរិក) សម្រាប់អ៊ុយក្រែននៅឆ្នាំ២០២៦ ហើយយ៉ាងហោចណាស់ក៏ផ្ដល់ជំនួយប្រហាក់ប្រហែលនេះទៀតសម្រាប់អ៊ុយក្រែនតស៊ូនៅក្នុងសង្គ្រាមពេញមួយឆ្នាំ២០២៧ទៀត។ នេះបើយោងតាមសេចក្ដីព្រាងឯកសារដែលរង់ចាំការអនុម័តនៅវគ្គផ្ដាច់ព្រ័ត្រនៅក្នុងកិច្ចប្រជុំកំពូល។ លោកត្រាំបង្ហាញភាពអល់អែក ឬជិនណាយចិត្តចង់តែដកខ្លួនចេញម្ដងៗពីអង្គការនេះព្រោះរដ្ឋជាសមាជិកមិនព្រមចូលរួមវិភាគទានឱ្យបានច្រើនគ្រប់គ្រាន់ ហើយទុកឱ្យអាមេរិករ៉ាប់រងចំណាយតែម្នាក់ឯង។
បន្ទាប់ពីប៉ះពារពាក្យសម្ដីគ្នាជាមួយថ្នាក់ដឹកនាំអឺរ៉ុបពាក់ព័ន្ធនឹងសង្គ្រាមអ៊ីរ៉ង់រួចមក លោកដាក់ការសង្ស័យថាសន្ធិសញ្ញាការពារគ្នាទៅវិញទៅមករបស់ណាតូនោះមើលទៅហាក់ដូចជាមិនបានប្រយោជន៍អ្វីទេព្រោះលោកបបួលពួកគេឱ្យចូលរួមបើកច្រកសមុទ្រហ័រម៉ូស ពួកគេធ្វើមិនដឹងមិនឮ។ លោកថែមទាំងព្រលយពាក្យថាកំពុងពិចារណាដកខ្លួនចេញពីអង្គការនេះ។ ប៉ុន្តែអត្ថបទដែលអនុម័តទទួលស្គាល់ដោយឯកអគ្គរដ្ឋទូតរដ្ឋជាសមាជិកអង្គការណាតូទាំង៣២ប្រទេសរួមទាំងអាមេរិកផងដែរនោះហាក់បង្ហាញថាលោកត្រាំចង់ទុកបញ្ហានោះមួយឡែកសិនដើម្បីរួបរួមសាមគ្គីគ្នាឡើងវិញ។
សេចក្ដីព្រាងនៃសេចក្ដីប្រកាសរបស់អង្គការណាតូនោះមានសេចក្ដីជាអាទិ៍ថា «រុស្ស៊ីជាគ្រោះគំរាមកំហែងរយៈពេលវែងចំពោះសន្តិសុខ និងស្ថិរភាពនៅអឺរ៉ុប និងតំបន់អាត្លង់ទិច។ ហេតុនេះ សមាជិកអង្គការអង្គការណាតូនៅអឺរ៉ុប និងកាណាដាប្ដេជ្ញាអនុវត្តតាមស្មារតីនៃកិច្ចប្រជុំកំពូលនៅទីក្រុងឡាអេ ប្រទេសហូឡង់ កាលពីឆ្នាំ២០២៥។ យើងកំពុងកសាងអនាគត និងធ្វើឱ្យអឺរ៉ុបមានថាមពលកាន់តែខ្លាំងក្លាដើម្បីជាធាតុផ្សំធ្វើឱ្យអង្គការណាតូក៏កាន់តែមានថាមពលខ្លាំងក្លា។ បណ្ដាសម្ព័ន្ធមិត្តនៅអឺរ៉ុប និងកាណាដាក្រោមកិច្ចសហការជាមួយអាមេរិក នឹងរ៉ាប់រងទទួលខុសត្រូវកាន់តែច្រើនជាងបច្ចុប្បន្នដើម្បីបុព្វហេតុការពាររដ្ឋជាសមាជិកទាំងអស់របស់ស្ថាប័នមួយនេះ»៕ ប្រភព៖ Reuters
ចែករំលែកព័តមាននេះ