ជនមិនស្គាល់មុខលួចដុតគំនរចំបើង០២កន្លែងធំៗ ផ្អើលអ្នកភូមិនិងសមត្ថកិច្ចកណ្ដាលអាធ្រាត្រ សង្ស័យផ្ដើមពីរឿងគំនុំ
- បាត់ដំបង
ខេត្តបាត់ដំបង ៖ ចំបើងមូរជាដុំប្រមាណ២២០០ដុំ និងដាក់គរជាទ្រើងមួយគំនរធំមួយកន្លែងទៀត ត្រូវបានជនមិនស្គាល់មុខលួចដុតឆេះយ៉ាងសន្ធោសន្ធៅហ្មត់គ្មានសល់ បង្កការផ្អើលដល់អុ្នកភូមិ និងសមត្ថកិច្ចយ៉ាងប្រសេកប្រសាច កាលពីវេលាម៉ោង១ និង២០នាទីរំលងអធ្រាត្រ ឈានចូលថ្ងៃទី ០៣ កក្កដា នៅភូមិសម្ដេច ឃុំតាប៉ុន ស្រុកសង្កែ តែមិនបង្កឲ្យប៉ះពាល់លំនៅឋាន ឬគ្រោះថ្នាក់ដល់មនុស្សទេ ។
របាយការណ៍មន្ត្រីពន្លត់អគ្គិភ័យបានឲ្យដឹងថា គំនរចំបើងដែលត្រូវអគ្គិភ័យលេបត្របាក់យកអស់គ្មានសល់នោះ មាន០២ទីតាំង មានម្ចាស់តែមួយគឺឈ្មោះ មួន ម៉ាត់មីន ភេទប្រុស អាយុ៦០ឆ្នាំ ជាកសិកររស់នៅចំណុចកើតហេតុ ។
អគ្គិភ័យបានកើតឡើងផ្ទូនៗគ្នា ខណៈដែលម្ចាស់ចំបើង និងអ្នកភូមិដទៃទៀតបាននិងកំពុងដេកលក់ស្ងាត់ភូមិ ។ អ្នកភូមិ និងម្ចាស់ចំបើង បានភ្ញាក់ផ្អើលឈូរឆ ក្នុងពេលអគ្គិភ័យកំពុងប្រឹងលេបយកគំនរចំបើងទាំង០២ទីតាំងនោះយ៉ាងស្រេងឃ្លាន ។ គ្រានោះ គេក៏បានផ្ដល់ព័ត៌មានទៅកាន់មន្ត្រីមូលដ្ខានភ្លាមៗដែរ ដើម្បីជួយសង្គ្រោះ ។ បើតាមអ្នកភូមិ បាននិយាយថា កម្លាំងជំនាញនៃអធិការស្រុកសង្កែ បានបញ្ជូនរថយន្តពន្លត់អគ្គិភ័យភ្លាមៗចំនួន០៣គ្រឿងជាបន្តបន្តាប់ ទៅកាន់ទីតាំងកើតហេតុ ដើម្បីជួយបាញ់ទឹកទប់ស្កាត់ និងពន្លត់ភ្លើង ។
ប្រភពដដែលបានប្រាប់ថា អ្នកភូមិរាប់សិបនាក់ ចូលរួមជាមួយកម្លាំងសមត្ថកិច្ច បានប្រឹងប្រែងពន្លត់ភ្លើងដ៏សន្ធោសន្ធៅ ដែលកំពុងប្រឹងលេបត្របាក់គំនរចំបើងទាំង០២កន្លែងនោះយ៉ាងអន្ទះសារ រហូតហ្មតរាបដល់ដីសល់តែផេះ ដែលកម្លាំងមនុស្ស ឬរថយន្តពន្លត់អគ្គិភ័យមិនអាចបង្ក្រាបបានឡើយ ។
ទីបំផុត ចំបើងមូរជាដុំប្រមាណ២២០០ដុំ និងគំនរចំបើងមួយពំនូកធំមួយកន្លែងផ្សេងទៀត ដែលនៅក្បែរនោះសល់តែផេះ ។ ពាក់ព័ន្ធនឹងដើមចម ដែលបង្កឲ្យមានអគ្គិភ័យនេះ គ្មានសាក្សីណាម្នាក់ដឹង ឬបានឃើញជនសង្ស័យលួចដុតចំបើងនេះទេ ។ ទាំងសមត្ថកិច្ចដ៏ដូចអ្នកភូមិ ហើយអ្នកភូមិក៏ដូចម្ចាស់ចំបើង បានត្រឹមតែដើរគ្រវីក្បាល ។ គ្មានតម្រុយ សូម្បីប៉ុនក្រចកពីមុខសញ្ញា «មេភ្លើង»ឡើយ គឺងងឹតរឈឹងតែម្ដង។
ប៉ុន្តែបើតាមការសន្និដ្ឋានស្រដៀងៗគ្នា ទាំងសមត្ថកិច្ច ទាំងអ្នកភូមិ បានដាក់ការសង្ស័យថា អគ្គិភ័យនេះ អាចផ្ដើមឡើងដោយ «ភ្លើងគំនុំ» រវាងម្ចាស់ចំបើង ជាមួយនឹងគូសត្រូវណាម្នាក់ ដែលធ្លាប់មានប្រវត្តិវិវាទនឹងគ្នាកន្លងមកនេះ ៕
ចែករំលែកព័តមាននេះ