សហរដ្ឋអាមេរិក ៖ នៅភាគខាងត្បូងរដ្ឋអូហៃយ៉ូ ភាគឦសានអាមេរិក ក្មេង១៦នាក់មានអាយុចាប់ពី១៨ខែ ដល់១៨ឆ្នាំ ត្រូវបានរកឃើញនៅរស់ក្នុងស្ថានភាពអាក្រក់បំផុត ។ ក្រោយការរកឃើញក្មេងទាំងនេះ អគ្ករដ្ឋអាជ្ញារដ្ឋអូហៃយ៉ូចាត់ទុករឿងនោះថា ជាការបង្ខាំងមនុស្សដ៏អាក្រក់អាក្រីបំផុត។
ទូរទស្សន៍ NBC រាយការណ៍ថា ឪពុកម្ដាយនិងជីដូនជីតារបស់ពួកគេត្រូវបានចាប់ខ្លួន និងទទួលការចោទប្រកាន់ពីបទល្មើសដល់១០ករណី ដោយសារបង្កគ្រោះថ្នាក់ដល់អាយុជីវិតអនីតិជន ។ បណ្ដាអ្នកស៊ើបអង្កេតរាយការណ៍ពីស្ថានភាពរស់នៅដ៏អាក្រក់បំផុតរបស់ក្មេងទាំងនេះ ដែលបង្ខាំងក្នុងបន្ទប់តូចមួយពោរពេញដោយលាមក។ ក្មេងទាំងនេះ ត្រូវបង្ខាំងទុកក្នុងបន្ទប់តូចទំហំ៣,៥ម៉ែត្របួនជ្រុង ពោរពេញដោយលាមកមនុស្ស អស់ពេលជិត៤ឆ្នាំមកហើយ ។ អាជ្ញាធរវាយតម្លៃថា ស្ថានភាពរស់នៅរបស់កុមារទាំងនេះអាក្រក់ជាងស្ថានភាពរបស់សត្វពាហនៈទៅទៀត។
ក្មេងទាំងនេះ មិនបានរៀនសូត្រ ហើយមួយចំនួនមិនមានការធំធាត់ មិនចេះនិយាយ ឬនិយាយបានតិតតួចបំផុត។ កុមារបងគេវ័យ១៨ឆ្នាំ មានបញ្ហាសសៃប្រសាទមិនដឹងថា រូបគេមានឈ្មោះអ្វីផង ។ ក្រោយរំដោះកុមារ៣នាក់ ទទួលការព្យាបាលនៅមន្ទីរពេទ្យកន្លែងសង្គ្រោះបន្ទាន់ ។ ចំណែកឪពុកម្ដាយ និងជីដូនជីតារបស់របស់ពួកគេ ត្រូវឃុំខ្លួនជាមួយការបង់ប្រាក់ធានានៅក្រៅឃុំម្នាក់ៗ៣០០.០០០ដុល្លារ ។ ពួកគេក៏ត្រូវហាមមិនឲ្យមកជួបទាក់ទងកូនឬចៅទាំងនោះទៀតផង ៕
ចែករំលែកព័តមាននេះ