វេទិកាអេកូទេសចរណ៍កម្រិតបច្ចេកទេស ដើម្បីជំរុញការអភិវឌ្ឍតំបន់ឆ្នេរ និងតំបន់ជួរភ្នំក្រវាញ បានប្រារព្ធធ្វើនៅខេត្តពោធិ៍សាត់
- ពោធិ៍សាត់
ខេត្តពោធិ៍សាត់៖ រសៀលថ្ងៃទី០២ ខែកក្កដា ឆ្នាំ២០២៦ នៅសណ្ឋាគារពោធិ៍សាត់រីវើសាយ មានរៀបចំវេទិកាអេកូទេសចរណ៍កម្រិតបច្ចេកទេស សម្រាប់តំបន់អេកូទេសចរណ៍ឆ្នេរ និងតំបន់អេកូទេសចរណ៍ជួរភ្នំក្រវាញ ក្រោមអធិបតីភាព ឯកឧត្តម ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងជាប្រធានលេខាធិការដ្ឋាននៃគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងលោក សំ ណារិទ្ធ អភិបាលរង តំណាងដ៏ខ្ពង់ខ្ពស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់។
វេទិកានេះក៏មានការអញ្ជើញចូលរួមពីប្រធានមន្ទីរទេសចរណ៍មកពីខេត្តផ្សេង ព្រមទាំងតំណាងដៃគូអភិវឌ្ឍន៍ និងវិស័យឯកជនជាច្រើនរូបទៀត។
លោក សំ ណារិទ្ធ បានជម្រាបជូនថា ខេត្តពោធិ៍សាត់គឺជាខេត្តមួយ ដែលមានវប្បធម៌និងសក្ដានុពលធម្មជាតិដ៍សំបូរបែប តំបន់ជួរភ្នំក្រវាញ ទន្លេសាប និងសហគមន៍ទេសចរណ៍អេកូទេសចរណ៍ជាច្រើន ហើយក៍ជាខេត្តមួយដែលកំពុងតែមានការអភិវឌ្ឍវិស័យទេសចរណ៍ នៅតាមតំបន់អាទិភាពជាច្រើនកន្លែងក្នុងខេត្ត បាននឹងកំពុងកសាងហេដ្ឋារចនាសម្ព័ន្ធសម្បទាទេសចរណ៍ជាបន្តបន្ទាប់ ឲ្យទៅដល់គោលដៅទាំងនោះ ដើម្បីឲ្យប្រជាពលរដ្ឋដែលរស់នៅក្នុងតំបន់ មានឱកាសរកចំណូលបានដោយងាយស្រួលជាមួយវិស័យទេសចរណ៍ និងភ្ញៀវទេសចរណ៍អាចធ្វើដំណើរទៅគ្រប់តំបន់ទេសចរណ៍ក្នុងខេត្ត ក្រៅខេត្ត និងប្រទេសជិតខាងដែលមានព្រំប្រទល់ជាប់គ្នា ឲ្យកាន់តែមានភាពងាយស្រួលនិងចំណាយពេលវេលាតិច ដែលកត្តាទាំងនេះគឺដោយមានការយកចិត្តទុកដាក់ខ្ពស់ពីថ្នាក់ដឹកនាំខេត្ត មន្ទីរអង្គភាពពាក់ព័ន្ធ ដៃគូរអភិវឌ្ឍន៍ និងអាជ្ញាធរមូលដ្ឋានគ្រប់លំដាប់ថ្នាក់។
វិស័យទេសចរណ៍ គឺជាផ្នែកសំខាន់មួយក្នុងការជម្រុញសេដ្ឋកិច្ចមូលដ្ឋាន និងលើកកម្ពស់ជីវភាពរស់នៅរបស់ប្រជាពលរដ្ឋ។ ដូច្នេះវេទិកាកម្រិតបច្ចេកទេសថ្ងៃនេះ គឺជាឱកាសដ៍វិសេសវិសាលមួយ ដែលផ្ដល់អត្ថប្រយោជន៍សម្រាប់យើងទាំងអស់គ្នា ក្នុងការផ្លាស់ប្ដូរបទពិសោធន៍និងទស្សនទាន រវាងតំបន់អេកូទេសចរណ៍តំបន់ឆ្នេរ និងតំបន់អេកូទេសចរណ៍ជួរភ្នំក្រវាញ ដោយស្វែងរកឲ្យឃើញនូវចំណុចខ្លាំងចំណុចខ្សោយ ដើម្បីបំពេញឲ្យគ្នាទៅវិញទៅមក។ ឆ្លើយតបនឹងការងារនេះ យើងក៍ត្រូវពង្រឹងយន្តការគ្រប់គ្រង សំដៅធានាឲ្យបាននូវការអភិវឌ្ឍវិស័យទេសចរណ៍ប្រកបដោយចីរភាព រក្សាបាននូវតុល្យភាពរវាងការរកចំណូលសេដ្ឋកិច្ច ការអភិរក្សបរិស្ថាន និងការលើកកម្ពស់ជីវភាពសហគមន៍។
នៅក្នុងឱកាសនោះ អង្គវេទិកាបានបើកកិច្ចពិភាក្សាយ៉ាងផុសផុលលើប្រធានបទ «ការអភិវឌ្ឍតំបន់អេកូទេសចរណ៍ថ្នាក់ជាតិសម្រាប់តំបន់ឆ្នេរ និងតំបន់អេកូទេសចរណ៍ជួរភ្នំក្រវាញ» ដោយបានផ្តោតសំខាន់លើចំណុចគន្លឹះចំនួន៣ រួមមាន៖ ការបង្ហាញពីលទ្ធផលសម្រេចបានក្នុងការរៀបចំដែនដី សក្តានុពលទេសចរណ៍ធម្មជាតិ និងការកើនឡើងនៃលំហូរភ្ញៀវទេសចរ មកកាន់តំបន់ជួរភ្នំក្រវាញនិងតំបន់ឆ្នេរ។ ការពិភាក្សាលើបញ្ហាហេដ្ឋារចនាសម្ព័ន្ធគាំទ្រ ការគ្រប់គ្រងកាកសំណល់ ការការពារបរិស្ថាន និងការប្រែប្រួលអាកាសធាតុ ដែលទាមទារឱ្យមានដំណោះស្រាយរួមគ្នា។ ការដាក់ចេញនូវទិសដៅយុទ្ធសាស្ត្រក្នុងការប្រែក្លាយតំបន់ទាំងនេះ ឱ្យទៅជាគោលដៅទេសចរណ៍បៃតងប្រកបដោយនិរន្តរភាព និងការបង្កើតឱកាសសេដ្ឋកិច្ចដល់សហគមន៍មូលដ្ឋាន។
ឯកឧត្តម ជុក ជំនោរ មានប្រសាសន៍ថា រាជរដ្ឋាភិបាលសម្រាប់នីតិកាលទី៧នៃរដ្ឋសភា ក្រោមការដឹកនាំដ៍ស្វាហាប់ ឈ្លាសវៃ និងប៉ិនប្រសព្វ របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជាអគ្គមគ្គុទ្ទេសក៍ឆ្នើម ពោពេញដោយសមត្ថភាព ចំណេះដឹង បទពិសោធន៍ និងថាមពល បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដោយបន្តចាត់ទុកវិស័យទេសចរណ៍ ជាវិស័យអាទិភាពនិងជាមាសបៃតង រួមចំណែកដល់ការអភិវឌ្ឍសង្គមសេដ្ឋកិច្ចជាតិ តាមរយៈការបង្កើនឱកាសការងារ បង្កើនប្រាក់ចំណូលជូនប្រជាជនដោយផ្ទាល់និងដោយប្រយោល ព្រមទាំងជម្រុញការនាំចេញនៅនឹងកន្លែង ទ្រទ្រង់កំណើនសេដ្ឋកិច្ច បង្កើនចំណូលជាតិ ចូលរួមដល់ការអភិវឌ្ឍវប្បធម៌និងថែរក្សាការពារបរិស្ថាន ធនធានធម្មជាតិរបស់យើងប្រកបដោយប្រសិទ្ធភាព និងការទទួលខុសត្រូវខ្ពស់។
ឯកឧត្តមបានផ្ដាំផ្ញើដល់អង្គវេទិកាទាំងមូល ត្រូវបន្តជម្រុញកិច្ចសហការជិតស្និទ្ធរវាងស្ថាប័នរដ្ឋ វិស័យឯកជន និងសហគមន៍ ដើម្បីធានាថាការអភិវឌ្ឍអេកូទេសចរណ៍ដើរទន្ទឹមគ្នានឹងការអភិរក្សធនធានធម្មជាតិ។ ត្រូវយកចិត្តទុកដាក់លើការបណ្តុះបណ្តាលជំនាញបដិសណ្ឋារកិច្ចដល់ប្រជាសហគមន៍ និងការរៀបចំផលិតផលទេសចរណ៍ឱ្យមានភាពទាក់ទាញ និងមានស្តង់ដារខ្ពស់។ ត្រូវបង្កើនការផ្សព្វផ្សាយ និងអប់រំអំពីការថែរក្សាអនាម័យបរិស្ថាន ការកាត់បន្ថយការប្រើប្រាស់ប្លាស្ទិក ដើម្បីរក្សាបាននូវភាពស្រស់ស្អាតនៃធម្មជាតិ លក្ខណៈដើមជួរភ្នំក្រវាញនិងតំបន់ឆ្នេរ សម្រាប់ទាក់ទាញភ្ញៀវទេសចរជាតិ និងអន្តរជាតិយូរអង្វែង ។ ឯកឧត្តមសង្ឃឹមថា តាមរយៈការពិភាក្សា ការផ្ដល់មតិយោបល់ និងធាតុចូលបច្ចេកទេសពីវាគ្មិនទាំងអស់ នឹងក្លាយជាត្រីវិស័យដ៍សំខាន់ ក្នុងការរៀបចំផែនការសកម្មភាពជាក់ស្ដែង ដើម្បីប្រែក្លាយតំបន់ជួរភ្នំក្រវាញនិងតំបន់ឆ្នេរ ឲ្យទៅជាគោលដៅអេកូទេសចរណ៍លំដាប់ថ្នាក់ជាតិនិងអន្តរជាតិ៕
ចែករំលែកព័តមាននេះ