មន្ត្រីជំនាញកំពុងរៀបចំសំណុំរឿងបញ្ជូនក្រុមគ្រូពេទ្យសេះហោះពិនិត្យជំងឺ«ហ្វ្រី»ចំនួន០៧នាក់ទៅតុលាការ
- បាត់ដំបង
ខេត្តបាត់ដំបង ៖ ទីបំផុត មនុស្សមួយក្រុមដែលដើរអួតប្រាប់អ្នកភូមិថា ពួកខ្លួនជាក្រុមឭគ្រូពេទ្យពិនិត្យជំងឺជូនពលរដ្ឋដល់ផ្ទះ«ហ្វ្រី»ដែលត្រូវកម្លាំងសមត្ថកិច្ចប្រមូលបានរហូតដល់ទៅចំនួន០៧នាក់ ពេលនេះ ត្រូវបានរកឃើញថា ពួកគេសុទ្ធជាពួកគ្រូពេទ្យក្លែងបន្លំ ។ ធាតុពិត ពួកគេជាអ្នកផ្សព្វផ្សាយផលិតផលបែប «ឆបោក» របស់ក្រុមហ៊ុនមួយ ។ ហើយពេលនេះ មន្ត្រីការិយាល័យជំនាញបាននិងកំពុងរៀបចំសំណុំរឿងបញ្ជូនពួកគេទៅតុលាការហើយ ដោយយោងតាមបទបញ្ជាលោកស្នងការ និងតំណាងអយ្យការអមសាលាដំបូងខេត្ត ។
លោក ឈឿង គឹមសុង ស្នងការរងទទូលផែនព្រហ្មទណ្ឌនៃស្នងការខេត្តបានប្រាប់កោះសន្តិភាពនៅថ្ងៃទី០៣ កក្កដា នេះថា មនុស្សមួយក្រុមដែលកម្លាំងអធិការក្រុងបាត់ដំបង ឃាត់ខ្លួនពាក់ព័ន្ធបទល្មើស «ឆបោក»ជាគ្រូពេទ្យ ពិនិត្យរោគ «ហ្វ្រី» ឬជាអ្នកលក់ថ្នាំព្យាបាលផងនោះ រហូតមកទល់ពេលនេះ មន្ត្រីជំនាញធ្វើការស្រាវជ្រាវតាមឃាត់ខ្លួនបានជាបន្តបន្តាប់ចំនួន០៧នាក់ ។ ក្រោយពីធ្វើការសាកសួរ និងធ្វើការស្រាវជ្រាវទើបដឹងថា ក្រុមនេះមិនមែនជាគ្រូពេទ្យទេ ។
តាមពិត ពួកគេជាអ្នកផ្សព្វផ្សាយផលិតផលរបស់ក្រុមហ៊ុនមួយប៉ុណ្ណោះ ។ ពួកគេមិនមានតួនាទីជាអុ្នកវិនិច្ឆ័យរោគ ឬជាអ្នកព្យាបាលរោគ ដូចដែលពួកគេដើរធ្វើសកម្មភាពតាមផ្ទះប្រជាពលរដ្ឋពិនិត្យរោគ «ហ្វ្រី» ហើយតម្រូវឲ្យអ្នកជំងឺទិញថ្នាំ ឬផលិតផលរបស់ពួកគេយកទៅព្យាបាលនោះឡើយ ។
លោកបានបញ្ជាក់ថា ក្រោយពីរកឃើញភាពមិនប្រក្រតី ដែលពាក់ព័ន្ធនឹងបទល្មើស«ឆបោក» ពេលនេះ មន្ត្រីការិយាល័យជំនាញបាននិងកំពុងរៀបចំសំណុំរឿងបញ្ជូនពួកគេទាំង០៧នាក់នេះ ទៅកាន់តុលការហើយចាត់ការតាមនីតិវិធីហើយ ដោយយោងតាមបទបញ្ជារបស់លោកស្នងការ និងលោកព្រះរាជអាជ្ញាអមសាលាដំបូងខេត្ត ។
ជនមួយក្រុមដែលតាំងខ្លួនជាគ្រូពេទ្យដើរពិនិត្យរោគ«ហ្វ្រី»ជូនប្រជាពលរដ្ឋមានប្រុស មានស្រី ចំនួន០៣នាក់ ជាមួយនឹងរថយន្តមួយគ្រឿងផង ត្រូវបានអុ្នកភូមិដេញតាមស្ទាក់ឃាត់ប្រគល់ឲ្យមន្ត្រីប៉ុស្ដិ៍រដ្ឋបាលសង្កាត់អូរម៉ាល់ ក្រុងបាត់ដំបង យកទៅសួរនាំ នៅពេលអ្នកភូមិប្រទះក្រុមនេះឃើញបង្ហាញមុខជាថ្មី កាលពីវេលាថ្ងៃត្រង់ថ្ងៃទី ០១ កក្កដា នៅសង្កាត់អូរម៉ាល់ ក្រុងបាត់ដំបង ។
អ្នកភូមិបានស្ទាក់ឃាត់ខ្លួនក្រុមនេះ ប្រគល់ជូនសមត្ថកិច្ច ពេលដែលពួកគាត់សង្ស័យថា ក្រុមពាក់អាវខ្វាស្សេធំៗទាំង០៣នាក់នេះ ជាក្រុមគ្រូពេទ្យក្លែងក្លាយ ។ ចុះពិនិត្យជំងឺឲ្យពលរដ្ឋដល់ផ្ទះ «ហ្វ្រី» ហើយតម្រូវឲ្យអ្នកជំងឺទិញថ្នាំយកទៅព្យាបាល គឺជា
ទង្វើ«ឆបោក» ដែលចំណាយប្រាក់ទិញអស់រាប់បាន់ដុល្លារមើលជំងឺមិនជា ខណៈអ្នកភូមិខ្លះចំណាយលុយអស់រាប់រយដុល្លារ រាប់សែនរៀលទៅហើយ តែក្រុមនេះមិនព្រមប្រគល់ថ្នាំព្យាបាល ។
ពោល៖ លក់ថ្នាំខ្យល់ ។ ដូច្នេះហើយ ទើបនៅពេលប្រទះឃើញក្រុមពាក់អាវខ្វាស្សេធំៗជិះរថយន្តចូលភូមិជាថ្មី គេចំណាំមុខបានច្បាស់ ក៏នាំគ្នាជិះម៉ូតូតាមស្ទាកចាប់ប្រគល់ឲ្យសមត្ថកិច្ចចាត់ការម្ដងទៅ ។
បើតាមការស្រាវជ្រាវរបស់កម្លាំងសមត្ថកិច្ច ក្រុមនេះមានបើកសាខាក្រុមហ៊ុនលក់ផលិតផល នៅម្ដុំជិតផ្សារទំនើប«ភូពុយ» ក្នុងសង្កាត់អូរចា ក្រុងបាត់ដំបង ដែលមានបុគ្គលិកធ្វើការនៅទីនោះចំនួន០៤នាក់ទៀត ។ ប៉ុន្តែត្រូវបានសមត្ថកិច្ចប្រមូលយកមកសួរនាំទាំងអស់ ព្រមទាំងធ្វើការត្រូតពិនិត្យឆែកឆេរស្វែងរកវត្ថុតាងពាក់ព័ន្ធផង ។
សមត្ថកិច្ចមិនបានបង្ហាញរបាយការណ៍ត្រួតពិនិត្យ ឬអត្តសញ្ញាណក្រុមសង្ស័យ «ឆបោក»ទាំងនោះទេ គេគ្រាន់តែប្រាប់ថា កម្លាំងអធិការក្រុងបាត់ដំបង បាននាំខ្លួនមនុស្សសរុបចំនួន០៧នាក់ យកមកសួរនាំ ។ ជាមួយនឹងការឃាត់ខ្លួនមនុស្សចំនួន០៧នាក់នេះ បើតាមអធិការក្រុងបាត់ដំបង លោក ពេជ្រ សារ៉ែន បាននិយាយថា ក្រុមនេះ មិនមែនជាគ្រូពេទ្យទេ ។ ពួកគេសុទ្ធទែអ្នកលក់ផលិតផល ។ នៅពេលគាត់ត្រូវពិនិត្យរោគអ្នកជំងឺណាម្នាក់ គាត់ក៏នាំអ្នកជំងឺនោះទៅពិនិត្យនៅគ្លីនិកណាមួយ លុះគ្រូពេទ្យនៅគ្លីនិកនោះចេញរោគវិនិច្ឆ័យមក ទើបក្រុមនេះណែនាំឲ្យប្រើប្រាស់ «ថ្នាំ ឬផលិតផល» របស់ក្រុមហ៊ុនពួកគេ ។ តាមពិត ក្រុមនេះមិនមែនជាពួកគ្រូពេទ្យដូចដែលពួកគេនិយាយប្រាប់ពលរដ្ឋទេ ។
លោកអធិការបានបញ្ជាក់ថា បន្ទាប់ពីត្រូវឃាត់ខ្លួនសួរនាំ និងរហូតមកដល់ពេលនេះ (០៣.០៧.២៦) មានជនរងគ្រោះចំនួន០២នាក់ បានដាក់ពាក្យប្ដឹងក្រុមគ្រូពេទ្យក្លែងក្លាយនេះ ។ ដើមបណ្ដឹងទាំង០២នាក់នោះ មានម្នាក់បានចំណាយប្រាក់អស់ជាង១,០០០ដុល្លារទិញថ្នាំ ឬផលិតផលនោះ យកទៅព្យាបាល តែជំងឺនៅតែឈឺដដែល ។ រីឯម្នាក់ទៀតបានចំណាយប្រាក់បង់ឲ្យក្រុមនេះរួចហើយ គឺចំនួន៦០ម៉ឺនរៀល តែក្រុមជនសង្ស័យនេះមិនបានយកថ្នាំ ឬផលិតផលនោះមកឲ្យគាត់ទេ ។ នេះជាការ«ឆបោក» យកប្រាក់អស់ហើយ តែមិនឲ្យថ្នាំព្យាបាល។
មិនមែនមានតែជនរងគ្រោះត្រឹម០២នាក់ ដែលបានដាក់ពាក្យបណ្ដឹងរួចហើយខាងលើនេះទេ គឺនៅមានជនរងគ្រោះរាប់សិបនាក់ទៀត ដែលត្រូវក្រុមអ្នកផ្សព្វផ្សាយផលិតផលបន្លំធ្វើគ្រូពេទ្យក្លែងក្លាយនេះបោកប្រាស់ ។
បើតាមកោះសន្តិភាពទទួលបានព័ត៌មាននេះ គឺមានប្រជាពលរដ្ឋច្រើនណាស់ នៅតាមបណ្ដាស្រុកឆ្ងាយៗ និងនៅតាមបណ្ដាខេត្តនានា ក៏ធ្លាប់ត្រូវក្រុមនេះ «បោកប្រាស់»យកប្រាក់ម្នាក់អស់រាប់ពាន់ដុល្លារដែរ ជាថ្នូរនឹងការពិនិត្យរោគ«ហ្វ្រី» ហើយទិញផលិតផលក្រុមហ៊ុនពួកគេ ។
សូម្បីតែក្រុមគ្រូសារ «ពូការ៉េបួន» អ្នកលេងបណ្ដាញសង្គមដ៏ល្បីម្នាក់ នៅក្រុងបាត់ដំបង ក៏ប៊ិះតែចាញ់បោកក្រុមពាក់អាវខ្វាស្សេធំៗនេះដែរ កាលពីប៉ុន្មានថ្ងៃមុន មុនពេលត្រូវបានអ្នកភូមិចាប់ប្រគល់ឲ្យសមត្ថកិច្ច ។ អ្នកលេងបណ្ដាញសង្គម និងជាម្ចាស់ហាងលក់បាយ«ចែមុំ ម្ហូបខ្មែរ» ឈ្មោះ«ពូការ៉េបួន» បាននិយាយថា មុនពេលត្រូវអ្នកភូមិឃាត់ខ្លួនក្រុមនេះមួយថ្ងៃប្រគល់ឲ្យសមត្ថកិច្ចចាត់ការ ក្រុមនេះ បានទៅទទួលទានអាហារនៅក្នុងហាងបាយរបស់លោក ។ ពេលនោះ ក្រុមនេះឆ្លៀតសួរនាំប្រពន្ធ កូន និងក្មួយៗ ដែលកំពុងសួរនាំភ្ញៀវ ។ ពួកគេសំឡឹងមើលមុខមាត់ ហើយធ្វើការទស្សន៍ទាយ តាមរយៈមើលទឹកមុខក្មួយរបស់លោកថា មានជំងឺនេះ… ជំងឺនោះ…. ហើយព្យាយាមទទូចឲ្យទៅពិនិត្យជំងឺ និងព្យាយាមផ្សព្វផ្សាយលក់ថ្នាំរបស់ក្រុមហ៊ុនខ្លួន ប៉ុន្តែលោកមិនបានចាប់អារម្មណ៍ទេ ។
លុះប៉ុន្មានថ្ងៃក្រោយមក ក៏ស្រាប់តែមានគេប្រាប់ថា មានក្រុមគ្រូពេទ្យជិះរថយន្តដើរពិនិត្យរោគជូនពលរដ្ឋតាមផ្ទះ«ហ្វ្រី» តែតម្រូវឲ្យទិញថ្នាំរបស់ពួកគេ ដើម្បីយកទៅព្យាបាល ។
ពូការ៉េបួនបានបញ្ជាក់ថា លោកក្រោយពីទទួលបានដំណឹងដ៏គួរឱ្យសង្ស័យនេះភ្លាម រួមទាំងក្រុមគ្រួសាររបស់លោក ប៊ិះតែនឹងចាញ់បោកក្រុមនោះផង លោកបានបានសរសេរសារបង្ហោះផ្សព្វផ្សាយអំពីសកម្មភាពមិនប្រក្រតីរបស់មនុស្សមួយក្រុមនេះតាមបណ្ដាញសង្គមភ្លាមៗ ដើម្បីជូនដំណឺងនេះ ឲ្យប្រជាពលរដ្ឋមានការប្រុងប្រយ័ត្ន ។ ប៉ុន្តែបានត្រឹមមួយថ្ងៃ ក្រុមជនសង្ស័យដែលធ្លាប់ទៅទទូលទានអាហារនៅហាងបាយរបស់លោកនោះ ក៏ត្រូវប្រជាពលរដ្ឋស្ទាក់ចាប់ប្រគល់ឲ្យសមត្ថកិច្ចល្មម ។ ឥឡូវដូចការសង្ស័យមែន..។
លោក ឈឿង កឹមសុង ស្នងការរងបានបញ្ជាក់ដែរថា តាមពិត ក្រុមហ៊ុននោះមានអាជ្ញាប័ណ្ណត្រឹមត្រូវពីក្រសួងសាមី ។ ប៉ុន្តែខ្លឹមសារនៃអាជ្ញាប័ណ្ណនោះ មិនបាននិយាយពីការពិនិត្យ ឬវិនិច្ឆ័យរោគអ្នកជំងឺ ឬដើរពិនិត្យជំងឺប្រជាពលរដ្ឋតាមទំនើងចិត្តនោះ
ទេ ។
នៅក្នុងអាជ្ញាប័ណ្ណក្រុមហ៊ុនមានលក់ផលិតផលបំប៉នសុខភាព រីឯបុគ្គលិកទាំងឡាយ គ្រាន់តែជាអ្នកផ្សព្វផ្សាយលក់ផលិតផលរបស់ក្រុមហ៊ុនប៉ុណ្ណោះ មិនមែនជាអ្នកដើរពិនិត្យរោគ«ហ្វី្រ»ជូនពលរដ្ឋតាមផ្ទះ រួចតម្រូវឲ្យអ្នកជំងឺទិញថ្នាំ ឬផលិតផលរបស់ខ្លួនយកទៅព្យាបាលតាមគំនិតបោកប្រាស់នោះទេ ។ មិនតែប៉ុណ្ណោះ បើតាមលោក ឈឿង គឹមសុង បានបញ្ជាក់បន្ថែមថា បើតាមមន្ត្រីជំនាញ ដែលបានសួរនាំក្រុមជន«ឆបោក»ទាំងនេះ បានរំលោភលើសេចក្ដីទុកចិត្តរបស់ក្រុមហ៊ុនទៀតផង ។ លោកថា ផលិតផលមួយឈុតៗ របស់ក្រុមហ៊ុនមានលក់ក្នុងតំលៃខុសៗគ្នា ប៉ុន្តែក្រុមបុគ្គលិកកំហូចទាំងនេះ បែរជាយកទៅលក់លើសពីតំលៃដែលក្រុមហ៊ុនបានកំណត់ ។
ឧទាហរណ៍ ផលិតផលខ្លះមួយឈុត ឬមួយកញ្ចប់ក្រុមហ៊ុនលក់ក្នុងតំលៃ៥០០ដុល្លារ តែក្រុមបុគ្គលិកទុច្ចរិតទាំងនេះយកទៅលក់បន្តឲ្យអតិថិជនក្នុងតំលៃលើសស្ទើរពាក់កណ្ដាលក៏មាន ទៅតាមកញ្ចប់ ឬឈុតតូចឬធំ ។ នេះជាអំពើ«ឆបោក»របស់មនុស្សមួយក្រុមនេះ។ បោកទាំងក្រុមហ៊ុនខ្លួនឯង បោកទាំងប្រជាពលរដ្ខ ។
ប៉ុន្តែយ៉ាងណា ដោយយោងលើសកម្មភាពជាក់ស្ដែង ដែលពាក់ព័ន្ធនឹងអំពើ «ឆបោក» ពេលនេះ លោកស្នងការ និងលោកព្រះរាជអាជ្ញាអមសាលាដំបូងខេត្ត បានបញ្ជាឲ្យមន្ត្រីការិយាល័យជំនាញរៀបចំសំណុំរឿងបញ្ជូនក្រុមគ្រូពេទ្យសេះហោះទាំង០៧នាក់ ក្នុងនោះស្រី០៤នាក់ផង ទៅកាន់តុលាការចាត់ការតាមនីតិវិធីហើយ ៕
ចែករំលែកព័តមាននេះ