កម្ពុជា និងកាណាដា កំពុងស្វែងរកឱកាសពង្រីកកិច្ចសហប្រតិបត្តិការក្នុងវិស័យថាមពល ខណៈក្រុមហ៊ុនកាណាដាបានបង្ហាញចំណាប់អារម្មណ៍លើការផ្គត់ផ្គង់ឧស្ម័នធម្មជាតិរាវ (Liquefied Natural Gas)ឫ LNG មកកម្ពុជា ដើម្បីឆ្លើយតបទៅនឹងតម្រូវការថាមពលដែលកំពុងកើនឡើង។
លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ចំណុចនេះនៅលើបណ្តាញសង្គមនៅថ្ងៃទី ០៣ ខែកក្កដា ក្នុងជំនួបពិភាក្សាជាមួយលោក គ្រីស្ទាន ដេរ៉ូឆេស ( Christian DesRoches) ឯកអគ្គរដ្ឋទូតកាណាដាប្រចាំកម្ពុជា ។
លោករដ្ឋមន្ត្រីបានឱ្យដឹងថា ភាគីកាណាដាបានលើកឡើងពីចំណាប់អារម្មណ៍របស់ក្រុមហ៊ុនកាណាដាក្នុងការផ្គត់ផ្គង់ LNG មកកម្ពុជា បន្ថែមលើកិច្ចសហប្រតិបត្តិការក្នុងវិស័យអគ្គិសនី ដែលកម្ពុជាកំពុងមានការអភិវឌ្ឍយ៉ាងឆាប់រហ័ស ដើម្បីបំពេញតម្រូវការរបស់វិស័យឧស្សាហកម្ម សេវាកម្ម និងការប្រើប្រាស់ក្នុងជីវភាពរស់នៅរបស់ប្រជាពលរដ្ឋ។
បច្ចុប្បន្ន កម្ពុជាបានចាប់ផ្តើមប្រើប្រាស់ឧស្ម័ន LNG ក្នុងការផលិតអគ្គិសនីរួចហើយ ។ ការប្រើប្រាស់ប្រភពថាមពលនេះ ត្រូវបានចាត់ទុកថាជាជម្រើសមួយដែលអាចជួយបង្កើនស្ថិរភាពនៃការផ្គត់ផ្គង់អគ្គិសនី និងមានការបញ្ចេញឧស្ម័នផ្ទះកញ្ចក់ទាបជាងការប្រើប្រាស់ធ្យូងថ្ម ស្របតាមគោលនយោបាយរបស់រាជរដ្ឋាភិបាលក្នុងការធ្វើពិពិធកម្មប្រភពថាមពល និងលើកកម្ពស់ការអភិវឌ្ឍប្រកបដោយចីរភាព។
អ្នកជំនាញផ្នែកថាមពលយល់ឃើញថា ការចាប់អារម្មណ៍របស់ក្រុមហ៊ុនកាណាដាលើការផ្គត់ផ្គង់ LNG មកកម្ពុជា អាចបង្កើនជម្រើសនៃប្រភពផ្គត់ផ្គង់ប្រេងឥន្ធនៈ សម្រាប់រោងចក្រផលិតអគ្គិសនីដែលប្រើប្រាស់ឧស្ម័នធម្មជាតិ និងជួយពង្រឹងសន្តិសុខថាមពលរបស់ប្រទេសក្នុងរយៈពេលវែង។
ពាក់ព័ន្ធនឹងបញ្ហានេះ កន្លងមក លោករដ្ឋមន្ត្រីបានបង្ហាញថា រោងចក្រអគ្គិសនីមួយដើរដោយឧស្ម័ន LNG ដែលមានអនុភាព ៩០០ មេហ្កាវ៉ាត់ នឹងដាក់ឱ្យដំណើរការដំណាក់ទី ១ នៅចុងឆ្នាំ២០២៦ និងដំណាក់កាលទី ២ គ្រោងដាក់ឲ្យដំណើរការនៅឆ្នាំ២០២៧ ក្រោមទុនវិនិយោគប្រមាណ ១.៣៥០ លានដុល្លារ ៕
ចែករំលែកព័តមាននេះ