ជនជាប់ឃុំ ចំនួន៥១នាក់ ត្រូវបានផ្ទេរពីពន្ធនាគារខេត្តរតនគិរី មកឃុំបន្តនៅមណ្ឌលអប់រំកែប្រែទី៣ ដើម្បីរំដោះភាពចង្អៀតណែន ។ នេះបើយោងតាមផេកអគ្គនាយកដ្ឋានពន្ធនាគារបានប្រកាសនាព្រឹកថ្ងៃទី០២ ខែកក្កដានេះ ។
អគ្គនាយកដ្ឋានពន្ធនាគារបានបន្តថា ដោយបានការអនុញ្ញាតជាគោលការណ៍ដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រី្តក្រសួងមហាផ្ទៃ អគ្គនាយកដ្ឋានពន្ធនាគារ សហការជាមួយសមត្ថកិច្ចគោលដៅពាក់ព័ន្ធខេត្តរតនគិរី ខេត្តស្ទឹងត្រែង និងខេត្តត្បូងឃ្មុំ បានធ្វើការផ្ទេរ និងដឹកជញ្ជូនជនជាប់ឃុំចំនួន ៥១នាក់ ចេញពីពន្ធនាគារខេត្តរតនគិរី មកឃុំបន្តនៅមណ្ឌលអប់រំកែប្រែទី៣។
ប្រតិបត្តិការនេះធ្វើឡើង ក្រោមការចង្អុលបង្ហាញពី ឯកឧត្ដម ឧត្ដមអគ្គានុរក្ស.១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានឱ្យនាយកដ្ឋានសន្តិសុខពន្ធនាគារ ក្រោមការចុះអនុវត្តន៍បញ្ជាផ្ទាល់ដោយ លោក ឧត្តមអគ្គានុរក្សថ្នាក់លេខ១ មាន ថាវរិន្ទ ប្រធាននាយកដ្ឋានសន្តិសុខពន្ធនាគារ នៃអគ្គនាយកដ្ឋានពន្ធនាគារ ប្រកបដោយសុវត្ថិភាព ៕
ចែករំលែកព័តមាននេះ