អាជ្ញាធរខណ្ឌពោធិ៍សែនជ័យ ចុះត្រួតពិនិត្យរបងថ្មដែលពលរដ្ឋ ចោទថាសង់លើប្រឡាយ ហើយណែនាំឱ្យម្ចាស់វា.យចេញ
- ភ្នំពេញ
រាជធានីភ្នំពេញ ៖ បន្ទាប់ពីមានការចុះផ្សាយរបស់សារព័ត៌មាន កោះសន្តិភាពជុំវិញការចោទប្រកាន់ថា រោងចក្រ និងផែស្ងួតមួយបានសង់របងថ្ម បិទលើខ្នងលូបេតុងនៅក្នុងភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងស្នើសុំឱ្យមានការបើកច្រកផ្លូវនៅលើខ្នងប្រឡាយសាធារណៈនេះ លោក សក់ ច័ន្ទកញ្ញារិទ្ធ អភិបាលនៃគណៈអភិបាល ខណ្ឌពោធិ៍សែនជ័យព្រមទាំងមន្ត្រីជំនាញក៏បានចុះត្រួតពិនិត្យជាក់ស្តែង និងបានណែនាំអោយម្ចាស់វាយរបងថ្មនោះចេញ ។
នៅក្នុងការចុះត្រួតពិនិត្យជាក់ស្តែងនោះដែរ អាជ្ញាធរក៏បានបញ្ជា់ថា ទីតាំងប្រឡាយនោះមិនមែនជាផ្លូវសាធារណៈនោះទេ ហើយបច្ចប្បន្នក៏មិនមានប្រជាពលរដ្ឋធ្វើដំណើរឡើយ ។ ទោះបីជាយ៉ាងណាម្ចាស់ក៏បានឯកភាពវាយចោល បើសិនជាអាជ្ញធរ ត្រូវធ្វើជាផ្លូវសាធារណៈម្ចាស់ក៏បានឯកភាពដែរ ។
តាមមន្ត្រីជំនាញសាធារណៈការបានអោយដឹងថា ប្រព័ន្ធលូនោះមានប្រវែង ៣៨៧ម៉ែត្រ ដើមឡើយជាដីកម្មសិទ្ធិរបស់គេហើយ របងជារបងចាស់មានតាំងពីមុនធ្វើប្រឡាយ ។ ដោយសារតែស្ថានភាពទឹកបានជន់លិចភូមិនៅឆ្នាំ ២០១៤ លោក ហែម រិទ្ធ អភិបាលខណ្ឌពោធិ៍សែនចាស់ បានស្នើម្ចាស់កម្មសិទ្ធិ ២នាក់ដែលមានព្រំដីជាប់គ្នា អោយកាយធ្វើជាប្រឡាយ ដើម្បីរំដោះទឹក ។ លុះក្រោយមកដោយសារតែដីប្រឡាយចេះតែបាក់ នៅឆ្នាំ ២០២៤ ម្ចាស់ក៍បានបុកស៊ីផាយដាក់លូ ដាក់លូប្រអប់ និងបាំងរបងផ្នែកខាងក្រោយដើម្បីការពារចោរចូលលួច ។ មន្ត្រីរូបបានអោយដឹងទៀតថា បន្ទាប់ពីមានការចុះពិនិត្យជាក់ស្ដែង លោកអភិបាលខណ្ឌក៏បានណែនាំឲ្យម្ចាស់វាយរបងចាស់នោះចោល ហើយម្ចាស់ក៍ឯកភាពតាមការណែនាំរបស់លោកអភិបាលខណ្ឌ ។
គួរបញ្ជាក់ថា នៅពេលថ្មីៗនេះ ប្រជាពលរដ្ឋរស់នៅក្នុងភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យ បានបង្ហាញការមិនពេញចិត្ត និងស្នើសុំឱ្យមានការបើកច្រកផ្លូវនៅលើខ្នងប្រឡាយសាធារណៈមួយនេះ ។ តាមប្រជាពលរដ្ឋបានឱ្យដឹងថា ប្រឡាយទឹកនេះ បច្ចុប្បន្នត្រូវបានរៀបចំដាក់លូបេតុងខ្នាតធំ (ទទឹង ៥ ម៉ែត្រ និងកម្ពស់ ២,៥ម៉ែត្រ) ក្នុងគោលបំណងបញ្ចៀសទឹកភ្លៀង និងកាត់បន្ថយការលិចលង់ក្នុងរដូវវស្សា ។
ទីតាំងនេះ ជាចំណុចតភ្ជាប់ពីលូធំក្រោមផ្លូវល្បឿនលឿន មកទល់នឹងប្រឡាយកាត់ទទឹងជាប់ផ្លូវឆេកូ (ផ្លូវបង្គោលអគ្គិសនីធំៗ) ។បន្ទាប់ពីមានការស្នើសុំពីប្រជាពលរដ្ឋ លោកអភិបាលខណ្ឌ ក៏ណែនាំអោយម្ចាស់វាយរបងនោះចោល ទុកជាផ្លូវសាធារណៈសម្រាប់អ្នកភូមិធ្វើដំណើរ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ