សង្គ្រាមអ៊ុយក្រែន ៖ កាសែតKYIV POSTរាយការណ៍ថា រុស្ស៊ីបានវាយប្រហារដោយមីស៊ីលបណ្ដែត និងមីស៊ីលបាលីស្ទិកច្រើនសិបគ្រាប់លើក្រុងគៀវ ព្រមទាំងលើទីក្រុងដទៃៗទៀតរបស់អ៊ុយក្រែន នាយប់ថ្ងៃទី១ មកទី២ កក្កដា ។ ការវាយប្រហារខ្លាំងក្លានោះ កើតមានបន្ទាប់ពីនាវេលាល្ងាច រស្ស៊ីបានវាយប្រហារដោយដ្រូនជាច្រើនចេញមកពីគ្រប់ទិសទីលើក្រុងគៀវ។
កាសែត KYIV INDEPENDENT កត់សម្គាល់ថា នោះជាការវាយប្រហារចាត់ទុកថា ខ្លាំងក្លាបំផុតរបស់រុស្ស៊ីប្រឆាំងអ៊ុយក្រែន។ អ្នកទទួលខុសត្រូវនៃរដ្ឋបាលយោធាក្រុងគៀវលោកទីមួរទីកាតឆេនកូរៀបរាប់ នាព្រឹកថ្ងៃទី២ កក្កដា ថា មនុស្សយ៉ាងតិច៩នាក់បានត្រូវស្លាប់ ហើយមនុស្សច្រើននាក់ទៀតរងរបួស។
លោកបញ្ជាក់ថា ទីតាំង២៨កន្លែង រងការប៉ះពាល់ដោយការវាយប្រហារទាំងនោះ ពិសេសបណ្ដាអគារស្នាក់នៅនិងបណ្ដាហេដ្ឋារចនាសម្ព័ន្ធស៊ីវិល។ លោកសរសេរតាមតេឡេក្រាមថា ជាថ្មីទៀត សត្រូវវាយប្រហារសំដៅបណ្ដាតំបន់មនុស្សរស់នៅច្រើន។ ស្រុកចំនួន១០នៃក្រុងគៀវរងការប៉ះពាល់ដោយសារការវាយប្រហារទាំងនេះរបស់រុស្ស៊ី ។
ការវាយប្រហារខ្លាំំងក្លា បណ្ដាលឲ្យឆេះសណ្ឋាគារមួយស្ថិតនៅតាមមហាវិថីកណ្ដាលនៃក្រុងគៀវ ។ នាថ្ងៃទី២ កក្កដា មនុស្សទាំងឡាយក៏ជាប់ក្នុងអគារកម្ពស់៩ជាន់មួយដែលរងការខូចខាត ហើយដំបូលនៃអគារមួយទៀតកំពុងត្រូវភ្លើងឆេះ។ អគារស្នាក់នៅមួយត្រូវរលំបាក់ ក្រោយរងការវាយប្រហារ ។
ចំនួនពិតប្រាកដនៃជនរងគ្រោះ និងការខូចខាតនៅតែមិនទាន់ច្បាស់ ហើយការវាយប្រហាររបស់រុស្ស៊ី ក៏នៅមិនទាន់បញ្ចប់ដែរ។ នាថ្ងៃទី១ កក្កដា ប្រជាជនក្រុងគៀវច្រើននាក់ ស្ថិតនៅគរគ្នាក្នុងបណ្ដាស្ថានីយមេត្រូ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ